- Semináriu iha Suku Hothotu
Home » Kona ba » Ita nia Peskiza, Estatistikas no Indikador » Sensus Fo Fila Fali » Semináriu iha Suku Hothotu Imprime pájina
Semináriu iha Suku Hothotu
Bainhira mak sei realiza semináriu Sensus Fo Fila Fali iha hau nia suku?
Sensus Fo Fila Fali sei involve ekipa diseminasaun 18 ne’ebé sei vizita suku ida-idak hosi suku 442 Timor-Leste nian, iha ne’ebé sei aprezenta Relatóriu Suku iha semináriu loron tomak ida bá lider komunitáriu sira.
Líder lokál besik 20 mak konvidadu atu atende semináriu iha suku ida-idak.
Sensus Fo Fila Fali sei hahú iha loron 4 Novembru no ramata iha tinan ida ne’e nia ramata.
Bainhira hakarak informasaun kona-ba data ezatu semináriu nian iha ita boot nia suku, bele kontaktu ho ita boot nia Administrador Distritu, Administrador Sub-Distritu ka Xefe de Suku.
Saida mak ita hakarak atu alkansa
Semináriu sira Sensus nian ne’e sei fornese bá lider sira komunidade nian ideia klaru ida kona-ba situasaun real iha sira nia suku no distritu ida-idak, nune’e mos panorama estatistiku ida iha nivel nasional.
Iha semináriu Sensus Fó Fila Fali sira, líder komunitáriu sira no ema sira seluk ne’ebé iha interese sei aprende oinsá atu interpreta indikadór sosial sira ne’ebé mak aprezenta iha Relatóriu Suku sira. Sira sei aprende mos kona-ba oinsá indikador sira ne’e sei relasionadu ho Meta Dezenvolvimentu Miléniu (MDG/MDM) no oinsá sira bele uza nu’udar referénsia hodi monitór progresu sósiu ekonómiku sira nia suku nian.
Objektivu importante ida seluk projetu ida ne’e nian mak atu serve nu’udar inspirasaun bá Xefe de Suku sira no atu dada komunidade lokál hodi involve iha prosesu hadia kondisaun moris ema hothotu nian ne’ebé mak moris iha Timor-Leste. Ami hein katak lider komunitáriu sira bele haree oinsá sira bele sai protagonista bá sira nia dezenvolvimentu lokál rasik, no oinsá sira bele uza indikadór sosial sira hodi define meta realístiku no mensurável bá melloria sósiu ekonómiku iha sira nia suku sira.
Fasilitadór sira semináriu nian mos bele fornese bá lider sira komunidade nian konsellu konkretu balu kona-ba oinsá atu atinje progresu lokál, hodi nune’e aselera prosesu dezenvolvimentu ita nia nasaun nian.
Koordenasaun projetu Sensus Fó Fila Fali nian
Sensus Fó Fila Fali sei koordenadu hosi Sekretariadu MDG nian no involve mos funsionáriu sira hosi Ministériu Finansas no Diresaun Nasional Estatístika, no sira ne’e hotu funsiona iha Diresaun Jerál Polítika, Análize no Peskiza (DJPAP) no Fundu Populasaun Nasoens Unidas (UNFPA) nia okos, nune’e mos liña ministerial sira seluk.
Desizaun atu realiza projetu Sensus Fó Fila Fali foti hosi Ministra Finansas no Primeiru Ministru. Planu projetu diseminasaun mos reflete sujestaun sira ne’ebé mak membru sira hosi Komisaun Téknika Sensus nian halo, ida ne’ebé kompostu hosi reprezentante sira hosi ministériu oioin, instituisaun estadu nian, ajénsia sira UN nian no NGO sira.
Sensus Fó Fila Fali finansiadu hamutuk hosi Governu Timor-Leste, Fundu Populasaun UN (UNFPA) ho UNICEF nian.