• Ezekusaun OJE 2017 tenki ho reponsabilidade no disiplina – Radio CRC Metro

Home » Announcements » Ezekusaun OJE 2017 tenki ho reponsabilidade no disiplina – Radio CRC Metro Print Page

Ezekusaun OJE 2017 tenki ho reponsabilidade no disiplina – Radio CRC Metro

Vice Ministru Finansas, Helder Lopes no Presidente Komisaun C ba assuntu Finansas Públika fahe informasaun konaba Orsamentu Jeral Estadu (OJE) 2017 iha Radio Metro 94.7 MHz, Mascarenhas (18/01/2017).
Iha OJE 2017, Governu halo redusaun ba despezas no kontinua fo prioridade nasional ba setores hanesan edukasaun, saúde, agrikultura no infrastrutura báziku sai hanesan topiku spesial ba programa iha radio komunidade ne’ebe mak halo ho durasaun 45 minutus.
Husi intervista ne’e wainhira hatan ba perguntas; oinsa Komisaun C nia hare ba OJE 2017 Presidente Komisaun C, Virgilio Maria Dias Marçal hatete, “orsamentu ne’e wanhira haruka mai Parlamentu Nasional (PN) liu husi prosesu ida, em prinsipiu PN halo diskusaun no aprova proposta ne’ebe governu haruka mai Parlamentu Nacional. Tamba PN konsidera katak governu mak hatene nia ema ou téknikus ne’ebe mak servisu iha terenu”.
Nune’e mos Vice Ministru, Helder Lopes wainhira hatan ba perguntas kona ba inisiativa saida mak governu iha hodi halo redusaun ba OJE 2017 kompara ho OJE 2016; Vice Ministru Financas esplika katak, iha 2016 iha orsamentu rua mak hanesan orsamentu orijinal no retifikativu ho montante $ 1, 952 mil miloens, maibe iha 2017 PN aprova no Presidente promulga orsamentu hamutuk $1.386 mil miloens deit inklui impréstimu. Ne’e signifika katak iha redusaun $ 500 miloens tamba waihira governu prepara orsamentu hare no konsidera ba aspetus lubuk ida hanesan hare ba sustetabilidade fiskal ne’ebe mak tenki asegura katak osan fundu minarai ne’e bele gasta iha jerasaun agora no futuru tamba ita hare ba kapasidade ezekusaun liga liu ba kualidade no taxa ezekusaun nian.
Vice Ministru Financas subliña liu tan katak, redusaun ba OJE 2017 ne’e tamba tinan ne’e hanesan tinan eleisaun ho nune’e ezekusaun orsamentu ladun bo’ot tamba mákina estadu no polítikus sira konsentra ba eleisoens no governu hanoin katak $ 1, 3 mil miloens ne’e nato’on atu bele ezekuta iha 2017. Parte seluk hare mos ba kualidade orsamentu no prinsipiu tenki tau osan ne’ebe labele fo efeitus negativu ba ekonómia ou kapasidade ekonómia hodi absorve.
OJE 2017 ne’ebe aprovadu no promulga husi PR mak $ 1,386 mil miloens no meius atu finansia orsamentu ne’e mak governu foti liu husi reseitas doméstika, reseitas petrolíferu no empréstimu.
Tinan ne’e mos MF halo dezentralizasaun ezekusaun orsamentu iha kada munisipiu, liña ministériu no ajensia autonomu, MF sei halo deit validasaun depois haruka pedidu ba Banku Central hodi halo pagamentu. Atu fasilita ezekusaun orsamentu ne’e, MF kontinua fo formasaun ba ofisiais husi entidades estadu nian tomak para bele hatene sistema hodi ezekuta orsamentu ne’e ho diak.
Wainhira taka programa ne’e, Vice Ministru Financas Helder Lopes mos husu ba entidades hotu atu ezekuta orsamentu tuir enkuadramentu legais no sistema ne’ebe iha atu bele evita gastus ne’ebe mak ita lakohi futuru. Lei defini lolos no klaru katak sira ne’ebe responsavel ba ezekusaun orsamentu waihira ezekuta osan ne’e sala sei responsabiliza husi aspetus finanseiru, kriminal, administrasaun no polítika.
Vice Ministru husu husu ba maluk sira hotu halo akompañamentu ba ezekusaun ne’ebe iha para bele iha ezekusaun ne’ebe efisiente, efikaz no transparante hodi fo benefisiu ba povu iha nasaun ida ne’e.
Nune’e mos, Deputadu PN Komisaun C, husu ba governu atu disiplina nafatin hodi ezekuta orsamentu, husu ba governu hamosu regulamentu ba díividas públika no tau matan liu tan ba kestaun malnutrisaun iha Timor Leste.
Programa ne’e realiza tamba iha kooperasaun entre Sekretaria Estadu Assuntu Parlementar (SEAP) ho Sekretaria Estadu Komunikasaun Social (SEComS) hodi dizemina informasaun ba komunidade sira ne’ebe fo sai iha estasaun radio komunidade sira hotu ne’ebe mak espalha iha Timor laran.