• Vise-Ministra Finansas ho Membrus Project Steering Committee Diskute Implementasaun Projetu Janela Úniku Nasionál

Home » Anúncios » Vise-Ministra Finansas ho Membrus Project Steering Committee Diskute Implementasaun Projetu Janela Úniku Nasionál Imprimir a página

Vise-Ministra Finansas ho Membrus Project Steering Committee Diskute Implementasaun Projetu Janela Úniku Nasionál

Dili, 15 fevereiru 2021 – Vise-Ministra Finansas, S.E. Dra. Sara Lobo Brites akompaña husi membrus Project Steering Committee, lidera enkontru virtuál ho Kordenadora Programa ASYCUDA/UNCTAD ba Rejiaun Ázia, Marianne Dumont. Enkontru virtuál ba daruak ne’e diskute kona-ba progresu implementasaun sistema Janela Úniku Nasionál (National Single Window, sigla Inglés).

Iha enkontru ne’e, membrus Project Steering Committee diskute kona-ba planu ne’ebé sei implementa durante tinan-rua nia laran ne’ebé fahe ba faze rua mak hanesan: (1) Interkoneksaun husi Ajénsia Governu hamutuk nain-ualu inklui mós kompaña Bollore ne’ebé mak iha futuru sei sai operadór ba Portu Baia Tibar, (2) Interligasaun ho nasaun sira ne’ebé durante ne’e sai parseiru komérsiu ba Timor-Leste inkui nasaun membrus CPLP no ASEAN.
Janela Úniku hanesan progresu importante ida ba Autoridade Aduaneiru, Ministériu Finánsas iha âmbitu programa reforma fiskál no jestaun finánsas públika ne’ebé mak inisia husi VI Governu no VIII Governu komprometidu atu kontinua promove ajenda reforma ne’e.

Enkontru virtuál ne’e hanesan oportunidade ida ba Autoridade Aduaneiru, Ministériu Finansas no ekipa UNCTAD hodi diskuti dezenvolvimentu sistema ASYCUDA World no mós plataforma Janela Úniku hodi atualiza progresu serbisu no diskute mós problema-sira ne’ebé relasiona ho implementasaun programa refere.

Durante enkontru ne’e, membrus Project Steering Committee mós informa ba S.E. Vise-Ministra Sara katak iha tempu badak nia laran, Ajénsia sira hanesan Diresaun Nasionál Transporte Terrestres (DNTT), Kuarentena, Imigrasaun no Saúde mós sei integra ba iha sistema Janela Úniku, ASYCUDA World.

Janela Úniku Nasionál mak hanesan portál online ida ne’ebé mak administra husi Autoridade Aduaneiru, Ministériu Finansas. Portál ne’e liga Autoridade Aduaneiru ho liña ministeriál, ajénsia no institutu públiku Governu ne’ebé mak trata movimentu ema no/ka sasán-sira, inklui Autoridade Tributaria, Imigrasaun, Kuarantena, Ministériu Saúde, Ministériu Transporte no Telekomunikasaun, MTCI, TradeInvest no Autoridade Portu.

Implementasaun sistema Janela Úniku Nasionál hanesan pasu importante ida ba Ministériu Finánsas iha âmbitu programa reforma fiskál no jestaun finánsas públiku ne’ebé mak inisia husi VI Governu no VIII Governu komprometidu atu kontinua promove ajenda reforma ne’e. Ida-ne’e hatudu liuhusi integrasaun Ajénsia TradeInvest, IP ba iha sistema ASYCUDA world ne’ebé foin lailais ne’e, Ministru Koordenadór Asuntu Ekonómiku, S.E. Joaquim Amaral no Ministru Finansas, S.E. Rui Augusto Gomes lansa ona iha 1 fevereiru 2021.

Utilizasaun sistema ne’e sei minimiza uzu surat-tahan, reduz atrazu, kustu tranzasaun inklui tempu libertasaun sásan iha fronteira terrestres, portu no aeroportu, nune’e fasilita liután empreza-sira atu halo negósiu. Sistema ne’e mós sei ajuda Governu liuhusi Ministériu Finánsas atu kolekta reseita ho maneira ida ne’ebé justu no transparente.

Akompaña Vise-Ministra Sara iha enkontru ne’e, Diretór Jerál Autoridade Aduaneiru, Jose Abilio ho ekipa, Diretór Jerál Servisus Korporativus, Joanico Pinto, Diretór Jerál IFMISU, Venceslau Guterres, Assesór Juridiku, Isaac Menezes no Saeid Yarandi, Espesialista Rezidente ASYCUDA.