• Ezekusaun Reál Fundu Covid-19 to’o Fulan Daruak iha Trimestre Datoluk Atinji ona 35%

Home » Announcements » Ezekusaun Reál Fundu Covid-19 to’o Fulan Daruak iha Trimestre Datoluk Atinji ona 35% Print Page

Ezekusaun Reál Fundu Covid-19 to’o Fulan Daruak iha Trimestre Datoluk Atinji ona 35%

Díli, 18 agostu 2021 – Taxa ezekusaun reál Fundu Covid-19 to’o iha loron 17, fulan-agostu tinan 2021, atinji ona millaun $100,1 ka 35% husi totál orsamentu retifikativu alokadu millaun $287,6. Enkuantu taxa ezekusaun atuál ne’ebé inklui kompromisu no obrigasaun sira, to’o iha fulan-agostu nia klaran, atinji ona 53%.

Taxa ezekusaun tuir klasifikasaun ekonómiku, aas liu mak iha kategoria Transferénsia Públika ne’ebé mak ezekuta ona millaun $31,2 ka 38% husi orsamentu alokadu millaun $81,2. Tuir kedan ho Bens no Servisus ne’ebé mak ezekuta ona millaun $67,4 ka 35% husi orsamentu alokadu millaun $194,5. Kapitál Menór ezekuta ona $675,1 mil ka 18% husi orsamentu alokadu millaun $3,7. Enkuantu Kapital Dezenvolvimentu, foin mak ezekuta de’it $782,6 mil ka 10% husi orsamentu alokadu millaun $8,1.

Tuir-mai progresu ezekusaun reál tuir medidas sosio-ekonómiku: Moratoria de Crédito, ezekuta ona 100% husi orsamentu alokadu millaun $2; pagamentu ba programa Cesta Básica, ezekuta ona millaun $60,7 ka 89% husi orsamentu alokadu millaun $68,1; Apoiu ba Empregu, ezekuta ona millaun $22,6 ka 50% husi orsamentu alokadu millaun $45,3; Apoiu propinas ba estudante ensinu superiór, ezekuta ona millaun $5,6 ka 40% husi orsamentu alokadu millaun $14; Mitigasaun no Prevensaun Covid-19 inklui finansiamentu operasaun Sentru Integradu Jestaun Krize, ezekuta ona millaun $9,1 ka 11% husi orsamentu alokadu millaun $82,3. Relasiona ho subsídiu internet ba estudantes ensinu superiór, daudaun ne’e, Ministériu Finansas (MF) iha hela proseseu kria Commitment Payment Voucher (CPV) no Purchase Requisition (PR) no sei realiza pagamentu ba Operadór Telekomunikasaun (Timor Telecom, Telemor no Telkomcel) iha tempu badak nia laran; Kona-ba finansiamentu suplementu remuneratóriu ba traballadór liña-frente, Governu submete filafali ona redasaun finál Proposta Dekretu Lei ba Prezidente Repúblika atu tetu.

Governu liuhusi Gabinete Primeiru-Ministru mós submete ona Relatóriu Ezekusaun Fundu Covid-19 Trimestre Daruak ne’ebé kobre períodu Abril to’o Juñu 2021 ba Parlamentu Nasionál iha fulan-jullu 2021.

Iha Maiu 2021, Prezidente Repúblika promulga Lei OJE Retifikativu hafoin hetan aprovasaun finál globál iha Parlamentu Nasionál ho votu A favor 44 (68%), Kontra 0 no Abstensaun 20. Ho promulgasaun ne’e, lori mudansa iha dotasaun orsamentál lubun ida inklui dotasaun Fundu Covid-19, ne’ebé ho montante inisiu millaun $31 hetan ona aumentu ho montante millaun $256,6 nune’e ninia totál orsamentu finál hamutuk millaun $287,6.

Mudansa iha dotasaun Fundu Espesiál Covid-19 ne’e, fó biban ba Governu hodi finansia medidas sosio-ekonómiku neen (6) mak hanesan: (i) Apoiu ba empregu; (ii) Moratoria de Crédito; (iii) izensaun pagamentu propinas no subsídiu internet ba estudantes ensinu superiór, (iv) sosa produtu alimentár husi produtór lokál, (v) Apoiu ba traballadór liña-frente; (vi) medidas mitigasaun no prevensaun Covid-19 inklui finansiamentu operasaun Sentru Integradu Jestaun Krize. ***