- Diresaun Jerál Estatístika Lansa IPK Series III Fulan Setembru 2018
Home » Anúnsiu » Diresaun Jerál Estatístika Lansa IPK Series III Fulan Setembru 2018 Imprime pájina
Diresaun Jerál Estatístika Lansa IPK Series III Fulan Setembru 2018
Ministériu Finansas liuhosi Diresaun Jerál Estatístika (DJE) Lansa Indise Presu Konsumedóres (IPK) Series III Fulan Setembru 2018 ne’ebé hatudu rezultadu inflasaun 0.1 kompara ho Fulan Agustu iha deflasaun -0.2. Lansamentu refere realiza iha salaun enkontru DJE,Cai – Coli, 23 Outobru 2018.
Diresaun Jerál Estatístika normalmente iha kada fulan hala’o lansamentu ba Indise Presu Konsumedóres iha merkadoria. Lansamentu IPK ba fulan Setembru 2018 uza ona todan foun (reweit) Series III ba peskiza ne’ebé hala’o iha 2014 no 2015 kona-ba Timor-Leste living standard survey. Purtantu Series I uza peskiza ba nivel moris Timor-Leste iha 2001 no Series II uza ba peskiza rendimentu uma kain 2011.
“Lansamentu ne’e uza ona series III, hodi halo mudansa ba nia reweit ka basket. Tanba ita hotu hatene katak ita tenke utiliza presu aktual, ita labele uza 2011 no 2001. Purtantu presu aktual maka 2014 no 2015 iha ne’ebá iha item mil resin liu-liu liga ho hahan”, hateten Diretór Jerál Estatístika Elias dos Santos Ferreira.
Dadus Reweit III ba fulan Setembru 2018 iha inflasaun 0.1, kompara ho fulan Augustu 2018 iha deflasaun -0.2 mai hosi presu folin foos ne’ebé sa’e uitoan inklui modotahan, lis no na’an. Tanba sasan sira ne’ebé maka konsumu iha rai laran kuaze mai hosi rai liur, nune’e mos tanba produsaun rai laran menus.
Elias dos Santos Ferreira hateten liu tan katak “Atu hamenus importasaun sasan hosi rai liur, Governu tenke iha polítika ida diak hodi aumenta ita nia produsaun. Se produsaun rai laran maka barak ona hau hanoin ita labele depende ba importasaun, maske sei lori tempu e la’os ohin kedan”.
Dirasaun Jerál Estatisika nia responsabilidade maka koleta dadus, analiza no públika. Depois dadus relevante sei fó ba ministériu relevantes hodi halo polítika ida diak ba futuru.