• Autoridade Imposto foun

Home » Reforma Fiscal » Autoridade Imposto foun Imprime pájina

Autoridade Imposto foun

Impostus hanesan klamar ba governu hotu-hotu. Se laiha impostu, governu labele oferese servisu importante ba nia populasaun. Osan ba impostu mai husi ema ida-idak no emprezas, no hola parte iha fatin hotu iha ita nia ekonomia.

Maibé atu tributasaun funsiona, nia presiza administrasaun forte atu jere koleta no prosesa impostus. Hanesan parte husi governu nia programa reforma fiskál, estabelesimentu Autoridade Tributária foun atu bele fó resposta ba nesesidade krexente husi ita nia populasaun no ekonomia.

Iha tinan tolu mai, Autoridade Tributária sei reforma tomak. Lei no prosedimentu foun ba tributasaun sei estabelese baze legál ba reformas. Sistema TI foun sei halo prosesu koleta no selu impostu fasil liu no funsionárius impostu sei simu formasaun iha sistema foun hirak ne’e. No ikus liu, rekrutamentu ba ofisiais Tributária foun sei asegura katak Autoridade Tributária iha rekursus umanus sufisiente no kualifikadu hodi implementa reformas.

Atu hatudu importánsia husi dezenvolvimentu rekursus umanus ba reformas, funsionáriu impostu atuál sei tuir formasaun iha tinan rua mai hodi kompriende prosesu ho lei foun, dezenvolve abilidade iha auditoria, servisu ba kontribuinte, jestaun risku no prosesamentu deklarasaun fiskál. Formasaun sei inklui kombinasaun husi treinu-iha-servisu-fatin ho sesaun traballu husi peritus iha impostu nasionál no internasionál.

OINSÁ AUTORIDADE TRIBUTÁRIA FOUN AJUDA EMA,
EMPREZAS NO NASAUN?

Autoridade Tributária foun sei hetan orientasaun husi valór haat: Integridade, Profesionalizmu, Transparénsia no Respeitu.

1 Integridade
Integridade mak hanesan fundasaun ba Autoridade Tributária foun. Integridade katak funsionáriu sira seitrata ema hotu hanesan de’it no sei aplika lei ho forma justu. No mós integridade ezije katak funsionáriusimpostu iha hahalok onestu no transparante. Ho maneira ne’e, Autoridade Tributária foun sei promove governasaun di’ak.

2 Profesionalizmu
Profesionalizmu mak hanesan xave ba susesu atu alkansa reforma tributáriu. Profesionalizmu reflete iha kompromisu naruk ho padraun a’as ba susesu. Profesionalizmu signifika asegura informasaun relasiona ho taxas impostu no prosedimentu klaru, konsistente no bele asesu lalais. Signifika, iha padraun ba
kontabilidade, auditoria no prosesamentu Tributária atu asegura katak tranzasaun hotu no rejistu hotu rai hanesan de’it, no sira sei kompatível ho prátika di’ak. Ho maneira ne’e, Autoridade Tributária foun sei apoiu kontribuinte sira hotu atu selu sira nia impostu.

3 Transparénsia
Transparénsia iha Autoridade Tributária sei promove ema atu kumpri (tuir) lei. Transparénsia signifika asegura informasaun kona-ba taxa impostu no prosedimentu sira klaru, konsistente no disponível. Ida ne’e signifika mós katak Autoridade Tributária tenke sosializa no aplika informasaun kona-ba saida mak insentivu ba ema ne’ebé kumpri lei, no saida mak sansaun ba ema ne’ebé la kumpri lei.

4 Respeitu
Respeitu sei forma baze ba hahalok funsionáriu impostu nian hatudu bainhira liga ho klientes. Respeitu signifika hatudu sensibilidade ho kompriensaun ba direitus ema ida-idak nian. Respeitu ezije katak funsionárius impostu dezempeña sira nia kna’ar ho kortezia no konsiderasaun iha tempu hotu. No ikus liu, respeitu ba kliente sira, signifika oferese servisu exelente ba kontribuintes hotu.

Autoridade Tributária foun sei:
• ajuda governu koleta reseita ho dalan ne’ebé justu no transparénsia
• hapara reseitas importante ne’ebé lakon, ne’ebé kauza husi laiha efi siénsia
• hadi’ak prestasaun servisu liu husi sistema impostu foun no hametin rekursus umanus
• simplifi ka dokumentu impostu no selu impostu nian liu husi sistema TI foun
• lori padraun kontabilidade liña ida ho prátika internasional ne’ebé di’ak
• apoiu emprezáriu sira liu husi kria ambiente ne’ebé nia legalidade seguru

Autoridade Tributária foun la simu kna’ar sira ne’e ho laran kmaan. Nia kompriende katak reforma atu asegura integridade, profesionalizmu, transparénsia no respeitu sei fasilita aplikasaun konsistente no justu ba lei. Ida ne’e sei ajuda kontribuintes, kria ambiente negósiu ne’ebé di’ak liu, no hametin ekonomia.

Mudansa hirak ne’e la akontese husi kalan ba loron. Sei lori tempu ho dedikasaun atu Autoridade Tributária alkansa padraun a’as iha integridade, profesionalizmu, transparénsia no respeitu ba klientes, ne’ebé sei presiza atu moderniza administrasaun.

Maibé mudansa akontese ona no governu komprometidu atu reforma estadu nia estrutura hirak ne’ebé presiza atu halo Timor-Leste sai nasaun ida ne’ebé tau matan ba sidadaun hotu nia nesesidades.