• A.T Realiza Treinamentu Prensimentu Formuláriu Rendimentu Anuál 2019

Home » Announcements » A.T Realiza Treinamentu Prensimentu Formuláriu Rendimentu Anuál 2019 Print Page

A.T Realiza Treinamentu Prensimentu Formuláriu Rendimentu Anuál 2019

20200210_A T Realza Treinamentu Prensimentu Formulariu Rendimentu Annual 2019 1

Ministériu Finansas liuhosi Autoridade Tributaria (A.T) Realiza Treinamentu Prensimentu Formuláriu Rendimentu Anuál 2019 nian ba reprezentante kompaña sira ne’ebé sai hanesan kontribuente ba estadu Timor-Leste. Treinamentu ne’e realiza iha Salaun Auditórium Ministériu Finansas, loron 10 Fulan Fevereiru 2020.

Tuir Sefi Repartisaun Munisípiu Dili, Luis Norbertu dos Santos Perreira, hateten objetivu hosi treinamentu ida-ne’e atu fó kapasitasaun ka treinamentu ba kontribuiente sira. Tanba tinan ida-ne’e sira tenki deklara sira nia rendimentu 2019 nian. Treinamentu ida-ne’e mós importante hodi hanorin sira oinsa atu sura impostu, relata imposto, bainhira atu ba selu iha banku. Ida-ne’e faze ida importante ba sira no oportunidade para sira bele hetan formasaun. Alende ne’e, sira mós bele kompriende oinsa atu sura sira-nia impostu iha tinan ida. Hodi nune’e bele rai sira nia nota despezas no relatóriu anuál sira bainhira deklara karik labele sala.

“Tanba lei hateten katak, bainhira konta ka deklara sala sira nain maka sei toma responsabilidade. Tanba ami nia sistema self assessment ne’e hateten katak, sira mak rasik sura, sira mak rasik konta, i sira rasik mak selu. Bainhira sira halo relatóriu sira la-loos ne’e sei impaktu mós ba sira nia kompaña”. Informa Sefi Repartisaun Munisípiu Dili, Luis Norbertu dos Santos Perreira.

Tanba ne’e mak ohin loron ami konvida sira mai hodi tuir treinamentu atu hasa’e sira-nia koñesimentu oinsa selu impostu. Sira tenki selu impostu ba estadu tuir kbiit ka forsa ne’ebé sira idak-idak iha. Importante mós tanba kontribuente barak maka rezistu ona iha Autoridade Tributaria balun iha ona koñesimentu diak, liu-liu liga ho akuntabilidade sira sura no komprende. Balun sira-ne’ebé kompaña ki’iko’an no iha faze foin aprende tenki mai tuir para sira komprende kontazen selu impostu ba estadu.

Sefi Repartisaun Munisípiu Dili ne’e mós reforsa tan, tuir planu treinamentu ne’e durante semana ida no loron ida ema nain 50, no tarzetu numeru partisipate maizomenus ema 250. Ida-ne’e sei rai hanesan arkivu ba sira-ne’ebé maka mai no aban-bainrua sira la komprende ida-ne’e labele fó kulpta mai Autoridade Tributaria.

“Tanba sira mai aprende ona no sira tenki aprende barak liutan oinsa sira bele selu sira nia impostu ho justu no honestidade selu ba estadu”.

Ba futuru, ami sei halo planu diak liutan hodi realisa treinamentu ida-ne’e ba iha Munisípiu sira. Tanba munisípiu sira mós presiza nafatin ami nia asistensia atu sira mós labele lakon oportunidade hanesan agora dau-daun.

Iha sorin seluk tuir partisipante Diretór Kompaña Boco Auto Unipessoal. Lda, Adriano de Jesus Barreto hato’o nia sentimentu orgullu ba liga ho treinamentu ida-ne’e fó nia benifísiu ba empresa lokál oinsa prense formuláriu rendimentu tinan ida nian. Ami agradese tebes ba treinamentu ida-ne’e no ami fiar ida-ne’e fó bantazen tebes mai ami no atu hadia mós empreza lokál ne’ebé preokupa ho sira nia rendimentu tinan-tinan. Treinamentu ida-ne’e tenki mantein nafatin no kontinua tinan-tinan para atu nune’e bele hadia ita nia empreza lokál sira ne’ebé hakarak selu impostu.

“Hau agradese ba Ministériu Finansas ne’ebé ho ninian esforsu tomak atu kria treinamentu ida-ne’e. Fo hanoin empreza lokál ne’ebé maka ladu’un komprende kona-ba Treinamentu Prensimentu Formuláriu Rendimentu Annual”. Informa Diretór Kompaña Boco Auto Unipessoal. Lda, Adriano de Jesus Barreto.