• Reforma Alfandega hodi facilita negocio

Home » Reforma Fiscal » Facilitasaun Komersiu » Reforma Alfandega hodi facilita negocio Imprime pájina

Reforma Alfandega hodi facilita negocio

Timor-Leste nasaun ida ne’ebé hetan bensaun ho rekursu naturál ne’ebé barak tebes, inkluindu mina no gas. Enkuantu mina no gas finansia nasaun ida ne’e ninia kresimentu desde independénsia, tempu to’o ona atu Timor-Leste realiza ninia potensia iha area sira seluk hodi diversifika ninia ekonomia no redús ninia dependénsia ba mina. No ida ne’e signifika fasilita negósiu sira hodi kria oportunidade investimentu.

Liu husi prosesu reforma ekonómika no fiskál, governu sei rezolve obstákulu legál no obstákulu administrativu sira ne’ebé iha hodi fasilita di’ak liu tan negósiu. Lei foun sira kona-ba atividade investimentu no atividade komersiál sei kria ambiente regulatóriu ida seguru ba investidór sira. No liu husi reforma ida profunda ba alfándegas sei hamenus konjestaun, redús atrazu, no kria transparénsia ne’ebé importadór sira hakarak.

Hanesan pontu entrada dahuluk ida ba kualker nasaun, ita prezisa administrasaun alfándega efisiente no estável hodi fasilita atividade komérsial sira. Durante períodu tinan ha’at (2014-2018), sei halo revizaun no melhoramentu ba áreas hotu-hotu ne’ebé prosesa no hasai husi administrasaun Alfándega nian hodi:
• atrai investimentu iha Timor liu husi halais importasaun no esportasaun sasán ba
negósiu sira.
• fasilita komérsiu rejionál no internasionál.
• tulun governu hodi kolekta reseita ho maneira ida justu no transparente.

Saida maka reforma Alfándega?
Reformas katak atividade lubun ida hodi hasa’e efisiénsia Alfándega liu husi simplifika no estandariza prosesu hotu-hotu tuir prátika diak. Atividade hirak ne’e inklui:
• Moderniza Kódigu Prosedimentu Alfándega tuir prátika di’ak internasionál nian.
• Atualiza kódiku internasionál Timor-Leste nian ba sasán tuir padraun ASEAN nian.
• Introdús ASYCUDA World; moderniza sistema IT hodi fasilita prosesu importasaun
sasán no mós hametin liu tan integridade Alfándega.
• Fó treinamentu ba despaxante aduaneira hodi hadi’a prestasaun servisu iha indústria refere.
• Estabelese prosesu auto-avaliasaun hodi simplifika liberasaun sasán.
• Estabelese desizaun avansada ba importadór sira hodi hasa’e konfiansa husi
negósiu sira.
• Fornese treinamentu espesializadu ba ofisiál sira hodi tulun sira iha prosesu foti-desizaun legál.
• Dezenvolve Prosedimentu Operasionál Estandarizada (SOP) hodi fornese serteza iha desizaun sira.
• Dezenvolve no implementa estratéjia treinamentu no kapasitasaun ba ofisiál Alfándega sira bazeia ba Kódigu Prosedimentu Alfándega.
• Implementa integrasaun kompletu tempu reál ida entre plataforma xave software hanesan IFMIS (Sistema Integrada Jestaun Sistema Informasaun), SERVE, ASYCUDA World, Sistema IT administrasaun tributária no PBS.
• Hametin operasaun karga Alfándega iha aeroporto no fonteira terestre.
• Hadi’ak prosesu rezolusaun disputa iha Alfándega.

Saida de’it maka sai hanesan susesu boot to’o agora?
• Kódigu Prosedimentu Alfândega atualizadu.
• Sistema 2012 kompletamente hamonizada no estandarizada tuir ASEAN.
• Faze 1 ASYCUDA WORLD hahú.
• Auto-avaliasaun ba Projetu pilotu prosesamentu elektróniku ba kontainer hahú.
• Estrutura Unidade intelejénsia remata.
• Treinamentu ba despaxante remata.

Oinsá maka Alfándega sei hasa’e transparênsia?
Kódigu Prosedimentu Alfándega foun sei fó sai ho loloos saida de’it maka poder Alfándega nian no mós klarifika saida maka sira bele no labele halo.

Alfándega sei presiza esplika razaun ba atrazu iha prosesamentu kargu no responsabiliza ba desizaun sira seluk hanesan prende sasán ka la fó lisensa
no importadór sira sei iha direitu ba prosesu formál de rekursu.

Alfándega sei iha obrigasaun hodi konsulta ho públiku esbosu regulamentu, diretiva
ka kualkér mudansa ne’ebé halo ba Kódigu hodi fó biban ba seitor privadu no públiku oportunidade hodi fó komentáriu ba proposta mudansa sira ne’e molok formaliza sira.

Alfándega sei tenke hato’o esplisitamente ba importadór no esportadór sira informasaun saida maka sira presiza, inkuindu kontas ba prosesu auditoria.

Lei sei rekere Alfándega atu fornese fatin fornesimentu informasaun gratuita ida. Sei estabelese sentru atendimentu ida hodi atende importadór no esportadór sira.

Oinsá maka teknolojia sei fasilita negósiu?
Iha reforma ASYCUDA, sistema IT existente sei iha prosesu atualizasaun ba sistema ASYCUDA World. Agora daudaun iha Timor, kada kontentór hetan pasa-revista husi Alfándega, ne’ebé interompe tiha abilidade hodi prosesa sasán lalais no kria kustu adisionál ba importadór sira. ASYCUDA World sei tulun determina kontentór ida ne’ebé maka tenke hetan pasa-revista ba no kontentór ida ne’ebé maka la presiza halo pasa-revista liu husi kriasaun ‘perfíl’ kompañia no kontentór.

Perfíl hirak ne’e maka sei asegura katak sasán sira ne’e legál ka ilegál ka importadór ida presiza pasa-revista liu tan antes fó lisensa ba nia hodi lori sasán tama. Ida ne’e maka sistema ida efisiente liu hodi tulun alfándega determina kontentór ida ne’ebé
maka presiza pasa-revista ba.

Kada etapa iha prosesu hodi importa sasán, hahú husi deklarasaun ba prosesamentu to’o ba kolekta reseitas sei halo elektrónikamente. Sistema IT foun hirak ne’e sei hamenus tempu prosesamentu iha Alfándega ba de’it oras 12-36 ba karga ne’ebé
kumpri ona prosedimentu. Ba karga sira ne’ebé maka la kumpri prosedimentu
(non-compliant cargo), karga sira ne’ebé seidauk deklara loloos ka hetan marka hanesan deskonfia iha perfíl, sei tama liu tan ba prosesu investigasaun.

Oinsá maka Alfândega prodús data komersiál importante sira?
Kompañia nasionál no internasionál sira sei depende ba dadus estatístikas komersiais publikada hodi halo sira nia planeamentu negósiu, investimentu negósiu dezenpeñu negósiu hodi foti desizaun. Papél ida husi Alfándega maka prodús dadus importasaun no esportasaun importante no oportunu (lalais). Dadus ida ne’e haruka ba Entidade Estatístika ne’ebé sei halo análize ba informasaun hirak ne’e no publika ninia rezultadu.

Sistema Harmonizada ne’ebé estabelese espesifikamente ba Timor-Leste sei prodús
informasaun relevante liu ba negósiu nasionál no internasionál. No tanba Sistema Harmonizada ne’e aliña ba ASEAN, negósiu sira bele fasilmente kompara dadus husi Timor-Leste ba dadus sira husi nasaun sira seluk iha ASEAN. Ida ne’e informasaun ida utíl tebes-tebes ba negósiu sira no sei tulun atrai investimentu barak liu tan mai Timor-Leste.

Oinsá maka Alfándega suporta Timor-Leste nia adezasaun ba membru ASEAN?
Enkuantu Timor-Leste seidauk sai membru ida husi Organizasaun Mundiál Komérsiu (OMK), governu hahú daudaun adapta prátika komersiál no prátika ekonómika sira hodi kumpri tuir artigu barak ne’ebé hakerek iha Akordu Fasilitasaun Komérsiu OMK. Kódigu Prosedimentu Alfándega foun kumpri Akordu Fasilitasaun Komérsiu OMK, hodi tulun Timor-Leste kria prosedimentu sira ne’ebé sei kontribui ba Timor-Leste nia adezaun ba ASEAN. Tuir Akordu Fasilitasaun Komérsiu, Timor-Leste presiza adopta polítika sira tuir mai ne’e hodi fasilita komérsiu:
• Publika no halo disponível iha ínternet informasaun kona-ba regra/regulamentu sira ne’ebé importadór no esportadór sira tenke kumpri wainhira halo importasaun no esportasaun. KRF dezenvolve hela website foun Alfándega nian, ne’ebé sei regularmente hetan atualizasaun.
• Ajénsia nasionál fronterisia sira tenke konsulta no fó oportunidade ba públiku hodi fó komentáriu molok introdús regra/regulamentu foun.
• Alfándega tenke halo disponível desizaun advansadu sira bazeia ba klasifikasaun kódigu.
• Alfándega tenke dezenvolve prosedimentu rekursu legál ida.
• Ajénsia fronterisia no karantina tenke aplika taxa no enkargu ne’ebé refleta duni kustu atuál hodi fornese servisu no ne’ebé estandarizadu.
• Ajénsia fronterisia sira tenke koopera ba malu no koordena sira ninia atividade hodi fasilita komérsiu.
• Alfándega sei estabelese akordu kooperasaun ho Alfándega iha nasaun sira seluk no estabelese Komité Fasilitasaun Komérsiu Nasionál ida. Timor-Leste atu hahú estabelese komité ida ne’e.
• Hala’o no publika estudu regulár. Dezde tinan 2014, Timor-Leste hala’o tiha ona estudu publikadu tolu hodi sukat no hadi’a efisiénsia.
• Timor-Leste sei estabelese janela únika ida, signifika negosiante sira presiza submete de’it dokumentu no dadus sira ne’ebé presiza dala ida de’it, ne’ebé sei uza husi Alfándega no ajénsia fronterisia hotu-hotu. Alfándega no Karantina iha Timor-Leste sei hetan re-alokasaun hodi fasilita prosesu janela únika ida ne’e. Sei iha janela únika ida ba ASEAN no janela únika ida ba CPLP hodi fasilita komérsiu entre rejiaun no nasaun CPLP sira.

Oinsá Alfândega suporta nasaun CPLP sira iha rejiaun ASEAN?
Aleim de inisiativa sira hodi suporta adezaun ba membru ASEAN, reforma hirak ne’e mós sei suporta no hadi’ak komérsiu entre nasaun CPLP sira. Reforma alfándega sira ne’e sei dezenvolve janela únika ida ba nasaun CPLP sira, ne’ebé sira sei liga diretamente ba janela únika ida ASEAN nian hodi hasa’e asesu komersiál ba merkadu ba seitor turizmu, agrikultura, pekuária, forestra, peska, mineira, fábrika (manufatura), indústria no mina no gas.