• Komisaun Doasaun halo Vizita ba UNMIT nia Instalasoens

Home » Anúnsiu » Archived » Komisaun Doasaun halo Vizita ba UNMIT nia Instalasoens Imprime pájina

Komisaun Doasaun halo Vizita ba UNMIT nia Instalasoens

Iha loron 7 fulan Fevereiru, komitiva ida lidera hosi Visi-Ministru Finansas no Prezidenti Komisaun Doasaun Espóliu Misaun UNMIT nian ba Timor-Leste, Rui Manuel Hanjam, halo vizita ba Obrigado Barracks, kompleksu Nasoens Unidas nian, atu hare’e espóliu nebe’e UNMIT sei fo’o ba Governu Timor-Leste, no halo diskusaun konaba protokolu no mekanizmu hirak nebe’e ho relasaun ba prosesu doasaun nian.

Estabelese iha Reuniaun Consello Ministru, no ho objetivu primordial atu kordena no halo inspesaun ba etapa hotu-hotu nebe’e sei haktuir iha prosesu doasaun nia laran, Komisaun Doasaun, nebe’e akompaña mós hosi elementu Ministériu Saúde nian, define no diskute ho ekipa UNMIT nian konaba etapa doasaun hirak nebe’e mak sei haktuir, inventário sasan nian, prosedimentu no formalidade hirak nebe’e presiza atu kumpre.

Pontu prinsipal ida nebe’e diskute iha reuniaun, no hato’o hosi Prezidenti Komisaun, mak rekursu umanu, liu-liu, nesesidade urjenti atu fo’o treinamentu ba tékniku sira husi Governu, atu nune’e sira bele hetan kapasidade tuir rekizitu, atu bele hala’o sira nia knar iha respectivo seksaun, tuir funsionáriu UNMIT sira, ezemplu hanesan funsionáriu sira nebe’e servisu iha klínika médika o armajen; no, Governu nia kapasidade atu absorve rekursu umanu nasional sira nebe’e ohin loron servisu ba UNMIT. Prezidenti Komisaun realsa mós katak, Governu laós hakarak simu deit sasan hosi UNMIT, maibe hakarak tuir mós nia sistema funsionamentu. Ida ne’e signifika katak, Governu hakarak adopta organizasaun, metodologia, tecnologia, koñesimentu no profisionalizmu UNMIT nian, no, hakarak ne’e implika kordenasaun Governu Timor-Leste ho UNMIT, atu fortalese no atu fo’o treinamentu ba tékniku sira husi Governu.

Depois reuniaun, komitiva vizita mós  instalações físicas no ekipamentu UNMIT nian, nebe’e halo parte iha espóliu doasaun nian, liu-liu, klínika médika, Servisu Informasaun Geográfica (GIS), ofisina sira, armajén material eskritóriu nian no armajén seksaun teknologia komunikasaun no informasaun nian. Ekipa konjunta lato’o halo vizita ba kampu aviasaun, no vizita ba fatin ne’e sei halo husi Diretor-Jeral Sekretaria Estadu Transporte, Ekipamentu no Komunikasaun husi Ministériu Infra-Estrutura, Señor Fernando da Cruz. Instalações hirak ne’e iha rekursu material barak no oi-oin, nebe’e sei sai hanesan mais-valia ida ba entidade no instituições Governu nian atu adquire, maske hanesan prioridadi central ba Komisaun Doasaun maka tenki asegura distribuisaun ida ke lolós no ho rigor ba sasan sira nebe’e simu, ho garantia katak distribuisaun ne’e sei halo tuir rekerente sira nia real nesesidade. Kompete mós ba Komisaun Doasaun atu sertifika katak Governu nia instituisaun sira iha kapasidade, iha rekursu finanseiru no umanu atu bele uza ho didiak sasan sira nebe’e simu, no garante mós manutensaun apropriada ba sasan sira ne’e.