• Ezekusaun Fundu Covid-19 Atinzi Ona 64 Pursentu

Home » Announcements » Ezekusaun Fundu Covid-19 Atinzi Ona 64 Pursentu Print Page

Ezekusaun Fundu Covid-19 Atinzi Ona 64 Pursentu

20200612_Ezekusaun Fundu Covid-19 Atinzi 64 Pursentu - editado por DGuterres

Sekretariadu Tékniku Fundu Covid-19 Januario da Gama hateten ezekusaun fundu Covid-19 to’o loron 10 fulan Junho 2020 ita konsege ezekuta ona 64 pursentu, uainhira ita inklui ezekusaun iha obrigasaun no kompromisus.

“Reuniaun ida ohin konsentra ba ajenda lubuk ida maibé ha’u hakarak fó sumáriu de’it. Ajenda primeiru liga liu ba iha asuntu administrativu nian. Segundu liga ho ezekusaun fundu Covid-19 to’o 10 Junho 2020, no terseiru maka relativamente pagamentu ba estudante não-bolseiru iha rai liur”, informa Sekretariadu Tékniku Fundu Covid-19, Januario da Gama iha Auditório Xanana Gusmão, Ministériu Finansas, iha loron 12 fulan Junho 2020.

Husi ajenda tolu ne’e esensiálmente liga liu ba iha ezekusaun fundu Covid-19 ninian. Sekretariadu Tékniku liuhusi Ministériu Finansas presiza aprezenta ida ne’e ba iha Konselhu Jestaun Fundu Covid-19. Tanba hanesan ita bo’ot sira hatene durante ne’e estrutura Konselhu Jestaun ne’e prensidu interinamente husi Vise-Ministra Finansas hanesan Prezidente Konselhu Jestaun no Vise-Ministru Sáude hanesan membru Konselhu Jestaun nomós Ministériu Negosius Estranjerus no Kooperasaun hanesan membru.

“Purtantu hanesan iha ona Ministru definitivu ba Ministériu rua ne’e, entaun ohin ami aprezenta kedas prosesu administrativu ba iha ezekusaun fundu Covid-19 nian no aprezenta mós kona-ba desempenho ezekusaun fundu Covid-19 to’o loron 10 fulan Junho nian”, informa Januario da Gama.

Sekretariadu Tékniku mós esplika, ezekusan fundu Covid-19 nian ho alokasaun fundu $ 150 milhões to’o loron 10 fulan Junho 2020 ita konsege ezekuta ona 64 porsentu, uainhira ita inklui ezekusaun iha obrigasaun no kompromisus. Se ita esklui no haree de’it ba pagamentu real maka ezekusaun fundu Covid-19 atinzi 60 pursentu.

“Sekretariadu Tékniku iha nesesidade atu aprezenta ba Konselhu Jestaun Fundu Covid-19. Tanba iha pedidu husi Parlamentu Nasionál (PN) atu semana oin Governu liu-liu Ministériu Finansas ne’ebé halo jestaun ba iha fundu Covid ne’e sei aprezenta ezekusaun fundu Covid-19 ba Parlamentu Nasionál”, informa Januario da Gama.

Atu nune’e Parlamentu Nasionál bele iha informasaun hodi tetu no deside kona-ba nesesidade finansiamentu ba defisit husi fundu Covid-19. Tanba Governu hatama ona proposta ba Parlamentu Nasionál através alterasaun lei ba levantamentu fundu petrolíferu ninian.

Sekretariadu mós reforsa tan, reuniaun Konselhu Jestaun Fundu Covid-19 ida ne’e hanesan reuniaun ba dala VII nian, husi reuniaun ida ne’ebé halo ona desde fulan Abril. Ho hanoin ida atu informa kona-ba lala’ok servisu Konselhu Jestaun Fundu Covid-19 ninian no servisu Sekretariadu Tékniku nian atu bele atualiza ba Konselhu Jestaun para sira bele iha informasaun. Liu-liu ba membru ne’ebé foin integra mai iha kompozisaun estrutura Konselhu Jestaun Fundu Covid-19.