• Ezekusaun OJE 2021 atinji 22%

Home » Anúnsiu » Ezekusaun OJE 2021 atinji 22% Imprime pájina

Ezekusaun OJE 2021 atinji 22%

Dili, 25 maiu 2021 – Taxa ezekusaun reál Orsamentu Jerál Estadu (OJE) 2021 – esklui kompromisu no obrigasaun-sira, to’o ohinloron atinji ona 22%, maske Ita-nia país atravessa hela evolusaun surtu COVID-19 ho impozisaun serka sanitária no konfinamentu obrigatóriu.

Ezekusaun Todo Governo atinji ona millaun $446 ka 22% husi OJE 2021, ne’ebé nia valór totál sa’e ba $2.030.300.000 husi valór inisiu billaun $1,895.

Taxa ezekusaun aas liu mak iha kategoria transferénsia 36%, tuir-mai saláriu no vensimentu ho ezekusaun 35%, bens no servisus 14%, kapitál dezenvolvementu 5% no ki’ik liu mak kapitál menór 1%.

Tuir projesaun, ezekusaun sei kontinua sa’e iha trimestre datoluk no trimestre dahaat tanbá iha períodu ne’e mak projetu-sira komesa ezekuta. To’o iha 7 maiu 2021, Ministériu Finansas liuhusi Komisaun Nasional Aprovizionamentu (CNA, sigla Portugés) realiza ona prosesu konkursu aprovizionamentu projetu hamutuk 107 ho totál orsamentu millaun $565,4. Projetu sira ne’e maioria ninia prosesu aprovizionamentu hahu tiha ona no balun iha ona faze finalidade ne’ebé tuir kalendáriu sei konklui iha tinan ne’e nia laran.

Fontes finansiamentu orsamentu ba projetu pakote 107 ne’e mai husi fontes tolu: (i) Fundu Infraestrutura ho montante millaun $328,3 (ii) Fundu La’ós-Infraestrutura millaun $21,1 no (iii) Imprestimu husi Ajénsia Internasionál ADB no JICA ho montante millaun $216.

Aleinde ne’e, Fundu Espesiál COVID-19 ne’ebé mak kria iha tinan kotuk atu responde ba pandemia, to’o ohinloron indika katak ezekusaun atinji ona 11%. Tarefa ida-ne’e hetan implikasaun husi mudansa iha dotasaun Fundu COVID-19, ne’ebé ho montante inisiu millaun $31, hetan ona reforsu $256.641.793, nune’e ninia totál hamutuk $287,641.793.

To’o iha 18 maiu, Ministériu Finansas realiza ona pagamentu Cesta Básica ho montante totál millaun $26,7 ba kompaña fornesedór hamutuk 106. Distribuisaun Cesta Básica mós atinji ona 90% ho totál benefisiáriu-sira ne’ebé mak simu ona kuaze ema millaun-ida, rihun-atus-ida resin.

Durante tempu serka sanitária no konfinamentu obrigatóriu, saláriu no vensimentu ba funsionáriu-sira ba fulan marsu, abril no maiu selu ontime – kredita ba funsionáriu idaidak nia konta bánkaria molok loron-20 kada fulan.

Taxa ezekusaun reál iha trimestre dahuluk 2021 mak 17%. Númeru ne’e aas liu daruak dezde 2012, ho valór tomak ne’ebé mak ezekuta ona hamutuk millaun $316. Taxa ezekusaun reál iha trimestre dahuluk 2017 mak aas liu dezde 2012 ho 18%.

Iha tinan-2021, Ministériu Finansas haruka ona pedidu levantamentu osan husi Fundu Petróliferu ba Banku Sentrál Timor-Leste ho montante totál millaun $350. Levantamentu dahuluk iha fevereiru 2021 ho montante millaun $200, no levantamentu daruak iha 28 abril 2021 ho montante millaun $150. ***