• Autoridade Aduaneira Prende Sasan Ilegál

Home » Anúnsiu » Autoridade Aduaneira Prende Sasan Ilegál Imprime pájina

Autoridade Aduaneira Prende Sasan Ilegál

Ministériu Finansas liuhosi Dirasaun Jerál Autoridade Aduaneira hamutuk ho ekipa konzuntu nebé lidera husi Diresaun Nasional Jestaun Risku hamutuk ho Polícia Militar (MP) hala’o operasaun konzunta hodi prende sasan ilegál iha Ró-Rua no kaptura mos pessoal Indonesia nain 5 iha loron 23/08/2018.

Kapturasaun ne’e akontese iha 23 Agusto 2018 madrugada iha área tasi ibun Atabae, Munisipiu Bobonaro. Operasaun konzunta ne’e konsege kaer Ro-Rua ne’ebé lori sasan ilegal hanesan Mina, Kompresor-1, kompletu ho ekipamentu ofisina ninian inklui mós sidadaun Indonesia nain 5 ne’ebé la iha dokumentus.

“Operasaun konzunta nu’udar meiús ida atu hodi kombate aktividades ilegais sira maibé, importante liu oinsá ita atu kombate ou hakotu network (rede) sira ne’ebé mak existe hodi halao hela aktividades ilegais hirak ne’e. Atu kombate aktividades ilegais hirak presiza Instituisaun Estadu hotu-hotu nebé mak servisus iha areas fronteirisas tenki servisu hamutuk liu husi kordenasaun no koperasaun ho haré ba objetivu komun oinsá mak kombate aktividades ilegais sira inklui mos envolvimentu parte ekipa hosi Timor-Leste no Indonesia. Liu husi kapturasaun ba sidadaun estrangeiru ne’e, ita espera katak resultadu liuhosi prosesu investigasaun ita bele hatene se deit maka involve iha aktividades ilegal durante ne’e akontese”, infoma Diretór Gerál Autoridade Aduaneira José António Fátima Abílio.

Atu prevene inflitrasaun liu liu ba sidadaun Indonesia mai Timor Leste, presiza iha linha koordenasaun ho parte ekipa Indonesia nian , tanba sidadaun Indonesia balun ne’ebé mai la ho dukumentus ne’ebé la iha kunhesementu hosi parte Indonesia rasik.

“Tanba ne’e maka hau desidi lori kazu ida ne’e inklui merkadorias no sidadaun estrangeiru mai prosesa deit iha Dili atu nune’e, informasaun bele to’o Kedutaan Besar Republik Indonesia (KBRI) iha Timor-Leste no Ministériu Negosiu Estranjeiru, ho nune’e hodi bele buka mekanismu oinsa atu bele rezolve atividades merkadoria ilegais hirak ne’e.” deklara Diretór Gerál Autoridade Aduaneira.
Refere ba operasaun konzunta ne’e, Timor Leste no Indonesia presija atu fortifika liu servisus inteligensia no operasionais iha linha fronteiras hodi kombate rede ilegais hirak ne’ebé existe durante ne’e hodi halao operasaun ilegal iha fronteira entre Timor Leste no Indonesia.

Sasan hirak ne’e entrega ona ba Servisus Nasional Investigasaun hodi aprofunda investigasaun no prosesa tuir lei ne’ebé vigor iha Timor Leste.