• DJE Sei Lansa Peskiza Atividade Emprezarial (PAE)

Home » Anúnsiu » DJE Sei Lansa Peskiza Atividade Emprezarial (PAE) Imprime pájina

DJE Sei Lansa Peskiza Atividade Emprezarial (PAE)

Diresaun Jerál Estatístika, 17 Julhu 2018, tuir Diretór Jerál Estatístika, Elias dos Santos Ferreira hatete, iha tempu besik DJE sei realiza Peskiza Atividade Emprezarial (PAE) ho importansia atu sukat ekonómia Timor-Leste nian kada tinan.

Dirasaun Jerál Estatístika (DJE) mós agora dau-dauk halo ona treinamentu ba Peskiza Atividade Emprezarial (PAE) ho objetivu atu kompila ba kontas nasionál, tanba hosi Gross Domestic Product (GDP) maka ita bele hatene kontribuisaun hosi setór privadu sira ba ita nia ekonómia rai laran, nune’e mós atu hatene kuantidade ema ou pursentu empregu ema feto no mane Timor oan nain hira no estranjeiru nain hira durante tinan ida nia laran.

“Setór privadu hanesan kontribuisaun segundu ba kontas nasionál ka Gross Domestic Product (GDP) iha Timor-Leste,” hatutan Diretór Jerál Estatistika (DJE), Elias dos Santos Ferreira.

Hosi totál sampel ba Peskiza Atividade Emprezarial (PAE) ba tinan 2017 nian, emprezariu hamutuk 3,212 se kompara ho sampel tinan 2016 emprezariu hamutuk 2,874 ou sa’e 12%. Kompañia ne’ebé maka kategoria Top Business hamutuk 301 no maioria sentraliza iha kapital Dili. Hosi totál kompañia bo’ot ka ki’ik ne’ebé kona sampel (amostra) ba atividade refere iha Munisípiu Dili hamutuk 1,919 no totál kompañia hamutuk 992 iha munisípiu 11 no Rejiaun Administrasaun Enclave Oecusse, Ambeno (RAEOA).

“Peskiza ida ne’e kobre munisípiu 12 no inklui mós RAEOA ho nia durasaun fulan 2 nia laran no atu aselera peskiza ne’e DJE rekruta ema nain 45 fahe ba supervisor nain 9, enumeradór nain 36 no kondutór nain 9 ba ekipa sira mak hanesan: Ekipa I ba Lautem no Baucau, Ekipa II ba Viqueque no Manatuto, Ekipa III ba Manufahi no Ainaro, Ekipa IV ba Aileu no RAEOA, Ekipa V ba Ermera no Liquisa, Ekipa VI ba Covalima no Bobonaro, Ekipa VII, VIII no IX iha Dili”.

Dadus ka informasaun relasiona ho emprezariu sira ne’ebé maka kona amostra mai hosi Autoridade Tributaria/ Impostu, SERVE, Free Balance no hosi Autoridade Aduaneira/ Alfándega.