• Sumáriu Progresu Ezekusaun Medidas Sosio-Ekonómiku Tinan 2021

Home » Announcements » Sumáriu Progresu Ezekusaun Medidas Sosio-Ekonómiku Tinan 2021 Print Page

Sumáriu Progresu Ezekusaun Medidas Sosio-Ekonómiku Tinan 2021

Díli, 11 setembru 2021 – Iha fulan-maiu Prezidente Repúblika promulga ona Lei OJE Retifikativu hafoin hetan aprovasaun finál globál iha Parlamentu Nasionál ho votu A favor 44 (68%), Kontra 0 no Abstensaun 20. Ho promulgasaun ne’e, lori mudansa iha dotasaun orsamentál lubun ida inklui dotasaun Fundu Covid-19, ne’ebé ho montante inísiu millaun $31 hetan ona aumentu ho montante millaun $256,6 nune’e ninia totál orsamentu finál hamutuk millaun $287,6.

Mudansa iha dotasaun Fundu Espesiál Covid-19 ne’e, fó biban ba Governu hodi finansia medidas sosio-ekonómiku neen (6) mak hanesan: (i) Apoiu ba empregu; (ii) Moratoria de Crédito; (iii) izensaun pagamentu propinas no subsídiu internet ba estudantes ensinu superiór, (iv) sosa produtu alimentár husi produtór lokál, (v) Apoiu ba traballadór liña-frente; (vi) medidas mitigasaun no prevensaun Covid-19 inklui finansiamentu operasaun Sentru Integradu Jestaun Krize (SIJK).

Tuir-mai progresu ezekusaun reál tuir medidas sosio-ekonómiku:

𝐌𝐨𝐫𝐚𝐭𝐨𝐫𝐢𝐚 𝐝𝐞 𝐂𝐫𝐞́𝐝𝐢𝐭𝐨, 𝐞𝐳𝐞𝐤𝐮𝐭𝐚 𝐨𝐧𝐚 𝟏𝟎𝟎%

Iha fulan-jullu 2021, Ministériu Finansas halo ona transferénsia millaun $2 ba Banku Sentrál Timor-Leste hodi ezekuta Programa Moratoria de Crédito.

𝐆𝐨𝐯𝐞𝐫𝐧𝐮 𝐊𝐨𝐧𝐤𝐥𝐮𝐢 𝐏𝐚𝐠𝐚𝐦𝐞𝐧𝐭𝐮 𝐂𝐞𝐬𝐭𝐚 𝐁𝐚́𝐬𝐢𝐜𝐚

Pagamentu Cesta Básica konklui ona ho montante totál millaun $63,5 ba kompaña lokál hamutuk 188. Kompaña fornesedór hirak ne’e mós kumpre ona sira nia devér hodi selu impostu rendimentu 0,5% husi sira nia totál pagamentu ba Autoridade Tributária, Ministériu Finansas ho totál kontribuisaun impostu hamutuk $317,5 mil. Inisiativa kompaña lokál kumpre sira nia devér ne’e, fó mós kontribuisaun ba iha taxa ezekusaun Governu liuliu iha parte ezekusaun reseitas doméstika ne’ebé to’o iha 31 agostu 2021, atinji ona millaun $96,6 ka 52% husi totál estimativa reseitas millaun $187,1.

Bazeia ba relatóriu husi Ministériu Koordenadór Asuntu Ekonómiku, to’o iha fulan agostu 2021, benefisíariu sira ne’ebé mak simu ona Cesta Básica hamutuk ema millaun 1,4 resin, ka 98% husi totál benefisíariu hamutuk ema millaun 1,5.

Distribuisaun Cesta Básica ba reklamante 25,000 resin iha territóriu nasionál sei realiza iha fulan-setembru nia laran bazeia ba kalendáriu ne’ebé mak trasa ona husi Ministériu Koordenadór Asuntu Ekonómiku.

𝐀𝐩𝐨𝐢𝐮 𝐆𝐨𝐯𝐞𝐫𝐧𝐮 𝐛𝐚 𝐄𝐧𝐭𝐢𝐝𝐚𝐝𝐞 𝐄𝐦𝐩𝐫𝐞𝐠𝐚𝐝𝐨́𝐫 𝐧𝐨 𝐓𝐫𝐚𝐛𝐚𝐥𝐥𝐚𝐝𝐨́𝐫 𝐬𝐢𝐫𝐚

Iha tinan 2021, Oitavu Governu Konstitusionál aloka millaun $45 hodi apoiu ba Entidade Empregadór no Traballadór sira ne’ebé mak afeitadu husi pandemia Covid-19 liuhusi Institutu Nasionál Seguransa Sosiál (INSS). Iha fulan-jullu 2021, Ministériu Finansas halo ona transferénsia ba Konta Bánkaria INSS ho montante millaun $22,7 no INSS ezekuta ona millaun $4,9 ho nia detalla ezekusaun hanesan tuir-mai ne’e:

  • Apoiu ba Entidades Empregadór hamutuk 1,493 ho totál pagamentu millaun $2,6.
  • Subsídiu Eletrisidade ba Empregadór hamutuk 273 ho totál pagamentu $378 mil.
  • Subsídiu Renda ba kompaña hamutuk 181 ho totál pagamentu $176 mil.
  • Dispensa Kontributiva ba Estadu Emerjénsia ba ema hamutuk 294 ho totál pagamentu $274 mil.
  • Dispensa Kontributiva Fakultativu ba ema hamutuk 1,377 ho totál pagamentu $29 mil.
  • Fakultativu ba ema hamutuk 1,377 ho totál pagamentu $252 mil.
  • Subsídiu ba traballadór hamutuk 7,894 ho totál pagamentu millaun $1,3

 

𝐈𝐳𝐞𝐧𝐬𝐚𝐮𝐧 𝐏𝐫𝐨𝐩𝐢𝐧𝐚𝐬 𝐛𝐚 𝐄𝐬𝐭𝐮𝐝𝐚𝐧𝐭𝐞 𝐄𝐧𝐬𝐢𝐧𝐮 𝐒𝐮𝐩𝐞𝐫𝐢𝐨́𝐫 𝐡𝐚𝐦𝐮𝐭𝐮𝐤 𝟔𝟒,𝟔𝟏𝟗 𝐡𝐨 𝐦𝐨𝐧𝐭𝐚𝐧𝐭𝐞 𝐦𝐢𝐥𝐥𝐚𝐮𝐧 $𝟓,𝟔.

Iha fulan-jullu 2021, Ministériu Finansas mós realiza ona pagamentu izensaun propinas ba estudantes Ensinu Superiór hamutuk 18 ho montante millaun $5,6. Totál númeru estudante Ensinu Superiór ne’ebé mak hetan benefísiu hamutuk estudante 64,619.

Detalla Instituisaun Ensinu Superiór públiku no privadu sira ne’ebé hetan pagamentu mak tuir-mai ne’e: Dili Institute of Technology (DIT); East Timor Coffee Institute (ETCI); Institute of Business (IOB); Instituto Boaventura Timor-Leste (IBTL); Instituto Católico Formação de Professores (ICFP); Instituto Ciências da Saúde (ICS); Instituto de Ciências Religiosas (ICR); Instituto Filosófico S. Francisco de Sales (IFFS); Instituto Politécnico de Betano (IPB); Instituto Profissional de Canossa (IPDC); Instituto S. João de Brito (ISJB); Instituto Superior Cristal (ISC); Instituto Superior de Filosofia e Teologia (ISFIT); João Saldanha Institute (JSI); Universidade de Díli (UNDIL); Universidade de Paz (UNPAZ); Universidade Nacional de Timor Lorosa’e (UNTL); no ikus liu mak Universidade Oriental Timor Lorosa’e (UNITAL).

𝐒𝐮𝐛𝐬𝐢́𝐝𝐢𝐮 𝐈𝐧𝐭𝐞𝐫𝐧𝐞𝐭 𝐧𝐨 𝐏𝐮𝐥𝐬𝐚 𝐛𝐚 𝐄𝐬𝐭𝐮𝐝𝐚𝐧𝐭𝐞 𝐄𝐧𝐬𝐢𝐧𝐮 𝐒𝐮𝐩𝐞𝐫𝐢𝐨́𝐫

Relasiona ho subsídiu internet no pulsa ba estudante ensinu superiór sira, Ministériu Ensinu Superiór Siensia no Kultura (MESSK) sei kompleta rekezitus ba Operadór Telekomunikasaun sira (Timor Telecom, Telemor no Telkomcel) hodi submete filafali mai Ministériu Finansas atu verifika molok realiza pagamentu. Orsamentu alokadu ba medidas ne’e hamutuk millaun $2.

𝐒𝐮𝐩𝐥𝐞𝐦𝐞𝐧𝐭𝐮 𝐑𝐞𝐦𝐮𝐧𝐞𝐫𝐚𝐭𝐨́𝐫𝐢𝐮 𝐛𝐚 𝐓𝐫𝐚𝐛𝐚𝐥𝐥𝐚𝐝𝐨́𝐫 𝐥𝐢𝐧̃𝐚-𝐟𝐫𝐞𝐧𝐭𝐞

To’o iha 11 setembru 2021, Sekretariadu Tékniku Fundu Covid-19, Ministériu Finansas foin mak simu pedidu pagamentu husi Ministériu Interiór no Ministériu Administrasaun Estatál. Hafoin verifika, Sekretariadu Tékniku Fundu Covid-19 tenke devolve filafali pedidu pagamentu refere tanba la-prienxe rekezitus pagamentu konforme Dekretu Lei nú 13/2021, 24 Agostu kona-ba finansiamentu suplementu remuneratóriu ba traballadór liña-frente.

Ministériu Finansas mós kontaktu ona Ministériu Saúde (MS) no Sentru Integradu Jestaun Krize (SIJK) atu submete ona pedidu pagamentu mai Ministériu Finansas. MS no SIJK konfirma sei submete pedidu pagamentu mai Ministériu Finansas iha tempu badak nia laran hodi verifika molok realiza pagamentu.

𝐆𝐨𝐯𝐞𝐫𝐧𝐮 𝐒𝐮𝐛𝐦𝐞𝐭𝐞 𝐑𝐞𝐥𝐚𝐭𝐨́𝐫𝐢𝐮 𝐄𝐳𝐞𝐤𝐮𝐬𝐚𝐮𝐧 𝐅𝐮𝐧𝐝𝐮 𝐂𝐨𝐯𝐢𝐝-𝟏𝟗 𝐓𝐫𝐢𝐦𝐞𝐬𝐭𝐫𝐞 𝐃𝐚𝐫𝐮𝐚𝐤 𝐛𝐚 𝐏𝐍

Governu liuhusi Gabinete Primeiru-Ministru mós submete ona Relatóriu Ezekusaun Fundu Covid-19 Trimestre Daruak ne’ebé kobre períodu Abril to’o Juñu 2021 ba Parlamentu Nasionál iha fulan-jullu 2021.