• Autoridade Aduaneira Realiza Natál Hamutuk

Home » Anúncios » Autoridade Aduaneira Realiza Natál Hamutuk Imprimir a página

Autoridade Aduaneira Realiza Natál Hamutuk

20171229_Autoridade Aduaneira Realiza Natál Hamotuk-DGA

Autoridade Aduaneira hosi Postu Integradu Batugede no Salele realiza Natal hamutuk ho liña Ministériu sira ne’ebé hala’o serbisu iha Postu Integradu Batugede loron 22/12/2017. Objetivu festeza ne’e kooperasaun serbisu diak ne’ebé durante hala’o iha tinan 2017 nian hodi prepara ba tinan 2018.

Tuir Diretór Jerál Interinu Autoridade Aduaneira Julião José Ximenes hateten, seremónia ida ne’e simples tanba atu festeza deit liña komunikasaun no kooperasaun serbisu iha postu integradu rua ne’ebé durante ne’e koopera diak tebes. Maske iha dezafius balun ne’ebé maka iha maibé, tanba ho ita hotu nia preokupasaun fiar katak dezafius sira ne’e sei bele rezolve. Progresu ne’ebé ita halo la’os ba instituisaun ida deit, maibé ba misaun ida ne’ebé maka estadu fó ba ita hodi hala’o serbisu iha fronteira. Misaun ida ne’e importante teb-tebes maske nasaun rua entre Timor-Leste ho Indonesia katak ita nia servisu koordenasaun diak teb-tebes iha fronteira hodi fo atendimentu ba públiku.

“Serbisu hirak ne’ebé maka ita hala’o iha postu integradu ida ne’e la’os Autoridade Aduaneira ninian mesak maibé instituisaun sira ne’ebé maka iha liña koordenasaun sira hotu ninian, maske ita iha kna’ar keta-ketak ninia objetivu maka serbisu ba nasaun Timor-Leste”.

Iha sorin seluk Diretór Jerál Servisu Migrasaun (DGSM) Boavida Ribeiro hateten, estadu Timor-Leste harii postu integradu, atu bele serbi rai ida ne’e liuhosi kontrolu movimentu migratóriu no merkadória sira. Ida ne’e, atu hateten katak, estadu tau importansia ba ninia lala’ok kontrolu no seguransa atu bele tau mós nia ema sira hodi bele hamosu liafuan ida Postu Integradu.

“Entidades hotu-hotu ne’ebé maka hala’o nia funsaun iha fronteira iha uma no mahon ida deit, oinsa bele partilla servisu hamutuk no fahe serbisu ba malu ho entendimentu ida ne’ebé diak” deklara Diretor Jeral DGSM.

Tuir reprezentante Kepala Badan Pengelola perbatasan/ Batas Lintas Negara (PBLN) Mota-Ain, Piolan Huta Galun hateten, agradese tebes ba konvite hosi Timor-Leste. Espera katak bele kria amizade entre nasaun rua ne’ebé mak durante ne’e la’o diak tebes. Ho prezensa PBLN hanesan jestór ba liña fronteira bele hasa’e diak liutan relasaun servisu Timor-Leste no Indonesia iha liña fronteira.

“Ami hanesan jestór ba Batas Lintas Negara espera katak maluk sira hosi Timor-Leste karik iha asuntu ruma atu hato’o bele komunika ho ami no asuntu saida deit maka hato’o relasiona ho serbisu maka ami sei hato’o ba reprezentante ami nian iha Jakarta”. haklean Piolan Huta.

Sermónia ne’e hetan partisipasaun másimu hosi reprezentante Pemerintah Batas Lintas Negara (PBLN), Ministériu Planu no Finansas, UPF-PNTL (Unidade Polisia Fronteira – Polisia Nasional Timor-Leste), Serbisu Imigrasaun no Autoridade lokal entre nasaun rua nian no komunidade sira ne’ebé maka hela besik iha fronteira Batugede.