• Asycuda World Project Steering Committee (PSC) Halao Enkontru ba Dahituk

Home » Anúnsiu » Asycuda World Project Steering Committee (PSC) Halao Enkontru ba Dahituk Imprime pájina

Asycuda World Project Steering Committee (PSC) Halao Enkontru ba Dahituk

IMG_3630

Ministériu Finansas liuhosi Autoridade Aduaneira Timor-Leste (AA) no reprezentante hosi Konferênsia Nações Unidas ba Komérsiu no Dezenvolvimentu (United Nations Conference of Trade and Development – UNCTAD) organiza enkontru Komite Diretiva Projetu ASYCUDA World ka ASYCUDA World Project Steering Committee (PSC) ba dahituk (7º) iha loron 24 Janeiru 2019. Enkontru ne’e realiza iha sala reuniaun pizo 10, Torre Ministeriu Finansas, Aitarak Laran.

Enkontru Komite Diretiva Projetu nu’udar enkontru regularmente kada fulan tolu, hodi halo akompanhamentu ba progressu hosi implementasaun ba polítika no planu sira ne’ebé trasa tiha ona, bazeia ba akordu entre Governu Timor-Leste liuhosi Ministeriu Finansas ho UNCTAD, ne’ebé asina iha Jullu 2014 hodi “Hametin Prosesu Dezalfandegamentu Automatizadu no Destakamentu Sistema ASYCUDA World (AW)” iha servisus sentrais, rejionais no postus sira iha fronteira.

Tranche dahuluk ba projetu ne’e selu ba UNCTAD iha Outubru 2014 no aktividade projetu nian hahú iha Janeiru 2015 ne’ebé regista progressu lubuk ida no mudansa bo’ot ba servisus Autoridade Aduaneira inklui mudansa iha kuadru legal sira, procedimentus no implementasaun sistema ASYCUDA World ne’ebé tuir planu sei halo esforsu atu kompleta iha tinan 2019 utilizasaun/extensaun hosi sistema AW refere ba iha sede Autoridade Aduoneira iha Baucau, Maliana, Postais, Aeroportu Internasional Kayrala Xanana Suai, Atauru no possibilidade extende mos ba Oe-Cusse.

Reuniaun Komite prezide husi Ministra Finansas Interina nu’udar Xefe Komite, no hetan prezensa hosi Diretór Jerál Autoridade Aduaneira nu’udar Diretór Projetu, Kordenadóra UNCTAD nu’udar membru, Dirijentes no oficiais sira seluk ne’ebé fó apoio ba projetu refere.

Durante enkontru dahitu ne’e, Diretor Geral Autoridade Aduaneira no Kordenadóra husi UNCTAD ASYCUDA Programme halo apresentazaun sobre susesu husi rezultadu servisu sira alkansa tiha-ona no nafatin kontinua tau iha ajenda implementasaun ba planu sira ne’ebé sei implementa hela no previstu atu konklui iha fim de 2019.

Alem-de ne Kordenadóra UNCTAD iha ninia intervensaun subliña mos katak maski sei iha dezafiu ba automatizasaun kompletu inklui falta infraestrutura mínimu no seluk, esforsu sira halo nafatin hodi hatán ba dezafiu hirak ne’e. Nia subliña liután importánsia husi governu-nia apoiu nafatin ba projetu ne’e hodi bele tután alkansu no susesu sira ne’ebé projetu ne’e halo daudaun, no hodi fó biban ba projetu atu kompleta aktividade sira ne’ebé planeia ona ba 2019, ne’ebé inklui destakamentu sistema ne’e iha Autoridade Aduaneira nia edifisiu sira seluk, kontinua empoe regras atu halo melhoramentu servicos aduoneiro ho integridade, inklui formasaun ba oficiais AA no despaxantes sira.

Susesu balun ne’ebé merese atu temi iha ne’e inklui destakamentu ho susesu dispositivo POS iha Edifisiu Autoridade Aduaneira balu hodi fasilita pagamentu direitu no impostu aduaneira ho meiu elektróniku, kalkulasaun impostu no multa automátiku husi sistema no notifikasaun automátiku liuhusi email dirizi ba importadór no deklarante sira wainhira DAU ida rejistu ona iha sistema no wainhira sistema emite ona resibu pagamentu direitu & impostu aduaneira ba sasán importadu sira.

Utilizasaun sistema AW ne’e halo prosesu dezalfandegamentu sai simplíz liu tanba reduz tempu ne’ebe gasta ba prosesamentu no hasae volume hosi 6.48% iha 2015 ba 53.45% iha 2018 ba DAU sira ne’ebé maka konfere no selu ona iha loron ida de’it nia laran. Sistema ne’e mós tulun Autoridade Aduaneira atu alkansa projetu ne’e ninia objetivu bo’ot ida maka ambiente dezalfandegamentu lahó/sein surat tahan (Paperless). Dezde introdusaun sistema ne’e, importadór no despaxante sira la presija ona hatama kópia dokumentus hanesan Certidão Dividas, Certificado Registo Comercial no seluk ba Autoridade Aduaneira hodi prosesa.

Vice-Ministra iha ninia intervensaun haksolok tebes ho progresu no susesu sira ne’ebé projetu ne’e alkansa no aprecia mos kordenasaun no servisu ho espiritu hanesan ekipa ne’ebé entre Jestores Ministériu Finansas, Autoridade Aduaneira no ekipa tekniku hosi UNCTAD servisu hamutuk hodi bele alkansa projetu nia meta no objetivu sira. Sistema ASYCUDA World sei sai hanesan plataforma ba projectus sira seluk ne’ebé Governu hakarak implementa iha futuru hanesan projetu Janela Unika (SW) tantu ba nivel nasional nomos internasional.

Enkontru Komite Diretiva Projetu ASYCUDA World ka ASYCUDA World Project Steering Committee (PSC) tuir fali previstu ona atu realiza iha fulan Abril 2019.

Ba informasaun kle’an liu kona-ba projetu ne’e, favór kontaktu Sr. Mario Pinheiro ho númeru 7708 3517 ka liuhusi email mfcpinheiro@mof.gov.tl