• Enkontru Koordenasaun Entre URAJ no Prokuradoria Munisípiu Covalima

Home » Anúnsiu » Enkontru Koordenasaun Entre URAJ no Prokuradoria Munisípiu Covalima Imprime pájina

Enkontru Koordenasaun Entre URAJ no Prokuradoria Munisípiu Covalima

Koordenadór Unidade Rekursu no Asesória Jurídika (URAJ), Viriato da Costa Seac hateten, bazeia ba Estatutu Orgánika Autoridade Aduaneira, kna’ar prinsipál URAJ nian ida maka atu asegura kolaborasaun di’ak no metin ho Ministériu Públiku hodi defende interese Estadu nian, lia-hirak ne’e hato’o bainhira halo enkontru ho Xefe Prokuradoria Munisípiu Covalima (PMC) iha ninia serbisu fatin, iha Suai, iha-loron 12 fulan-abríl 2018.

Koordenadór Unidade ne’e akresenta liután katak objetivu husi enkontru ne’e mak atu explora mekanízmu ruma ne’ebé efisiente no efíkaz liu hodi estabelese ho hametin liña koordenasaun entre Autoridade Aduaneira no Ministériu Públiku, liu-liu Prokuradoria Munisípiu Covalima ne’ebé nia área serbisu kobre to’o ba iha Munisípiu Bobonaro nian.

“Ita-tomak hatene momoos katak na’in ba kazu krime mak Ministériu Públiku nune’e Alfándegas bainhira halo dilijénsia tuir kna’ar hirak ne’ebé atribuidu tantu tuir Estatutu Orgánika Autoridade Aduaneira ne’ebé aprova ho Dekretu-Lei nº 9/2017, 29 de-marsu, nomós tuir Dekretu-Lei n.o 14/2017, 5 de Abríl ne’ebé aprova Kódegu Aduaneira, wainhira hetan aktu ka omisaun ruma ne’ebé konsidera nu’udar kontra ordenasaun ka krime tenke halo partisipasaun ba Ministériu Públiku ba finalidade ne’e maka URAJ nesesita atu kolabora didi’ak ho Prokuradoria Munisípiu Covalima” tenik Koordenadór URAJ, Viriato da Costa Seac.

Iha enkontru ne’e, Xefe PMC, Matias Soares hateten katak nesesita duni atu iha liña koordenasaun di’ak entre PMC no entidades Estadu relevante inklui Alfándegas hodi fó protesaun ba interese Estadu nian, liu-liu iha atividade importasaun no esportasaun nian ne’ebé hala’o iha area fronteiras Bobonaro no Covalima.

“Ita-nia instituisaun sira nesesita atu kolabora hamutuk duni hodi trata asuntu sira relevante ba aktu krime ne’ebé rezulta husi atividade komérsiu iha area fronteiras nian, inklui asegura ita-nia persepsoens hanesan kona-ba interpretasoens legal tantu ba Kódegu Penál nomós ba Kódegu Aduaneiru, nune’e bele tulun ita tomak, liu-liu ofisiais sira ne’ebé hala’o kna’ar iha terenu hasees-án husi komete aktu ka omisaun ne’ebé konsideradu kontraordenasaun ka krime” katak Xefe Matias Soares.

Enkontru ne’e rekomenda atu Alfándegas prepara karta ofisiál ida haruka ba Ministériu Públiku hodi intróduz kona-ba kna’ar hirak ne’ebé URAJ nian, liu-liu kna’ar hanesan patrosíniu judisiáriu no representasaun nian nomós kontinua explora posibilidade estabelese protokolu de-kooperasaun entre Alfándegas no Ministériu Públiku.