• AA Diskuti hela Protokolu ho BNU Hodi Fasilita Pagamentu Online ba Importador no Exportadores Sira.

Home » Announcements » AA Diskuti hela Protokolu ho BNU Hodi Fasilita Pagamentu Online ba Importador no Exportadores Sira. Print Page

AA Diskuti hela Protokolu ho BNU Hodi Fasilita Pagamentu Online ba Importador no Exportadores Sira.

Autoridade Aduaneira (AA) liuhosi Reforma Fiskál diskuti hela Protokolu ho Banco Nacional Ultramarino (BNU) hodi fasilita Importadores no Exportadores sira ba pagamentu Taxas Alfádengas nian liuhosi Sistema Online. Lia hirak ne’e informa husi Diretur Jerál Autoridade Aduaneira, José António Fátima Abílio ba Média Ministériu Planu no Finansas iha nia servisu fatin, 12 Janeiru 2018.

Nia haktuir katak, atu hatan ba Merkadu Internasional ho fasilita komérsiu no ejijensia husi Importadores no Exportadores sira ne’ebé hela iha estranjeiru nomós iha nasaun laran AA prepara hela Protokolo ida ho BNU atu hodi halo pagamentu online ba taxas ne’ebé mak durante ne’e Alfándegas kobra. Sistema ASYCUDA World ne’e rasik mós iha vantanjen bo’ot hodi halo interligasaun ho Sistema Banku nian para bele hala’o pagamentu online atu asegura nia seguransa, kontabilidade no transparênsia nomós tenki preenxe rekizitus tuir lei gestaun finansas públikas nian.

“Maske durante ne’e iha duni pagamentu liuhosi broker ou despaxantes bainhira sira prosesu dokumentus importasaun no exportasaun hodi produz DAU (Deklarasaun Aduaneira Únika) hotu tiha, sira ba selu direitamente iha Banku. Pagamentu manual diak, maibé iha risku, la seguru no dala ruma broker ou despaxantes sira atu ba selu taxa nia bixa naruk, tenki hein no demora ba prosesu desalfándegamentu. Fasil no prátiku liu bainhira uza pagamentu online, Importadores no Exportadores sira bele halo pagamentu iha ne’ebé deit, bele iha rai laran ou iha estrangeiru. Sistema pagamentu online ne’e, depende fali ona ba BNU nia sistema iha banku prontu ona atu hala’o ida ne’e ka lae. Sistema ne’e prátiku liu tamba, bainhira Importador ka Exportador konfirma ona no haruka nia fatura pagamentu ba broker ou despaxante, nia lori ba apresenta iha Alfándegas Portu ho DAU 23 entaun Portu bele liberta ona sira nia merkadorias iha kontentor,” esplika Diretur Jerál ne’e.

Diretur Jerál hatutan tan, seksaun Kontabilidade ne’ebé loron-loron iha fim do dia sempre halo rekonsiliasaun ba pagamentus sira registadu iha Sistema ASYCUDA World ho Sistema Banku nian hodi haré númeru sira ne’e han malu ka lae, tuir númeru konta bankária ne’ebé Diresaun Jerál Tesouru loke ba AA hodi halo nia pagamentu tuir kategoria taxa ida-idak nian. Vantagem pagamentu online ne’e, mak nia bele uza deit Credit Card ou Master Card hodi halo pagamentu iha Banku ida nebé deit tamba, sistema elektrónika oras ida ne’e avansadu no sufistikadu tebes, no sistema ne’e automátiku no fasil atu halo rekonsiliasaun ho ami nia sistema iha Seksaun Kontabilidade hodi haré Kontentor ida ne’ebé mak nain, selu ona hodi bele hetan autorizasaun ba libertasaun tuir pagamentu ba kontentor refere,” dehan Diretur Jerál AA.