• Ekipa Tranzisaun Konklui Ona Enkontru Formal Ho Autoridade RAEOA

Home » Anúnsiu » Ekipa Tranzisaun Konklui Ona Enkontru Formal Ho Autoridade RAEOA Imprime pájina

Ekipa Tranzisaun Konklui Ona Enkontru Formal Ho Autoridade RAEOA

Iha loron 1 Agustu 2019, Ekipa Tranzisaun lideradu hosi Helder Lopes hodi avalia atividade no servisu hosi autoridade RAEOA – ZEESM konklui tiha ona enkontru formal ho autoridade RAEOA no sekretáriu rejional sira hotu inklui mos Prezidenti sesante RAEOA – ZEESM, Dr. Marí Alkatiri.

Tuir Prezidente Ekipa Tranzisaun Helder Lopes, kooperasaun no kolaborasaun lao ho ambiente ne’ebe diak tebes. Informasaun hirak ne’ebé Ekipa Trazisaun presiza hetan ona esplikasaun hosi partes relevantes hotu iha Oe-Cusse no presiza tan dokumentus komprovativus hodi bele komprova informasaun hirak ne’ebe hetan tiha ona iha terenu.

“Ekipa sei Fila fali ba Dili hodi hakerek relatóriu no dala ida tan sei hasoru Dr. Marí Alkatiri iha Dili hodi konfirma informasaun sira ne’e antes konklui ka finaliza relatóriu hodi hato’o ba SE. Primeiru Ministru” Tenik Helder Lopes.

Pontus situasaun sira ne’ebé koalia iha enkontru mak hanesan área Finansas kobre planeamentu, jestaun finansas, sistema jestaun finansas públika. Reseitas fiskais naun fiskais, patrimoniu moveis no imoveis. Area Infraestrutura, Administrasaun inklui Lei no Regulamentu sira.

“Informasaun ne’ebé hetan iha nivel temátiku no nivel sektorais ajuda tebes ekipa traballu hodi konklui nia relatóriu”. Katak Prezidenti Ekipa, Helder Lopes.

Maske realiza ona enkontru formal ho autoridade rejional iha Oe-Cusse, membrus ekipa sei kuntinua hodi halo konfirmasaun ho autoridade kompetenti sira molok Ekipa fila hikas mai Dili hodi halo konfirmasaun dala idatan ho Dr. Marí Alkatiri nu’udar konfirmasaun dahikus antes entrega relatóriu final ba Primeiru Ministru VIII Governu Konstitusional, Taur Matan Ruak.