• Diskursu Ministru Planu no Finansas, Rui. A Gomes, Iha Okaziaun Audensia ho Komisaun C Konaba Alterasaun Dahuluk Lei OJE 2017.

Home » Announcements » Diskursu Ministru Planu no Finansas, Rui. A Gomes, Iha Okaziaun Audensia ho Komisaun C Konaba Alterasaun Dahuluk Lei OJE 2017. Print Page

Diskursu Ministru Planu no Finansas, Rui. A Gomes, Iha Okaziaun Audensia ho Komisaun C Konaba Alterasaun Dahuluk Lei OJE 2017.

DISKURSU MINISTRU PLANU NO FINANSAS, RUI. A GOMES, IHA OKAZIAUN AUDIENSIA HO KOMISAUN C KONABA ALTERASAUN DAHULUK LEI OJE 2017

LIAFUAN INTRODUSAUN HUSI MINISTRU PLANU NO FINANSAS IHA OKAZIAUN AUDIENSIA HO KOMISAUN C KONABA ALTERASAUN DAHULUK LEI OJE 2017

Dili, 11 dezembru 2017

Senhora Presidente da Comissão C das Finanças Publicas,
Senhores Membros da Comissão C,
Distintos Deputados,
Caros Colegas do Ministério do Plano e Finanças,

Agradese ba konvite.

Denominador mínimo ba kualker entendimentu mak nesesidade atu garante nafatin normal funcionamento do Estado, liuliu konaba provizaun bens públicos, halao transferensias ba famílias sira no prestasaun servisus ne’ebe esensiais ba funsionamentu ekonomia nasaun nian. VII Governu Konstitusional ida ne’e mos iha obrigasaun atu garante ezekusaun, sem interrupção ka abrandamento iha ninia ritmu, projetu sira ne’ebe importante tebes ba país ida ne’e.

Ho propózitu ida ne’e dunik maka VII Governu Konstitusional submete ona ba Uma Fukun Parlamentar ida ne’e proposta Orsamentu Retifikativu, ne’ebe fo resposta, de forma responsával, ba komunidade polítika país ida ne’e nian iha momento kritiku konstrusaun Estadu.

Husi perspetiva VII Governu Konstitusional, nu’udar rezultadu eleisoes foin daudaun ne’e, aprezentasaun Orsamentu Retifikativu ne’e sai hanesan nesesidade ida ke incontornável. Lei rasik mos impoe obrigasaun iha Ezekutivu nian kbaz atu aprezenta Orsamentu Retifikativu wainhira sirkunstansias justifika atu halo.

Hafoin tomada de posse fulan rua resin liu ba, atual Governu hasoru situasoes oioin ne’ebe disponibilidades orçamentais existentes la permite Estadu efetua pagamentus ba kompromisus sira ne’ebe governasaun anterior asumi tiha ona, ka atu realiza despezas sira ne’ebe absolutamente necessárias atu garante kontinuidade servisus esensiais ba funsionamentu ekonomia no prestasaun servisus ba sidadaun sira. Iha mos pagamentus retroativus salárius, dívidas ba servisus ne’ebe Estadu ne’e simu tiha ona, hanesan evakuasoes médikas no dívidas ho emprezariu sira.

Situasaun ilikida Estadu laos deit kompromete o bom funcionamento do Estado, maibe mos afeta negativamente moris sidadaun sira nian no mos komplika situasaun empresa sira, prejudika boa execução de importantes projetus no, finalmente, koloka em kauza a própria credibilidade do Estado.

Iha Ministériu Planu no Finansas, ami halo ezersisiu lubun ida bazeia ba senariu rua. Iha senariu primeiru, ami tenta halo realokasaun (ka poupansa) ho presupostu katak ezekusaun 90%, no ezersisiu ne’e rezulta poupansa millaun 39 dolar amerikanu; maibe tanba tempu badak, Ministériu Planu no Finansas la konsegue hetan reasaun pozitivu husi liñas ministeriais sira.

Nune’e, Ministériu Planu no Finansas hili senariu segundu, katak liñas ministeriais sira kontinua utiliza sira nia osan ne’ebe alokadu tiha ona no buka rasionaliza gastus iha Fundu Infraestrutura. Enkuantu ezersisiu ne’e lao hela, liñas ministeriais sira aprezenta fali propostas oioin ne’ebe implika akresimu iha orsamentu orijinal. Tenta mos halo ezersisiu liu husi virement, maibe items balun ultrapassa tiha ona 20%.

Iha situasaun ida agora dadaun, limite 20% tansferensia orsamental barak mak kumpri ona no iha nafatin insufisiesia orsamentu iha nivel kategoria sira hodi finansia despeza sira ne’ebe kompromete ona. Relasiona ho asuntu ida ne’e, Ministru Planu no Finansas iha deit kompetensia autoriza tuir limite ne’ebe lei estabelese no labele ultrapasa limite ne’ebe lei ne’e detemina ona.

Atu ilustra deit, to’o iha loron 15 fulan novembru, ejiste balansu orsamental hamutuk millaun $249 (ohin iha deit millaun $216). Husi montante ida ne’e, millaun $86 (ohin iha deit millaun $37) mak bele halo virement (husi kategoria Bens & Serviços, Transferências Públicas no Capital Menor). Maibe, Ministeriu sira lakonsegue halo ona virement tanba barak mak ultrapasa ona ka besik barreira 20%.

Husi Fundu Rezerva Kontinjensia ne’ebe sentraliza iha Dotações para Todo Governo, ne’ebe Ministeriu Planu no Finansas iha responsabilidade atu jere, ho montante alokadu millaun $8,5 agora daudaun hela deit rihun $937 hafoin millaun $7,6 aloka ba atividades lubun ida bazeia ba autorizasaun S.E. Senhor Primeiru-Ministru.

Liu tan ida ne’e, ho organika ne’ebe VII Governu Konstitusional ida ne’e adopta, ezije ajustamentus iha klasifikasaun organika despezas sira nian, no ida ne’e tenke liu dunik husi aprovasaun parte lejislativa nian. Orsamentu retifikativu laos foin mak ita halo; iha tinan 2015 mos Governu liu ba aprezenta Orsamentu Retifikativu maski situasaun ladun gravosa.

Hakarak subliña dala ida tan katak, Orsamentu Retifikativu ida ne’e atu regulariza situasoes sira ne’ebe mai husi governasaun anterior no mos tanba alterasaun iha estrutura organika VII Governu nian. Alterasaun ne’e reker autorizasaun husi órgão legislativo.

Proposta Orsamentu Retifikativu prevê aumentu millaun $223 dolar amerikanu, nune’e total despezas sa’e husi $1.386,8 millaun husi orsamentu orijinal ba $1.609,8 millaun, ka akresimu 16%.

Akresimu ida ne’e implika levantamentu husi Fundu Minarai sei to’o millaun 820,2 dolar amerikanu. Rekursu ba Fundu Minarai ladun altera situasaun likida Estadu nian, maski iha impaktu balun em termos kapital Fundu nian, maibe ita konsegue taka tusan ne’ebe iha atu nune’e iha tinan 2018 bele hahú implementa programas sira ho menos preocupações.

Ho evolusaun presu minarai no retornu investimentu iha asoes, ita bele dehan katak tinan 2017 reseitas ba Fundu di’ak. Atu ilustra deit, tuir projesaun iha OJE 2017, reseitas minarai hamutuk millaun $263. Iha fulan setembru liu ba, reseitas sira ne’e sa’e ona ba millaun $327 no to’o final tinanida ne’e previzaun hatudu bele hetan millaun $389. Nune’e, ho presu minarai hahú sa’e, no ho retornu investimentu to’o 3,9%, ita hein reseitas total iha tinan 2017 bele liu $1.500 millaun.

Konkluzaun, esforsu halo dunik atu hetan poupansas ka rasionalizasaun orsamental maibe la konsegue nafatin solusiona situasoes ejistentes iha kuadru orsamentu ne’ebe em vigor hela. Solusaun mak tenke liu dunik husi Orsamentu Retifikativu, ne’ebe laos deit pratika di’ak ida iha jestaun orsamental, maibe mos obrigasaun ida tuir lei.

Kondisionantes ne’ebe ejiste atualmente ne’e mak ami fiar katak submissaun Orsamentu Retifikativu ba eskrutiniu Parlamentu Nasional no nia aprovasaun bele fo resposta ba situasoes sira país ne’e hasoru daudaun, ho hanoin ida atu garante o bem comum.

Iha proposta Orsamentu Retifikativu ne’e, la prevê alterasaun ruma iha Fundu Dezenvolvimentu Kapital Umanu, reseitas não-petrolíferas, dívida pública, no parserias públiku-privadu.

Atu remata, permite hatoo preokupasaun ida ne’ebe bele tau em cauza dezempeñu ekonomia não-petrolífera haree ba importansia papel Estadu liu husi despezas públikas. Informasaun ikus hatudu katak ita nian produtu internu brutu hetan kontrasaun signifikativu no bele lori ita nian ekonomia posivelmente tama iha resesaun ho kresimentu negativu.

Nune’e, ho laran haraik an, ha’u solisita Membrus tomak Komisaun C atu apoiu Orsamentu Retifikativu ida ne’e, maski difisil tebes atu ezekuta tanba kestaun tempu, ne’ebe ha’u fiar komesu di’ak ida iha inísiu IV Legislatura ida ne’e.

Tékniku sira prontu ona atu klarifika karik iha pergunta ruma husi Distintus Deputadus sira.

Obrigadu wa’in ba ita boot sira nian atensaun!

Rui A. Gomes
Ministru