• Diresaun Geral Estatístika (DGE) fó Treinamentu Sistema Informasaun Geografia ba AIFAESA

Home » Announcements » Diresaun Geral Estatístika (DGE) fó Treinamentu Sistema Informasaun Geografia ba AIFAESA Print Page

Diresaun Geral Estatístika (DGE) fó Treinamentu Sistema Informasaun Geografia ba AIFAESA

Dirasaun Geral Estatistika (DGE) liu husi Diresaun Nasional Kartografia Estatístika fó apoiu Treinamentu konaba Programa Sistema Informasaun Geografia (Geography Information System -GIS) ba ekipa Autoridade Inspeksaun Fiskalizasaun Atividade Ekonómia Sanitasaun no Alimentar (AIFAESA) iha Fatin Salaun Treinamentu Estatistika, Segunda-Feira, 31 de Julho de 2017.

Objetivu husi treinamentu ne’e mak atu fó koñesimentu ba utilizador sira liu-liu ba ekipa AIFAESA hodi bele hala’o sira nia servisu ne’ebé ligadu ho utilizasaun Mapamentu ka Geography Information System (GIS) ninian.

Tuir Diretor Interino Diresaun Geral Estatístika (DGE), Silvino Lopes hatete, Diresaun Geral Estatístika konkorda tebes ho treinamentu ida ne’e, hodi bele nafatin fó apoiu tékniku espesífiku ba partisipante sira, liu husi espesialista sira ne’ebé durante servisu iha mapamentu estatístika nian, ne’be mak relasiona ho treinamentu mapamentu ida ne’e ka ita bolu ho naran Geography Information System (GIS) ho nune’e bele utiliza hodi desimina informasaun liu-liu relasiona ho AIFAESA servisu rasik.

Portantu AIFAESA ne’e nia servisu rasik mak hala’o atividade hanesan operasaun tama loja sai loja hodi hare konaba produtu sira ne’ebé mak liu prazu ona (expira) no dala ruma liga mós ho lisensa komersiu nian.

Tanba ne’e tuir Abrão Guterres hanesan Responsavel Treinamentu Sesaun Formasaun (AIFAESA) nian hateten, liu husi treinamentu Geography Information System (GIS) ida ne’e bele fasilita ami hodi bele halo estabelesimentu komersiu nian, ho nune’e wainhira ami halo ispeksaun ba loja ruma karik, ami nia inspektor sira bele hatene rute husi inspeksaun ne’e rasik, katak loja ne’e lokaliza iha ne’ebé, loja ne’e naran sá no loja ne’e nain maka sé.

Hanesan partisipante ba treinamentu ne’ebe hala’o durante loron 3, Abrão hato’o mos sentimentu orgulhu tebes ba DGE tamba bele ajuda ekipa AIFAESA hodi fó treinamentu konaba Geography Information System (GIS) no espera katak ba oin sei aumenta liu tan.

Iha treinamentu ne’e rasik hetan partisipasaun husi funsiunariu Autoridade AIFAESA nian hamutuk ema nain 9.