- Ekipa Tékniku Ministériu Finansas Avalia Funsiunáriu Kazuais Nia Servisu iha Munisípiu Liquiça
Home » Anúnsiu » Ekipa Tékniku Ministériu Finansas Avalia Funsiunáriu Kazuais Nia Servisu iha Munisípiu Liquiça Imprime pájina
Ekipa Tékniku Ministériu Finansas Avalia Funsiunáriu Kazuais Nia Servisu iha Munisípiu Liquiça
Diretór Jerál Estatístika, Elias dos Santos Ferreira hateten (DJE) servisu hamutuk ho Unidade Rekursu Humanus Ministériu Finansas (URH-MF) hala’o avaliasaun ba staff kazuais sira ne’ebé maka servisu iha Diresaun Jerál Estatístika iha 12 munisípius ho totál funsiunárius 62, lia hirak ne’e hato’o bainhira halo monitorizasaun ba ekipa avaliasaun munisípiu Likisa iha loron 10 Outubru 2018.
Tuir Diretór ne’e katak, ita iha ekipa 4 ne’ebé maka estabelese hodi halo avaliasaun ba staff sira iha 12 munisípiu no ekipa sira ne’e xefia hosi diretór estatístika sira no inklui mós Rekursu Humanus Ministériu Finansas. Objetivu hosi avaliasaun ida ne’e maka atu hatene staff kazuais sira nia abilidade durante servisu iha Diresaun Jerál Estatístika. Ita tenki halo avaliasaun para bele hatene durante ne’e sira halo ona saida no saida maka sira presija atu hadia, nomós hare’e ba sira nia disiplina servisu liga ho prosedimentu Rekursu Humanus Ministériu Finansas nian.
“Hanesan diresaun apresia ho ita nia staff kazuais sira nia kontribuisaun iha Diresaun Jerál Estatístika hodi publika dokumentus barak-barak. Tanba ita hotu hatene katak, ita hotu nia susesu maka Ministériu Finansas nia susesu”, informa Diretór Jerál ne’e.
Diretór ne’e informa liutan katak, avaliasaun ida ne’e la’os halo deit ba staff kazuais nain 3 ne’ebé servisu iha munisípiu Likisa, maibé ba ekipa hotu-hotu agora dau-daun halo hela avaliasaun ba munisípius sira no balun maka toma konta iha Likisa. Ba ami permanente mós tinan-tinan ema halo avaliasaun, hanesan diretór halo avaliasaun ba nia staff no hau halo evaluasaun ba diretór sira. Tanba liuhosi avaliasaun maka bele hatene ita nia report ne’e diak ka la diak. Importante hosi avaliasaun maka atu hatene durante ne’e imi halo ona saida, saida maka imi sediauk hatene no saida maka presija hadia iha futuru.
Iha sorin seluk tuir xefi ekipa avaliasaun munisípiu Likisa, Ricardo do Santos da Cruz informa katak avaliasaun ida ne’e atu hatene ita bo’ot sira nia koñesimentu durante servisu hamutuk ho Diresaun Jerál Estatístika (DJE) liga ba área estatístika nian. Ida fali relasiona ho ita bo’ot sira nia kontratu ne’ebé maka atu remata ona iha Dezembru 2018 no tuir regras atu halo kontinuasaun tenki avalia fila-fali ita bo’ot sira nia servisu. Evaluasaun ida ne’e la’os atu fó teste ba imi atu asumi fali vaga foun ruma la’e, ida ne’e atu hatene deit imi nia servisu durante iha estatístika.
Nune’e mós tuir Asistente ba Dezenvolvimentu Unidade Rekursu Humanus, Deonilia Ana Vira dos Santos hateten, avaliasaun ba staff kazuais Diresaun Jerál Estatístika (DJE) nian iha Munisípiu atu hatene sira nia koñesimentu no abilidade servisu iha área Estatístika nian ne’ebe durante ne’e sira halao. Resultado husi avaliasaun ida ne’e sei sai hanesan matéria ida ba Ministériu Finansas ba futuru atu bele kapasita sira liu-liu liga ba parte dadus Estatístika nian. Parte seluk mos halo avalisaun tambá hare’e ba sira nia kontratu servisu ne’ebe sei termina iha 31 Dezembro 2018.
“Tipu avaliasaun maka, primeiru teste ba computador, sira tenki hakerek ho microsoft word no informasaun sira liga ho sira nia servisu loro-loron, Teste Ms. excel no gráfiku la ses-mós hosi sira nia servisu estatístika nian. Ida fali administrasaun hanesan liga ho sira nia lista prezensa no servisu loro-loron nian no ida ne’e Responsavel Munisípiu maka sei avalia. No ikus liu maka teste elektronika hanesan perguntas jerál sira ne’ebe liga ho sira nia servisu loro-loron nian”, katak Deonilia.
Iha parte seluk Afonsu dos Santos hanesan staff kazuais ne’ebé maka tuir avaliasaun refere hato’o sentimentu orgullu tebes ba ekipa nasionál sira ne’ebé tun direta halo avaliasaun ba estaff sira nia koñesimentu liga ho servisu loro-loron nian. Atu nune’e ekipa nasionál sira bele hatene ami nia abilidade hodi bele kapasita ami nia koñesimentu iha área estatístika diak liutan iha futuru.