• Ezekusaun Reál OJE 2021 to’o Inisiu Novembru Atinji 52%, Programa Esensiál 47%

Home » Announcements » Ezekusaun Reál OJE 2021 to’o Inisiu Novembru Atinji 52%, Programa Esensiál 47% Print Page

Ezekusaun Reál OJE 2021 to’o Inisiu Novembru Atinji 52%, Programa Esensiál 47%

Díli, 8 novembru 2021 – taxa ezekusaun reál OJE 2021 to’o iha inisiu Fulan Daruak, Trimestre Dahaat, atinji ona billaun $1,062 ka 52% husi totál orsamentu billaun $2,1. Taxa ezekusaun reál ba programa Boa Governasaun no Jestaun Institusionál, ezekuta ona millaun $331,6 ka 72% husi orsamentu alokadu millaun $458,6. Enkuantu taxa ezekusaun reál ba kategoria programa esensiál entidade sira nian ezekuta ona millaun $731,2 ka 47% husi orsamentu alokadu billaun $1,5.

Taxa ezekusaun reál tuir kategoria despezas, aas liu mak iha kategoria Transferénsia Públika 82%, tuir kedan ho Saláriu no Vensimentu 72%, Bens no Servisus 41% no Kapitál Menor 19%, Kapital Dezenvolvimentu 12% no despezas kontinjensia 2%.

𝐄𝐳𝐞𝐤𝐮𝐬𝐚𝐮𝐧 𝐅𝐮𝐧𝐝𝐮 𝐂𝐨𝐯𝐢𝐝-𝟏𝟗

Fundu Espesiál Covid-19 to’o iha Kinta-feira, 4 novembru 2021, nia ezekusaun reál atinji ona millaun $117,7 ka 41% husi totál orsamentu retifikativu alokadu millaun $287,6. Mudansa iha persentajen ne’e tanba foin lailais ne’e, Ministériu Finansas ezekuta ona pagamentu suplementu remuneratóriu ba pesoál liña-frente Polísia Migrasaun, SIJK no PNTL. Tuir projesaun, taxa Ezekusaun Reál Fundu Covid-19 to’o iha fulan-dezembru nia rohan sei atinji 66% kompara ho tinan kotuk 58%.

𝐄𝐳𝐞𝐤𝐮𝐬𝐚𝐮𝐧 𝐑𝐞𝐬𝐞𝐢𝐭𝐚𝐬 𝐃𝐨𝐦𝐞́𝐬𝐭𝐢𝐤𝐚

Ezekusaun iha parte reseitas, to’o iha Kinta-feira, 4 novembru 2021 atinji ona millaun $126,9 ka 68% husi totál estimativa reseitas millaun $187,1.

𝐋𝐞𝐯𝐚𝐧𝐭𝐚𝐦𝐞𝐧𝐭𝐮 𝐡𝐮𝐬𝐢 𝐅𝐮𝐧𝐝𝐮 𝐌𝐢𝐧𝐚𝐫𝐚𝐢

Relasiona ho levantamentu osan husi Fundu Minarai, to’o iha fulan-outubru nia rohan, Governu halo ona levantamentu millaun $797,8 ka 58% husi totál billaun $1,3 ne’ebé mak Parlamentu Nasionál aprova ona. Governu sei hato’o pedidu levantamentu bainhira iha ona nesesidade atu halo reforsu ba kaixa Estadu.

𝐄𝐳𝐞𝐤𝐮𝐬𝐚𝐮𝐧 𝐢𝐡𝐚 𝐧𝐢́𝐯𝐞𝐥 𝐌𝐮𝐧𝐢𝐬𝐢́𝐩𝐢𝐮

Taxa ezekusaun OJE 2021 iha nível munisípiu hatudu progresu ida ne’ebé di’ak tebes. To’o iha inisiu fulan-novembru 2021, iha munisípiu lima (5) mak hatudu progresu ezekusaun ne’ebé di’ak, hanesan Munisípiu Lautem (71%) Manufahi (64%), Ainaro no Covalima (63%), Manatuto (62%). Progresu ezekusaun ne’ebé di’ak ne’e, sei kontinua fasilita polítika servisus desentralizasaun husi Oitavu Governu Konstitusionál ne’ebé lidera husi Ministériu Administrasaun Estatál.

Iha OJE 2021, Oitavu Governu Konstitusionál hahú implementa orsamentu pur Programa ho forma kompletu – tranzisaun ida husi orsamentu pur Item ne’ebé mak implementa desde Timor-Leste restaura nia Independénsia tinan 19 liubá.

Orsamentasaun pur Programa hanesan instrumentu ida atu garantia katak osan sira kada tinan Governu foti husi Fundu Minarai, kobransa Impostu hosi kontribuintes, no Empréstimu husi Doadór sira, fó duni benefísiu ba Povu, hadi’ak kualidade prestasaun servisus públiku hodi alkanse metas ne’ebé mak Governu aprova ona.

Ho introdusaun polítika foun ne’e, ba oin, Oitavu Governu Konstitusionál hakarak atu asegura servisu públiku ida ne’ebé prudente ho rasiosinu sosiu-ekonómiku; hakat husi orsamentu pur Item ba orsamentu pur Programa hodi asegura rezultadu reál husi ezekusaun, la’ós persentajen ezekusaun de’it no redus númeru programa husi 145 programas tun ba 45 programas iha tinan 2022 hodi fó biban ba Governu, foku ba kualidade no kontrolu ezekusaun OJE. ***