• DJE Lansa Relatóriu Monografia Temátiku Lima

Home » Anúnsiu » DJE Lansa Relatóriu Monografia Temátiku Lima Imprime pájina

DJE Lansa Relatóriu Monografia Temátiku Lima

Ministériu Finansas liuhosi Diresaun Jerál Estatístika, lansa relatóriu monografía temátiku lima mak hanesan, Mortalidade, Fertilidade, Kazamentu, Juventude, Jéneru no Operational Data Store (ODS) nian. Ho objetivu atu fasilita Governu bele halo programa ho diak, lansamentu refere realiza iha Salaun Enkontru Estatistika Kaikoli, ohin, 26 Julhu 2018.

Tuir Diretór Jerál Estatístika, Elias dos Santos Ferreira katak, ohin Diresaun Jerál Estatístika (DJE) halo lansamentu temátiku lima mak hanesan Mortalidade, Fertilidade, Kazamentu, Juventude, Jéneru no Operational Data Store (ODS). Dadus sira ne’e hanesan dadus kontinuasaun hosi relatóriu sensus populasaun no uma kain 2015 nian. Ohin lansa tan relatório temátiku lima hodi finaliza ona relatóriu tematikus 12. Tanba relatoriu kona-ba edukasaun nian ita lansa ona iha VII Governu Konstitusionál. Ita mós sei iha relatóriu prozeksaun populasaun 2015 nian atu nune’e ita bele prozeta populasaun entre 2015 to’o 2030.

“Ita mós iha relatóriu temátiku kona-ba agrikultura, hosi ne’e ita hakarak hatene liu dadus agrikultura ne’ebé maka ita husu iha sensus 2015 nian. Atu nune’e dadus refere ita bele públika tuir kada munisipius sira, atu hatene kona-ba ema hakiak animal hira, halo natar hira no nia produsaun hira. Nune’e mós dadus refere importante ba ita nia polítiku nain sira atu bele utliza hodi halo planu ne’ebé diak” tenik Diretór DJE, Elias dos Santos Ferreira.

Hosi dadus fertilidade iha tinan 2004 ita iha 7.6%, iha sensus 2015 hatudu mai ita katak iha 4.5% no se ita liga Peskiza Demografia Saúde 2016 ita iha diferensia desimal ituan deit 4.2%. Purtantu ida ne’e hanesan país ida nia fertilidade ne’e tun drastis. Ida ne’e hatudu dadus ida ke diak tanba informasaun kona-ba saúde ne’ebé diak no ema balun lakohi iha oan barak tanba ema hotu-hotu preokupa ho estuda no servisu.

Iha sorin seluk tuir Reprezentante United Nation Population Fund (UNFPA), Ronny Lindstrom hateten reprezenta UNFPA ba Timor-Leste iha eventu refere hanesan onra bo’ot ida tanba semináriu atu lansa publikasaun ida kona-ba Jéneru no Dezenvolvimentu Sustentavel Xave hosi la husik ema ida iha kotuk. Tanba liuhosi aprezentasaun sira ne’e sei fornese evidensia lubuk ida hosi sensus 2015. Tanba sensus hanesan fonte principal ba dadus kona-ba objetivu Dezenvolvimentu Sustentálvel ita sei hare oinsá maka sensus no dadus sira seluk bele uza hodi sukat to’o monitoriza progresu ba ODS.

“Apoiu ba dadus sensus ba dezenvolvimentu maka parte importante ida hosi mandatu UNFPA nian no organizasaun ida ne’e konsidera bo’ot ida hodi bele fó apoiu ba Diresaun Jerál Estatístika hodi hola parte ida implementasaun ami-nia mandatu iha Timor-Leste” tenik representante UNFPA, Ronny Lindstrom.

Ami espera katak loron ida ne’e útil no ita hotu bele la’o ba on hamutuk atu assegura katak dadus ne’ebé nakonu no riku ho informasaun bele utiliza diak ba dezenvolvimentu sustentável país nian no benifísiu ba ema hotu-hotu.

Iha serimonia lansamentu relatório monografia refere hetan suporta maka’as hosi Ministériu Finansas liuhosi Diresaun Jerál Estatístika ne’ebé servisu hamutuk ho Sekretariadu Estadu Igualidade no Inkluzaun (SEII) no mós hetan apoiu tékniku hosi UNFPA, ILO, FAO, no UN WOMEN.