• Ezekusaun Real Fundu Covid-19 tinan 2021 atinji 70%

Home » Announcements » Ezekusaun Real Fundu Covid-19 tinan 2021 atinji 70% Print Page

Ezekusaun Real Fundu Covid-19 tinan 2021 atinji 70%

Díli, 6 Janeiru 2022 – Taxa ezekusaun reál Fundu Covid-19 (Fundu Espesiál ne’ebé kria iha 2020 atu responde ba pandemia Covid-19 ne’ebé jere husi Ministériu Finansas) to’o iha loron 31 fulan-dezembru 2021 atinji millaun $200,9 ka 70% husi totál orsamentu retifikativu alokadu millaun $287,6.

Taxa ezekusaun ida-ne’e aas maske iha tinan kotuk Timor-Leste aplika restrisaun oi-oin (ne’ebé limita movimentu ema no sasán sira) kauza husi pandemia Covid-19, Inundasaun no períodu ezekusaun durante fulan hitu (7) nia laran de’it (depoisde Prezidente Repúblika Promulga OJE Retifikativu iha fulan-maiu 2021).

Antes ne’e, Ministériu Finansas mós halo projesaun ne’ebé bazeia ba fluxu kaixa no ritmu ezekusaun husi Janeiru to’o Novembru, katak taxa ezekusaun reál Fundu Covid-19 to’o iha Dezembru 2021 sei atinji de’it 66%. Tinan kotuk, taxa ezekusaun reál Fundu Covid-19 atinji 58%.

Taxa ezekusaun tuir klasifikasaun ekonómiku, aas liu mak iha kategoria Bens no Servisus ne’ebé mak ezekuta millaun $149,5 ka 76% husi orsamentu alokadu millaun $197,5. Tuir kedan ho Transferénsia Públikas ne’ebé mak ezekuta millaun $46,8 ka 62% husi orsamentu alokadu millaun $75,9. Kapital Dezenvolvimentu ezekuta millaun $2,9 ka 36% husi orsamentu alokadu millaun $8,1. Enkuantu Kapitál Menór ezekuta millaun $1,7 ka 28% husi orsamentu alokadu millaun $5,9.

Tuir-mai progresu ezekusaun reál tuir medidas sosio-ekonómiku neen: i) Moratoria de Crédito ezekuta ona 100% husi orsamentu alokadu millaun $2; ii) pagamentu Cesta Básica ezekuta ona millaun $66,2 ka 97% husi orsamentu alokadu millaun $68,1; iii) pagamentu suplementu remuneratóriu ba traballadór liña-frente ezekuta ona millaun $51,6 ka 97% husi orsamentu alokadu millaun $53,4; iv) pagamentu izensaun propinas ba estudante ensinu superior ezekuta millaun $11,1 ka 79% husi orsamentu alokadu millaun $14; v) apoiu ba empregu ezekuta millaun $30,8 ka 68% husi orsamentu alokadu millaun $45,3; vi) apoiu seguransa alimentár ezekuta millaun $7,2 ka 60% husi orsamentu alokadu millaun $12; vii) apoiu pulsa internet ba estudante ensinu superiór ezekuta $872,2 mil ka 41% husi orsamentu alokadu millaun $2; viii) prevensaun no mitigasaun Covid-19 inklui finansiamentu operasaun Sentru Integradu Jestaun Krize, ezekuta millaun $31,2 ka 37% husi orsamentu alokadu millaun $83,4. ***