• ALFÂNDEGA IMPLEMENTA SISTEMA ASYCUDA WORLD

Home » Announcements » ALFÂNDEGA IMPLEMENTA SISTEMA ASYCUDA WORLD Print Page

ALFÂNDEGA IMPLEMENTA SISTEMA ASYCUDA WORLD

Picture1

Batugadé – Enkontru Ministériu Finansas liu husi Diresaun Alfândega hahú halo implementasaun ba Sistema Informátika Automated System for Custom Data (ASYCUDA) World iha Postu Integradu Batugedé ho objetivu atu fasilita importadores no exportadóres hodi nune’e bele la’o tuir sistema no prosedimentu ASYCUDA World (Segunda-feira, 28 Agostu 2017).

Sistema ASYCUDA World ne’e hanesan plataforma ida ba implementasaun janela únika elektrónika Timor-Leste no aprovasaun ba Sistema ASYCUDA World ne’e iha reuniaun Konsellu-Ministrus iha loron 20 Abril 2017 (Haré liu tan iha: http://www.tatoli.tl/2017/04/governu-aprova-sistema-asycuda-world/).

Tuir Diretór Geral Alfândega, José Antonio Fátima Abilio hateten, to ona tempu ba Timor-Leste liu husi Diresaun Geral Alfâdega atu bele upgrade sistema ASYCUDA++ ba Sistema ASYCUDA World hodi nune’e bele ajuda desalfandega lalais sasan importasaun no exportasaun no fasilita komérsiu. Ho Sistema ASYCUDA World ne’e sei bele ajuda Alfândega ho broker ou despaixantes sira atu bele hala’o servisu ho lalais no responsabilidade, ho hanoin ida katak liu husi Sistema ASYCUDA World bele atrai investores sira hodi mai hala’o investimentu, tanba ita hotu hatene katak ita nia nasaun foin maka hamri’ik presija dezenvolvimentu iha aréa ekonómia. Ho situasaun sira ne’e maka meius ka plataforma ida ne’ebé utiliza ne’e bele fasilta sasan transaksaun liu husi Sistema ASYCUDA World.

Hare’e ba prosedimentu legal husi jestaun finansas publíka nian katak, atu reseitas ne’e bele la’o ho diak tenki liu husi sistema ida para ita kontrolu mós ho diak. Ho situasaun sira ne’e maka esforsu ministériu nian atu investe hodi upgrade Sistema ASYCUDA++ ba ASYCUDA World, tanba volume importasaun no movimentasaun pasajeirus tinan ba tinan aumenta ba bei-beik iha Postu Integradu Batugade nian.

“Ho nune’e, to’o ona tempu para atu bele implemeta Sistema foun ne’e iha Postu Integradu Batugadé no fó ona responsabilidade ba broker ou despaixantes hanesan SDV, Timor Bro’s no Maritime Services Agent atu bele hala’o sira nia kna’ar. La signifika katak broker ka (despaixantes) sira ne’ebé hetan aprovasaun atu bele hala’o kna’ar ho liberdade tuir saida maka ita bo’ot sira hakarak de’it maibé, ita bo’ot sira mós hala’o kna’ar no regras sira ne’ebé Alfândegas estabelese tuir kódigu Aduaneiru Tuan N.0 11/2004”, no Kódigu Aduaneiru Foun DL Nᵒ. 14/2017 tenik Diretór Geral Alfândega, José Antonio.

Husu ba broker ou despaixante nain tolu (3) atu bele hala’o kna’ar ho responsabilidade tanba Alfândegas sei nafatin kontrola ita bo’ot sira nia servisu tanba bainhira imi hala’o kna’ar iha iregularidade maka Alfândegas sei suspende ka hasai lisensa para la bele halo operasaun. Tanba ne’e tenki hala’o kna’ar ho kuidadu buka minimiza erru sira bainhira hatama dokumentus iha sistema no ida ne’e akontese, automatikamente importadóres sira klaim ba Alfândegas maka Alfândegas sei husu ba broker ou despaixanters sira nia responsabilidade.

“Broker ou despaixantes hala’o funsaun Alfândegas nian balun atu nune’e, hodi evita Alfândegas sira halo kontáktu diréitamente ho importadóres ka exportadóres sira tamba bele hamusu risku. Tuir DL Nᵒ 15/2005 kona ba Estatutu Despaixantes sira nian iha regras no prosedimentu balun imi bele hala’o kna’ar Alfândegas nian ho responsabilidade tanba ita hotu servisu ba nasaun. Labele buka lukru ba kompañia de’it maibé, koko atu buka servisu ho professional no salva guarda leis sira nebé bigora no nasaun ida ne’e liu husi kódigu Aduaneiru hodi bele hatama mos reseitas ba nasaun”, hatutan José Antonio.

Diretor Geral ne’e husu ba broker ou despaixantes sira, atu bele servisu hamutuk ho funsiunariu Alfândegas sira iha postu integradu batugadé ne’e, wainhira iha difikuldades ka dúvidas rum abele konsulta ho Ofisiais Alfândegas ho nune’e, bele asegura sistema ne’e bele la’o ho diak, no idak-idak hala’o nia kna’ar tuir funsaun servisu ida-idak nian.