• A.T Konklui Ona Treinamentu Prienxe Formuláriu Rendimentu Anuál 2019 Ba Kontribuente Impostu

Home » Announcements » A.T Konklui Ona Treinamentu Prienxe Formuláriu Rendimentu Anuál 2019 Ba Kontribuente Impostu Print Page

A.T Konklui Ona Treinamentu Prienxe Formuláriu Rendimentu Anuál 2019 Ba Kontribuente Impostu

Ministériu Finansas liuhosi Autoridade Tributária iha loron 14 Fulan-Fevereiru 2020 konklui ona Treinamentu Prienxe Formuláriu Rendimentu Anuál 2019 ba pessoál hamutuk 250 iha kapitál Dili ne’ebé sai hanesan kontribui impostu ba estadu Timor-Leste.

Tuir Sefi Repartisaun Munisípiu Dili, Luis Norbertu dos Santos Pereira hateten ohin loron ikus ba Treinamentu Prienxe Formuláriu Rendimentu Anuál 2019 nian no kontribuente barak maka senti orgullu. Tanba ida-ne’e hanesan oportunidade ba sira atu bele aprende liutan, maibé durante treinamentu hahuu ami detekta iha kontribuente balu sei dúvida atu konta sira-nia impostu. Ami fiar katak, liuhusi treinamentu ida-ne’e bele hasa’e tan sira nia koñesimentu, abilidade no matenek para oinsa atu sura sira-nia rendimentu ho loloos. Dalabarak sira konta no selu impostu sala afeta ba sira-nia kompañia atu selu multa.

“Hau hanoin katak, kontribuente sira maka sai parseiru governu nian no sira maka hola parte selu impostu kada fulan no tinan. Estadu garante ba kontribuentes sira atu bele kumpri selu tuir obrigasaun ne’ebé estadu Timor-Leste fó vigora tuir lei Autoridade Tributária ”. Informa Sefi Repartisaun Munisípiu Dili, Luis Norbertu dos Santos Pereira.

Tanba ne’e maka ami hakarak halo treinamentu ida-ne’e hodi fó hanoin nafatin ba sira katak, selu impostu ne’e sistema self assessment, sira mak rasik sura, sira mak rasik konta, i sira rasik mak selu. Bainhira sira halo relatóriu sira la-loos ne’e sei impaktu mós ba sira-nia kompañia. Hosi parte Autoridade Tributária nia parte nafatin fó edukasaun ba sira. Ba oin bele aprende di’ak liutan atu fortifika iha jestaun negosiu atu bele partisipa selu impostu ba estadu.

Sefi Repartisaun Munisípiu Dili reforsa tan katak, treinamentu ida-ne’e planu ba oin Autoridade Tributária (A.T) sei halo mós iha Munisípiu sira seluk inklui Rejiaun Administrativa Espesiál Oe-Cusse Ambeno (RAEOA), tanba sira mós husu hela A.T nia apoiu. Ba oin hosi parte A.T sei halo planu ne’ebé di’ak liutan relasiona ho formasaun sira hanesan ne’e bele to iha teritória sira hotu.

Iha sorin seluk tuir kontribuente hosi Agency Pacific Lda. Joanina V. Xavier hateten ida-ne’e hanesan formasaun primeiru ne’ebé ohin ha’u hetan hosi Autoridade Tributária relasiona ho Prienxe Rendimentu Anuál 2019 nian. Formasaun ida-ne’e di’ak tebes-tebes ba ha’u hanesan Agency nomós kompañia lokál sira atu hatene oinsa selu taxa anuál ba estadu ho loloos.

“Tinan ida-ne’e maka ami foin hetan formasaun ida-ne’e, ne’ebé ami senti di’ak atu ami bele aprende tan kona-ba selu taxa ba estadu”. Informa Joanina V. Xavier reprezentante hosi Agency Pacific Lda.

Nune’e mós tuir Diretór Nasionál Inspeksaun Autoridade Tributária (DNIAT) Armindo de Almeida hateten hanesan jestór iha Autoridade Tributária (A.T) nia obrigasaun tenki fó informasaun kona-ba saida maka impostu ba kontribuente sira. Tanba selu impostu la fasil tanba kontribuete sira hasai rasik sira nia osan selu impostu ba estadu tuir lei regulamentu Autoridade Tributária.

Autoridade Tributária Prepara Dadus Akuntabilidade tuir regulamentu sira hanesan tuir mai ne’e:

  1. Regulamentu UNTAET 200\18 Artigu 62.1, ema ne’ebé responsabiliza atu ko’a no selu impostu tenki halo nia lista ou akontabilidade.
  2. Regulamentu UNTAET 200\18 Artigu 62.2, kontribuente hotu-hotu tenki prepara nia akontabilidade no rai nia arkivu ho di’ak minimál tinan 5 nia laran ho dalen Timor-Leste.
  3. Regulamentu UNTAET 200\18 Artigu 62.1,2,3 DNAIT-Atu bele asesu ba dadus ou arkivu sira iha file manuál no iha komputadór.