• Autoridade Aduaneira no PCIC koopera hodi prevene fraude no evazaun fiskál

Home » Anúnsiu » Autoridade Aduaneira no PCIC koopera hodi prevene fraude no evazaun fiskál Imprime pájina

Autoridade Aduaneira no PCIC koopera hodi prevene fraude no evazaun fiskál

Díli, 12 Dezembru, 2018 – Autoridade Aduaneira no Polísia Sientífika Investigasaun Kriminal / PCIC ohin asina Protokolu ida atu koopera kona-ba troka informasaun hodi prevene no investiga infrasaun penal alfandegáriu, kombate fraude no investiga prátika ilegal sira.

Protokolu kooperasaun hanesan esforsu ida atu implementa objetivu reforma fiskál no asegura katak kobransa reseita tuir duni lejislasaun no prosedimentu hirak ne’ebe aplikavel, liuliu, Kódigu Aduaneiru no Lei Tributaria 2008. Kooperasaun ida ne’e tuir duni rekizitu Organizasaun Mundial Aduaneira nian ba organizasaun aduaneira ida ne’ebé modernu, transparente no bazeia ba regra hirak ne’ebe proporsiona seguransa jurídika, fasilita komérsiu no kobra reseitas ba Estadu.

Primeiru Ministru, Sr. Taur Matan Ruak hatete katak: “Ida ne’e hanesan prioridade importante ida ba Governu Timor-Leste atu kria ambiente nesesáriu hodi atrai investimentu estranjeiru no promove komérsiu, permite diversifikasaun ekonomia no hadi’a kobransa reseitas. Nune’e, Protokoul ida ne’e maka ferramenta importante ida ba governasaun di’ak, evita lakon/avazamentu reseita no evazaun fiskál”.

Protokolu ida ne’e sei apoia Autoridade Aduaneira atu implementa padraun administrasaun di’ak, liu husi uza prinsípius hanesan legalidade, transparensia, partisipasaun, responsabilidade, efisiensia, efikasia no konsistensia.

###

Atu hetan tan informasaun, favor kontakta: Cecilia Tilman Gonçalves, Komisaun Reforma Fiskal,
iha +670 7727 6436, ctgoncalves@mof.gov.tl