• Alfândega loke obrigatoriu kontentor 19 iha Portu Dili

Home » Announcements » Alfândega loke obrigatoriu kontentor 19 iha Portu Dili Print Page

Alfândega loke obrigatoriu kontentor 19 iha Portu Dili

Portu Dili, 14/07/2017, Diresaun Geral Alfândega liu husi Departamentu Operasaun loke obrigatoriu kontentor 19 ne’ebé oferese husi Xina ba Ministériu Agrikultura no Peskas.

Tuir chefi Departamentu Operasaun Alfândega, Sr. Julião José Ximenes hateten katak iha kontentor 19 ne’ebé oferese husi nasaun Xina no nain ba doasaun mak Ministériu Agrikultura no Peskas (MAP). Hare tuir ba regras no prosedimentu bazeia ba dekretu lei númeru 11/ 2004 iha artigo 63, wainhira kuandu nain abandona kontentores durante loron 90 automatikamente Alfândega sei loke obrigatoriu atu bele hatene saida maka iha kontentores ne’e nia laran.

“Por tantu ohin ita hotu hare katak iha kontetores 19 ne’ebe mak Alfândega loke, tanba kontentores sira ne’e hatama mai Portu Dili iha fulan Setembru 2016. Tama ba fulan 8 ona, husi Dirasaun Alfándega fó ona notifikasaun ka koñesimentu ba iha MAP dala rua ka dala tolu ona no ami rasik hasoru Diretor Nasional Hortikultura Extensionista nian maibe, la iha resposta ida to’o agora. Ho razaun hirak ne’e maka Alfândega hala’o tuir regras no prosedimentu tuir Alfândega ninian” tenik Julião José Ximenes.

Hatan ba prosedimentu ne’ebe iha, chefi departementu ne’e hateten, sasan sira ne’e hanesan ohin ita hare Alfândega loke ona sei rejista hotu no sei submete ba iha Ministériu Finansas no depois sei toma desizaun ikus. Kontentores sira ne’e sei iha responsabilidade Alfândegas ninian, por tantu mantein iha portu bazeia ba dokumentu ka manifestu ne’ebé maka iha. Sasan sira ne’e, mensiona hanesan ekipamentus ba iha Agrikultura ninian, konaba detailhu ba sasan sira ne’e Alfândega seidauk hetan deskrisaun detailhu.

Iha sorin seluk, nia subliña katak iha mós kontentor 1 hosi kompañia ida naran Timor South husi Xina maka halo doasaun ba Diresaun Geral Peskas ninian maibe, husi Peskas sira fó fila-fali karta notifikasaun ida ba Alfândega atu fó fila-fali ba kompañia nain. Maibé, tuir prosedimentu Alfândega katak nain ba kontentor sei halo relatoriu ba Ministériu Finansas hodi prosesa tuir regras no prosedimentus sira ne’ebé iha.

Tuir Chefi Departamentu Kaptura, Lisensiamentu Jestaun da Kualidade Peskas, Sr. Joni Freitas hateten, Diresaun Peskas iha mós nia kontentor 1 ne’ebé hatama husi Xina liu husi kompañia Timor South maibe, tamba kompañia ne’e hatama mai sein autorizasaun husi Ministériu nune’e maka Ministériu haruka notifikasaun ba Alfândega atu bele re-exporta. Maibé ita nia lei, labele re-exporta ho nune’e prosesa fila fali ba patrimóniu estadu.

“Iha kontentores laran nakonu ho ekipamentu Peskas ninian hanesan ró 2 no motór 9 no motor sira ne’e uluk deklara katak sira nia trabalhador maka atu uza no iha motór jonson 2 ho ró, maibé realidade iha kontentor laran la iha” informa Joni Freitas.

Diresaun Alfândega loke kontentor 19 ne’ebé nain maka Ministériu Agrikultura no Peskas no kontentor 1 nain mak Timor South husi Xina maka halo doasaun ba Dirasaun Geral Peskas ninian.

Kontentores hirak ne’e, agora daudaun iha hela Portu Dili no hetan kontrola husi parte Alfândega no hein hela prosesa tuir lei no regras Alfândega nian atu nune’e bele fila fali ba patrimóniu estadu.