Timor-Leste Ministry of Finance

Home » Anúnsiu » Enkontru Pontu Fokal Media Husi Liña Ministériu Sira Hodi Bele Uniformiza Informasaun Governu ba Publiku Imprime pájina

Enkontru Pontu Fokal Media Husi Liña Ministériu Sira Hodi Bele Uniformiza Informasaun Governu ba Publiku

Ministériu Finansas liuhosi Gabinete Komunikasaun no Informasaun (GKI) servisu hamutuk ho Sekertario Estadu Komunikasaun Sosial (SEKOMS) realiza enkontru da-ruak pontu fokal média entre liña ministériais sira hotu ho objetivu atu uniformiza informasaun governu ba públiku, enkontru refere realiza iha Auditorium Xanana Gusmão Ministériu Finansas, 17 Outubru 2018.

Tuir Xefi Gabinete Komunikasaun no Informasaun (GKI) Ministériu Finansas Agostinho Castro hateten, ami hare’e katak enkontru ida ohin loron importante duni ba kolega sira iha liña ministériu hotu bele hato’o opiñiaun no isu saida deit maka relasiona ho komunikasaun. Hau hanoin isu no preokupasaun barak presija hato’o durante ita nia enkontu iha área komunikasaun no informasaun liga ho programa VIII Governu.

“Téknikamente ami nia superior maka Ministru, maibé entermus kooperasaun SE Sekretáriu Estadu bele hato’o iha enkontru konsellu ministru oinsa maka bele iha kapasitasaun ba funsiunáriu sira iha gabinete komunikasaun no informasaun iha liña ministériu sira hotu”, katak Xefi Gabinete ne’e.

Iha sorin seluk tuir Sekretáriu Estadu Komunikasaun Sosial, Merício Juvenal dos Reis “Akara” hateten, ohin ita halo enkontru koordensaun pontu fokal média sira kada fulan, atu nune’e pontu fokal sira iha liña ministériu sira bele hato’o ida-idak nia planu nomós prioridade sira para bele kolabora. Ita hakarak uniformiza mensajen ne’e atu evita kontradiksaun informasaun internal departamentu sira nian. Nune’e mos Enkontru ne’e atu fasilita média officer kada departamentu para bele atualiza sira nia servisu no hare’e ba obstaklu saida maka sira infrenta kada fulan.

“Hanesan Sekretáriu Estadu komunikasaun Sosial iha orientasaun polítika ba média governu sira tenki defende misaun governu no sai komunikatór ida diak entre governu ho sidadaun nomós fasilita komunikasaun sidadaun ba governu”, tenik Sekretáriu Estadu ne’e.

Iha parte seluk Xefe Gabinete ne’e realsa liu tan katak tenki iha uniformizasaun naran ba Unidade Trabalhu Komunikasaun Sosial kada liña Ministeriu.

Ami mós hare’e dalaruma públiku balun kestiona iha pájina facebook no jornal sira iha failansu balun, liu-liu liuhosi enkontru ida ne’e ami atu diskuti no hadia hodi avalia saida maka la’o diak no ladiak. Liuhosi enkontru ida ne’e sai mós hanesan Sekretáriu Estadu nia responsabilidade para atu bele garantia kualidade informasaun governu nian ba públiku no labele falha relasiona infomasaun ou polítika governu nian.

Enkontru ne’e partisipa husi pontu fokal, oficiais media, assessor no assessora sira husi liña ministerias hotu iha VIII Governu Konstitusional.