• Alfândega sosializa prosedimentu aduaneiru ba importador lokal iha munisípiu Baucau

Home » Anúnsiu » Alfândega sosializa prosedimentu aduaneiru ba importador lokal iha munisípiu Baucau Imprime pájina

Alfândega sosializa prosedimentu aduaneiru ba importador lokal iha munisípiu Baucau

Dili, 18 Maiu 2015

 Alfândega sosializa prosedimentu aduaneiru ba importador lokal iha munisípiu Baucau

Reprezentante sira husi entidade públika diferente, maibe interlegadu ne’ebé kompostu husi Alfândega, Karantina, Polísia Imigrasaun, Polísia Fronteira no Polísia Marítima, foin lalais ne’e iha Kinta, 30 Abríl 2015, halo sosializasaun baimportador lokal sira iha munisípiu Baucau.

 Alfândega no parte interesadu sira seluk preokupa ho tendénsia iha tinan hirak ikus ne’e ne’ebé hatudu aumentu iha importasaun husi importador sira ne’ebé hela iha munisípiu Baucau. Importasaun hirak ne’e halo liu husi via tereste Batugade no via marítima portu Waiaka. Iha Portu Waiaka, importador sira sosa aii, mina, ikan no sasan importadu sira seluk husi illa vizina sira hanesan Wetar, Alor no Kisar no tula mai rai-laran ho roo tradisional. Nune’e falta koñesimentu no kompriensaun husi importador sira konaba lei, regra no regulamentu sira ne’ebé iha bele foo ameasa ba ita-nia nasaun.

 Tuir Sr. Julio Ximenes, Direitor Nasional Alfândega, objetivu prinsipál husi enkontru ida ne’e maka “atu fahe informasaun ba importador lokal sira konaba prosedimentu aduaneiru, karantina, no imigrasaun no papél husi parte siguransa ein relasaun ho importasaun sasan tama mai rai-laran”.

 Enkontru ida ne’e foo oportunidade ba entidade relevante sira ne’e idak-idak hodi aprezenta no fahe informasaun ba importador lokal sira konaba sira nia papél no responsabilidade, lei, regra no regulamentu sira ne’ebé regula konaba importasaun sasán mai iha rai-laran. Alfândega, ein partikular, foka ninia aprezentasaun ba liu iha prosedimentu aduaneiru, prosedimentu selu taxa, lei tributária, penalidade no regulamentu importasaun kareta.

 Partisipante sira “kontente ho informasaun ne’ebé sira hetan” hodi nune’e tulun sira atu halo “importasaun tuir lei, regras no regulamentu ne’ebé iha” no “evita hatama sasán sira ne’ebé foo perigu ba nasaun”. Aleim de ne’e, sira moos preokupa no sujere ba Governu atu tau matan no investe ba portu Cairabela no aeroportu Lanud Baucau ne’ebe abandonadu hela.

 Too iha  programa ida ne’e nia rohan, Sr. Julio sujere ba negosiante no importador lokal sira atu “organiza sira-aan hodi sai parseiru ba Governu” iha prosesu dezenvolvimentu nasional.