• Autoridade Foun Alfandega

Home » Reforma Fiscal » Autoridade Foun Alfandega Imprime pájina

Autoridade Foun Alfandega

Autoridade Aduaneira nu’udar odamatan ba prosperiedade ita nia nasaun. Alfándega mak fatin ba governu hodi kontrola ba sasán hotu ne’ebé tama no sai, inklui ema, sasán (materiál) sira no karreta, róahi no aviaun sira. Nia nu’udar fonte rendimentu prinsipál no ajuda atu asegura fronteira nasaun nian.

Ba Alfándega atu servisu ho loloos, nia tenke adere ba padraun internasionál ne’ebé ríjidu hodi asegura katak nia bele adapta no apropriadu ba dezafi u sira husi kreximentu populasaun no ekonómika nasaun nian. Autoridade Aduaneira Timor-Leste nian agora halo daudaun ona reforma hodi responde ba dezafiu krítiku haat ne’ebé sei fó impaktu boot tebes ba prosperiedade nasaun ne’e nian iha futuru.

Dezafiu primeiru mak atu asegura katak rendimentu hotu-hotu koleta ho maneira ne’ebé justu. Agora daudaun, Timor-Leste lakon rendimentu ne’ebé boot tebes tanba sistema ne’ebé inefi siente no la transparente no dala barak la tuir prátika di’ak. Hanesan fonte rendimentu ne’ebé boot liu ka prinsipál ba Governu ne’e, Alfándega tenke koleta montante rendimentu ne’ebé loos no hala’o mós ho maneira justu no transparente.

Dezafiu segundu mak oinsá Alfándega bele proteje Timor-Leste nia fronteira sira. Autoridade Aduaneira mak responsável hodi asegura katak sasán sira ne’ebé ilegál no perigu labele tama iha Timor-Leste. Hirak ne’e inklui kilat no drogas. Funsionáriu Autoridade Aduaneira sira mós tenke asegura katak sasán hotuhotu ne’ebé legál mak tama mai, tuir ho padraun nasionál nian ba seguransa ai-han, agrikultura, kímika
(inklui pestisida no adubu sira), aimoruk no animál. Padraun hirak ne’e hodi proteje ai-horis no animal Timor nian no mós proteje Timoroan sira.

Dezafiu terseiru mak oinsá Autoridade Aduaneira bele kontribui ba kreximentu ekonómiku. Atrai investimentu foun sira nu’udar objetivu prinsipál ida ba governu no kreximentu komunidade emprezariál iha Timor-Leste, dezeja atu Alfándega iha efi siente liu tan. Autoridade Aduaneira Timor nian sei hala’o mós papél importante ida hodi fasilita komérsiu entre merkadu sira iha ASEAN, CPLP no Ázia Pasífiku.

Dezafiu kuartu mak oinsá Alfándega sei halo jestaun ba númeru ne’ebé aumenta ba ema ne’ebé tama mai no sai husi nasaun ne’e. Tantu ba turízmu, ba empregu ka ba negósiu, iha ema barak tan husi nasaun barak ne’ebé kada tinan tama mai Timor-Leste. Ema bele la hatene kona-ba lei sira halo importasaun sasán tama mai iha nasaun ne’e, ka sira bele mai husi nasaun sira ne’ebé nu’udar fonte ba droga sira ilegál nian. Alfándega tenke halo monitorizasaun ba hirak ne’e hotu.

Dezde tinan 2014 nia rohan, Alfándega hala’o tiha ona mudansa barak hodi hadi’a nia servisu sira. Mudansa hirak ne’e inklui atualizasaun ba lei sira ne’ebé regula atividade Alfándega nian, lori sistema IT foun sira mai hodi moderniza no automatiza oinsá mak prosesa sasán sira liu husi Alfándega no oinsá mak koleta rendimentu, no asegura katak funsionáriu Alfándega sira iha kapasidade ne’ebé apropriadu hodi hala’o sira nia servisu ho loloos. Iha fulan Outubru 2016 Konsellu Ministru aprova ona Kódigu Alfándega nian no Deklarasaun Revizaun Arusha ne’ebé fó baze legál hodi hala’o reforma sira.

AUTORIDADE ADUANEIRA FOUN SEI ORIENTA HUSI VALÓR PRINSIPÁL HAAT NE’E:

1 Integridade
Integridade mak hanesan fundasaun ba Autoridade Aduaneira foun. Integridade katak funsionáriu sira sei trata ema hotu hanesan de’it no sei aplika lei ho forma justu. No mós integridade ezije katak funsionáriu Alfándega sira iha hahalok onestu no transparente. Ho maneira ne’e, Autoridade Aduaneira foun sei promove governasaun di’ak.

2 Profesionalizmu
Prosedimentu sira ba importadór no esportadór sira nian simplifi ka no padroniza ona ba prátika internasionál nian. Timor-Leste sei uza sistema armonizadu ba klasifi kasaun tarifa hodi fasilita klasifi kasaun ne’ebé loos no movimentu sasán sira lalais liu ne’ebé liu husi fronteira internasionál sira. Sistema IT foun sira, liu husi ASYCUDA World, kria kódigu libertasaun sasán sira husi alfándega lalais liu (la demora) iha tránzitu, liberta ba hasai sasán husi alfándega lais liu.

3 Transparénsia
Servisus Alfándega sei iha obrigasaun atu publika regra/regulamentu sira, diretivu ka kualkér mudansa ruma ba Lei ne’e. Lei foun ne’e mós permite Alfándega atu konsulta ho setór públiku no privadu sira kona-ba asuntus oioin. Lei ne’e esplika klaru liu kona-ba informasaun saida mak importadór no esportadór sira presiza, inklui rejistu ka arkivu sira ne’ebé sira mantein ba objetivu auditoria nian.

4 Respeitu
Respeitu, sei forma baze ba hahalok funsionáriu Alfándega nian hatudu bainhira liga ho klientes. Respeitu signifi ka hatudu sensibilidade ho kompriensaun ba direitus ema ida-idak nian. Respeitu ezije katak funsionárius Alfándega nian dezempeña sira nia kna’ar ho kortezia no konsiderasaun iha tempu hotu. No ikus liu, respeitu ba kliente sira, signifi ka oferese servisu di’ak liu ba ema hotu.

Autoridade Aduaneira foun sei:
• ajuda Governu hodi koleta rendimentu iha maneira ne’ebé justu no transparente
• halo prosedimentu sira iha servisu Alfándega nian efi siente liu
• lori servisu Alfándega tuir ka iha konformidade ho padraun internasionál nian
• hapara reseita importante ne’ebé lakon kauza husi inefi siénsia
• atrai investimentu iha Timor-Leste liu husi servisu ne’e fasil liu ba emprezáriu sira hodi importa no esporta sasán sira
• fasilita komérsiu rejionál no internasionál
• asegura Timor-Leste nia fronteira sira no hapara sasán ilegál sira ne’ebé tama mai nasaun ne’e

Reforma hirak ne’e sei lori benefísiu barak, eleva prosperiedade ba nasaun ne’e, ba empreza sira no ba povu Timor-Leste.