• Autoridade Aduáneira Ofisialmente Ensera Formasaun ASYCUDA World Faze Daruak

Home » Anúnsiu » Autoridade Aduáneira Ofisialmente Ensera Formasaun ASYCUDA World Faze Daruak Imprime pájina

Autoridade Aduáneira Ofisialmente Ensera Formasaun ASYCUDA World Faze Daruak

20191018_Autoridade Aduáneira Ofisialmente Ensera formasaun ASYCUDA World faze daruak 1

Ekipa Diresaun Nasionál Transporte no Terrestre (DNTT) hosi Ministériu Transporte no Komunikasaun tuir ona formasaun faze dahuluk kona-ba aplikasaun plataforma janela unika (single window) ne’ebé oferese hosi Autoridade Aduáneira (AA) liuhosi projeitu ASYCUDA World. Formasaun loron 4 ne’ebé hala’o iha auditóriu Autoridade Aduáneira eis edifísiu Ministériu Finansas, Palasiu Governu, ofisialmente ohin loron 18 Outubru 2019 tama iha faze ikus.

Diretór Interinu Autoridade Aduáneira Francisco Goncalves iha sesaun enseramentu ba partisipantes sira subliña importansia hosi formasaun ne’e nu’udar jestu hodi fasilita funsionáriu DNTT sira atu iha kbiit no koñesimentu wainhira utiliza sistema ASYCUDA World.

“Sistema ASYCUDA World bele ajuda hado’ok an hosi korupsaun, fraude fiskál, atu nune’e labele prezudika ba ekonómia nasionál” hateten Diretór Interinu Autoridade Aduáneira.

Formasaun faze dahuluk ba pesoál Diresaun Nasionál Transporte no Terrestre, nu’udar parte hosi polítika Governu nian ne’ebé identifika DNTT mos sai instituisaun Governu ne’ebé mak inklui iha projeitu Single Window. Aplikasaun projeitu ne’e bazeia ba rezolusaun governu No 24/2017 ne’ebé hateten katak, aplika sistema ASYCUDA World nu’udar plataforma janela únika Timor-Leste nian.

Antes ne’e AA mos oferese formasaun ho tipu hanesan ba ekipa Quarantina hosi Ministériu Agrikultura no Peskas. Iha etapa tuir mai, AA sei kuntinua kapasita pesoál sira hosi Ministériu Turismu Komersiu no Industria, Ministériu Sáude no ajensia governu sira seluk molok implementa projeitu single window iha tinan 2020.