• Enkontru Pre-Liminariu Membru Komite Revizaun Orsamentu Polítika

Home » Anúnsiu » Enkontru Pre-Liminariu Membru Komite Revizaun Orsamentu Polítika Imprime pájina

Enkontru Pre-Liminariu Membru Komite Revizaun Orsamentu Polítika

Iha loron 19 Outubru 2018, Ministériu Finansas liuhosi Sekretariadu Tékniku hala’o enkontru pre-liminariu ho membru Komité Revizaun Orsamentu Polítika (KROP) ho objetivu atu fó informasaun ka dadus relevante ne’ebé sai hanesan baze preferensia ba membru comité

Objetivu hosi enkontru pre-liminariu ne’e atu informa ba membru komité kona-ba primeiru, ajenda diskusaun KROP ho ninia mekanismu no metodolojia atu jere diskusaun; segundu, informa mós detalhus kalendariu ne’ebe desagrega ona tuir durasaun data no horas hodi guia diskusaun entre membru komité ho institusaun ida-idak too remata (loron 22 to’o 27 Outubru 2018); terseiru, kona-ba Pasta Verdi, katak informasaun husi dokumentus ne’e mensiona konaba ba introdusaun submisaun, pontus análize ba kualidade orsamentu, kapasidade ezekusaun no finansiamentu ba prioridades liu-liu aliñamentu programa no orsamentasaun, pontus kunkluzaun no pontus diskusaun. Informasaun hirak ne’e fasilita tebes ba membru komité hodi halo diskusaun ho Orgaun Estadu sira hodi hare no identifika programas, atividades no orsamentu aliña ka lae ho prioridades nasional ne’ebe konsidera ona ba tinan 2019; kuatru, konaba sumariu tetu fiskal versus submisaun no adsional orsamentu ne’ebe durante ne’e Ministeriu Finansas simu husi Orgaun Estadu sira iha dia 12 Outubru 2018. Sumariu ida ne’e presiza aprezenta duni ba membru komité tamba nudar baze ba desizaun orsamentu Orgaun Estadu ida-idak ho objetivu atu evita total jeral labele ultrapasa makaas liu husi kapasidades orsamentu ne’ebe Estadu iha. Ikus liu, aprezenta mos metodolojia diskusaun ba membru komité hodi konsidera no jere diak liu tan iha diskusaun ho efisiente no efektivu.

“Nu-entantu, Pasta Verdi sei prepara husi Sekretariadu Tekniku Ministeriu Finansas no UPMA ba kada instituisaun ida-idak, hein katak hahu semana oin mai sei fornese membru komité hodi utiliza nudar preferensia ida atu halo diskusaun ho liña ministériu sira”, tenik Diretór Nasional Orsamentu Salomão Yaquim.

Marka prezensa iha enkontru pre-eliminariu mak membru komite revizaun orsamentu polítika OJE 2019 mak Primeiru Ministru Taur Matan Ruak nudar presidente KROP, Vise-Ministra Finansas Sara Lobo Brites nudar vise presidente, Ministru Obras Publika Salvador Soares dos Reis Pires (membru), Ministru Agrikultura no Peskas Joaquim José Gusmão dos Reis Martins (membru), Ministru Reforma Legislativa no Asuntu Parlamentares Fidelis Manuel Leite Magalhães (observasaun), Sekretáriu Estadu Igualidade no Inkluzaun Maria José da Fonseca Monteiro de Jesus (observasaun) no ekipa téknikus sira husi Unidade Planeamentu, Monitorizasaun no Avaliasaun (UPMA) no Ministériu Finansas.

Ajenda diskusaun Komite Revizaun Orsamentu Politíka (KROP) sei hahu’u ohin loron 22 to’o 27 Outubru 2018 iha salaun Auditorium Xanana Gusmão, Ministériu Finansas, Aitarak Laran.
Remata.