• Sai membro ba WTO

Home » Reforma Fiscal » Facilitasaun Komersiu » Sai membro ba WTO Imprime pájina

Sai membro ba WTO

Saida mak OMK?
Organizasaun Mundiál Komérsiu (OMK) mak hanesan ajénsia inter-governu ne’ebé regula komérsiu internasionál. Objetivu prinsipál OMK mak “asegura katak komérsiu bele la’o ho di’ak, iha serteza, no livre”.
Funsaun prinsipál OMK mak administra kriasaun no implementasaun akordu entre país membru sira. Akordu primeiru no boot liu hotu mak Akordu Jerál kona-ba Tarefas no Komérsiu (General Agreement on Tariffs and Trade – GATT) ne’ebé nasaun 23 mak asina iha tinan 1947. Nasaun hirak ne’e adopta GATT hanesan akordu kondisionál ida ne’ebé ikus mai hala’o revizaun durante tinan balun nia laran liu hosi prosesu negosiasaun. Númeru membru OMK durante tempu ne’ebá mós aumenta ba beibeik, no prosesu negosiasaun ikus (koñesidu hanesan eventu Uruguay) mós ramata, ikus mai nasaun 123 asina hamutuk. Akordu prinsipál rua seluk tan ne’ebé OMK administra mak Akordu Jerál kona-ba Komérsiu no Serbisu (GATS), no Direitu Propriedade Intelektuál (TRIPS), maibé sei iha mós akordu no/ka akordu espesiál seluk tan.
Akordu ida-idak ne’ebé OMK administra iha regras no komitmentu barak kona-ba oinsá hala’o komérsiu internasionál iha setór ida-idak, tipu sasán no serbisu, no inklui mós grupu individuál ho sira nia serbisu, ne’ebé nasaun membru hotu-hotu tenke hala’o tuir. Buat hirak ne’e bele inklui mós, hanesan ezemplu: komitmentu atu hatún taxa ba nivel tuir akordu (ka bele mós halo halakon taxa) iha períodu definidu nia laran; komitmentu atu limita apoiu internál (hanesan subsídiu) ba atividade balun ne’ebé bele afeta komérsiu internasionál; no estandarizasaun ba kualidade sasán no serbisu ne’ebé tenke tuir atu nune’e bele kompete ho maneira justu no seguru.
OMK hakru’uk ba konsensus, no akordu tomak OMK nian obrigatoriu atu hala’o. Ne’e atu hateten katak, membru tomak tenke hakru’uk no halo tuir akordu hotu-hotu OMK nian ne’ebé sei ativu iha tempu adezaun hala’o no ba futuru, no membru nasaun hotu tenke konkorda hamutuk iha prazu ida nia laran atu halo akordu foun ruma ka halo revizaun ba akordu ne’ebé iha ona.
Iha realidade, OMK hanesan forum ida ne’ebé halo akordu komérsiu, diskute, habelar, ka modifika, no hanesan fatin ne’ebé rezolve konflitu ne’ebé mósu durante implementasaun. Komisaun téknika no departamentus iha organizasaun nia laran mós fó asistensia téknika ba nasaun membru sira, hala’o fiskalizasaun kona-ba polítika komérsiu nasaun membru sira, no administra relasaun no koperasaun entre OMK no organizasaun internasionál seluk.

Tansa nasaun sira sai membru OMK?
Iha razaun barak mak nasaun sira hakarak sai membru OMK; razaun primeiru no klaru liu mak asesu ba merkadu. Nu’udar sai membru OMK, nasaun sira fasilita teb-tebes asesu ba sira nia esportasaun ba nasaun iha mundu tomak. Ne’e importante tebes ba nasaun ki’ik hanesan Timor-Leste ne’ebé iha merkadu ladún boot iha rai laran no hakarak hetan asesu ba merkadu internasionál atu haburas ekonomia sustentavel.
Razaun segundu katak sai membru OMK ne’e efetivu liután. Aspetu barak iha komérsiu internasionál, hosi tarefas no kuota to’o kestaun estandar kualidade, propriedade intelektuál, no seluk tan, inklui mós manifestasaun kestaun hirak ne’e tuir setór ida-idak, tipu sasán ne’ebé espesífiku iha komérsiu. Realidade katak iha parseiru komérsiu potensiál barak tebes iha nasaun ida-idak. Maibé, merkadu modelu hanesan ne’e ladún di’ak, kuaze imposivel, ba nasaun kualkér ida atu tuir lista regulamentu komérsiu ho rai ida-idak. Tan ne’e, sai membru OMK hanesan vantajem boot ida atu bele iha akordu jerál ne’ebé vigora iha nasaun membru tomak (inklui mós parseirus potensiál sira) no iha tempu hanesan sai mós maneira efetivu liu tan atu hala’o negosiasaun komérsiu, mezmu ita kompara ho alternativu seluk hanesan akordu negósiu bilaterál, ezemplu hanesan bloku/uniaun komérsiu sira.
Razaun terseiru sai membru OMK tanba OMK oferese garantia katak produtu no kompañia sire sei hetan oportunidade hanesan no sei tuir OMK nia regra kuandu sira serbisu iha nasaun membru seluk. Prinsípiu “Nasaun Mais Favoravel” ezije katak negosiasaun di’ak ruma entre kualkér nasaun membru rua tenke mós aplika ba nasaun membru OMK seluk.
Razaun haat sai membru OMK mak asesu ba mekanizmu rezolusaun disputa ne’ebé justu. Wainhira nasaun membru ida sente katak nasaun membru seluk la tuir regulamentu OMK, se bele iha asesu ba mekanizmu rezolusaun disputa iha Dispute Settlement Understanding ne’ebé independent no iha ema ho kapasidade atu fó dalan ba rezolve disputas bazeia ba análize tuir akordu no komitmentu sira.

Razaun saida mak importante ba Timor-Leste atu sai membru OMK?
Importante ba Timor-Leste sai membru OMK tanba ita avansadu ona iha liberalizasaun komérsiu, maibé seidauk goza previlegius, protesaun, no benefísius OMK oferese/garante. Timor-Leste iha ona tarefa uniformál ne’ebé ki’ik tebes (2.5%), ho exepsaun mínimu no laiha kuota. Nune’e, sai membru OMK sei fó garantia ba Timor-Leste atu goza asesu ba merkadu ne’ebé daudaun ne’e limitadu, maibé sei sa’e aas liutan. Nia mós sei fó garantia importante kona-ba normas no estandar ne’ebé importasaun tama rai-laran tenke halo tuir, no mekanizmu atu rezolve disputas ne’ebé mosu ho nasaun membru seluk. OMK mós sei oferese asisténsia téknika atu fó tulun iha aspetu komérsiu ne’ebé OMK oferese.
Ikus liu, maibé mós importante liu, katak sai membru OMK hatudu ita nia sinál klaru no komitmentu atu dezenvolve no implementa pplítika komérsiu ne’ebé kompriensivu no modernu. Prosesu sai membru OMK persiza mós esforsu no asaun lalais Timor-Leste nian bazeia ba komitmentu atu kria regulamentu, leis no ambiente estruturadu ba komérsiu tuir estandar internasionál.

Saida mak sai hanesan responsabilidade membru OMK?
Responsabilidade prinsipál membru OMK mak atu hala’o komérsiu internasionál tuir akordu ho OMK. Akordu ne’ebé refere inklui mós komérsiu bems/sasán no serbisu no mós propriedade intelektuál.
Nasaun membru mós konkorda atu partisipa ativu iha negosiasaun komérsiu ne’ebé halo parte Konsellu Jerál ka Konferénsia Ministeriál. Órgaun hirak ne’e hasoru-malu periódikamente atu diskute kona-ba asuntu komérsiu internasionál. Konsellu Jerál hasoru malu dala balun iha tinan ida nia laran, no Konferénsia Ministeriál hasoru malu pelumenus dala ida iha tinan rua nia laran.
Ikus liu, katak membru ida-idak tenke kontribui ho osan ba Orsamentu Jerál OMK, ne’ebé sei kalkula bazeia ba nasaun ida nia kbiit iha komérsiu internasionál.

Oinsá adezaun ba OMK iha ligasaun ho sai membru ASEAN?
Iha kestaun ligadu/overlap entre rekizitus adere ba ASEAN no sai membru OMK. Iha realidade katak akordu kona-ba komérsiu ba bens no serbisu ho ASEAN liu-liu bazeia ba regras OMK. Maibé, rekizitus adezaun ba ASEAN abranje liu tan tanba ezijénsia ba komitmentus relasiona ho investimentu.
Diferensa prinsipál entre rua ne’e mak nivel fleksibilidade iha komitmentus no númeru parte negosiantes. Atu sai membru ASEAN, iha okaziaun barak mak halo deklarasaun komitmentu atu implementa polítika ida mós bele sufisiente ona. Maibé adezaun ba OMK, rekizitus tenke kompleta ona antes adezaun ou tenke iha evidénsia ne’ebé afirma pasu ne’ebé kumpri ona.
Prosesu sai membru OMK kompleksu tebes maibé relativamente klaru.
Prosesu ne’e envolve etapa neen:
(1) nasaun ida tenke aprezenta no hakerek nia pedidu atu sai membru ba Konsellu Jerál OMK nian, ne’ebé sei harii Ekipa Serbisu;
(2) nasaun depois entrega Memorandum kona-ba Rejime Komérsiu Estranjeiru, inklui mós informasaun kona-ba istória nasaun, geografia, situasaun polítika, relasaun ho rai liur, no seluk tan, importante liu mak informasaun kona-ba ekonomia no polítika seluk ne’ebé iha impaktu diretu ka la diretu, agora ka mai oin ba komérsiu internasionál;
(3) Ekipa Serbisu sei halo negosiasaun ho nasaun kona-ba “Kondisaun atu Tama”, lista polítika, lei, no mudansa estruturál ne’ebé persiza atu kondús ho OMK nia akordu no regras, no mós tempu ba implementasaun;
(4) nasaun mós tama iha negosiasaun bilaterál ho membru Ekipa Serbisu sira, no nia rezultadu sei automátikamente aplika ba membru nasaun seluk;
(5) “pakote adezaun” finál, inklui mós minutas, komitmentus ne’ebé konkorda ona, kondisaun antes tama, tempu atu implementa, tempu ba asesu merkadu, no seluk tan, sei prepara no sei hato’o ba Konsellu Jerál atu halo aprovasaun, no (6) Konsellu Jerál sei konsidera no aprova pakote adezaun.
(6) prosesu adezaun ba ASEAN ne’e simples liu, maibé ladun klaru.
Buat hotu ne’ebé persiza ba nasaun ida atu sai membru ASEAN mak presiza membru tomak konkorda katak nasaun ne’e prenxe rekizitus tomak atu bele hola parte komunidade ASEAN. Maibé, rekizitus hirak ne’e fahe ba tratadu no mós protocol no akordu oi-oin: laiha “lista klaru” ba adezaun. Iha prinsípiu 14 ne’ebé publika ona ke membru sira tenke tuir, inklui mós “halo tuir regras komérsiu multilaterál no regras ASEAN…minimiza to elimina obstákulu ba integrasaun ekonomia rejionál, iha ekonomia bazeia ba merkadu”; ne’e klaru katak nasaun ida tenke halo tuir lai regulamentu OMK uluk antes adere ba ASEAN.