• JANELA ÚNIKA NASIONÁL

Home » Reforma Fiscal » Facilitasaun Komersiu » JANELA ÚNIKA NASIONÁL Imprime pájina

JANELA ÚNIKA NASIONÁL

SAIDA MAK JANELA ÚNIKA NASIONÁL?
Janela Únika Nasionál mak portál alfándega nian ne’ebé komersiante sira bele submete dokumentu hotu-hotu ne’ebé relasiona ho komérsiu no bele asesu ba informasaun hotu-hotu ne’ebé relevante ho komérsiu liu husi portaun eletrónika ida de’it. Portál ne’e liga Autoridade Aduaneria sira ho ajénsia governu hotu-hotu nian ne’ebé servisu iha area movimentu ema ka sasán sira, inklui impostu, imigrasaun, kuarantina, saúde, transporte, agrikultura, péska, negósiu estranjeiru no Banku Sentrál.

Sistema Janela Únika Nasionál nu’udar aproximasaun ida ne’ebé inovativu no imparsiál ba prosesamentu merkadoria iha fronteira no libertasaun sasan. Nasaun barak iha mundu tomak adopta sistema Janela Unika Nasionál tanba prova ona katak nia fasilita liu komérsiu.

OINSÁ MAK JANELA ÚNIKA NASIONÁL AJUDA KOMERSIANTE SIRA?
Tradisionalmente, bainhira komersiante sira hakarak atu importa ka esporta sasán sira, sira tenke submete ona informasaun ne’ebé hanesan dala barak ka beibeik ba entidade governu sira. Dala ruma dokumentu hirak-ne’e tenke submete tiha eletrónikamente, dala ruma iha surat-tahan. Ne’e han tempu, dala barak ho kustu, iha tan oportunidade atu halo sala ka erru, no halo prosesu komersializasaun ne’e difisil.

Sistema Janela Únika Nasionál automatiza no simplifika ida-ne’e tanba permite komersiante sira atu submete informasaun hotu-hotu ne’ebé relasiona ho importasaun, esportasaun, no tránzitu nian ne’ebé rekeridu husi ajénsia reguladór sira liuhusi portaun eletrónika ida de’it. Elimina surat tahan no fo informasaun ne’ebé loloos no konsistente ba komersiante sira.
Janela Únika Nasionál ne’e mós permite komersiante sira atu asesu ba regulamentu, regra, prosedimentu sira, lista kustu nian no fo asesu ba formuláriu sira hotu ne’ebé relevante ho komérsiu husi ajénsia sira jestaun fronteira nian liuhusi ‘user-friendly website’ ida.

TIMOR-LESTE SEI IHA JANELA ÚNIKA NASIONÁL KA LAE?
Alfandegas hahú hatuur ona baze hodi dezenvolve Timor-Leste nia Janela Unika Nasionál nuudar parte ida husi programa Reforma Fiskál Governu nian atu estabelese Autoridade Aduaneira ida ne’ebé modernu no profesionál no hadi’a fasilitasaun ba komérsiu.

Pasu dahuluk hala’o tiha ona hodi eleva sistema IT Alfándega nian ba ASYCUDA Mundiál hodi automatiza prosesu alfándega nian no kria Janela Únika Alfándega. ASYCUDA Mundiál mak sistema komputadór jestaun integrada ne’ebé sei moderniza alfándega.

Programa pilotu iha hela prosesu hodi haluan progresivamente komersiantes ka intituisoens sira nebe preciza uza sistema ASYCUDA Mundiál. Agora dadaun kompania navegasaun/roahi no despaxante sira submete ona sira nia manifestu eletronikamente. Faze pilotu ida ne’e permite mós atu rekruta ofisiál nasionál IT nian hodi treina no kapasita ofisiais Alfándega atu uza ASYCUDA Mundiál.

Treinamentu no Kapasitasaun prosesu ida nebe preciza kontinua halo iha nível prátika no téknika wainhira Alfandegas habelar sistema ba utilizadór barak liu tan iha setór públiku no privadu. Pasu tuir mai mak sei tau ASYCUDA iha portu, aeroportu no karantina hodi uza sistema ASYCUDA Mundiál atu prosesu informasaun hotu-hotu ne’ebé relasaun ho komérsiu no tranzasaun. Alfándega mós servisu hamutuk ho Banku Sentrál no banku seluk atu introdús pagamentu eletróniku ne’ebé uza sistema ASYCUDA. Utilizadór sira seluk sei inklui progresivamente atu garante fasilitasaun komérisu.

Janela Únika Nasionál estabelesido no metin ona bainhira komersiante, públiku no instituisaun privadu sira hotu-hotu involve iha importasaun no esportasaun uza sistema ASYCUDA Mundiál.

BENEFÍSIU SAIDA MAK JANELA ÚNIKA NASIONÁL NE’E LORI MAI TIMOR-LESTE?
Janela Únika Nasionál ne’e sei benefisia Timor-Leste iha dalan ka mekanizmu barak. Nia sei:
• fornese ba operadór komérsiu no transporte sira submisaun ida de’it ba dokumentu sira komérsiu nian no informasaun hodi prienxe rekizitus reguladór sira hotu iha importasaun, esportasaun no tránzitu
• eleva kooperasaun entre Alfándega sira, ajénsia governu sira seluk no autoridade kontrolu fronteira sira atu bele partilla dokumentu sira eletrónikamente no estabelese prosedimentu komún sira ba prosesamentu no kontrolu atu fasilita komérsiu
• eleva kolesaun rendimentu
• habadak tempu sira ba libertasaun iha fronteira terrestre, portu no aeroportu sira
• fornese informasaun estatístika komérsiu esternu nian iha tempu reál
• jerálmente, hamenus kustu hala’o negósiu iha Timor-Leste
• hamenus sala ka erru sira
• hadi’a transparénsia, integridade no ajuda proteze Timor-Leste nia fronteira sira no reseita doméstika

SAIDA MAK JANELA ÚNIKA ASEAN?
Janela Únika ASEAN nu’udar inisiativu rejionál ida, ne’ebé liga no integra estadu membru ASEAN nian iha Janela Nasionál Ida. Objetivu mak atu halo komérsiu entre membru estadu ASEAN nian fasil liu no atu aumenta integrasaun ekonómiku iha ASEAN nia laran.

Janela Únika ASEAN sei asegura katak estadu sira ASEAN bele troka informasaun ba malu ho ne’ebé seguru no konfiansa, nomos ho parseiru komersiál sira seluk hotu mak uza padraun internasionál.

Se nasaun ida hakarak halo komérsiu ho nasaun ruma iha ASEAN, sira bele ba Janela Únika ASEAN hodi asesu ba informasaun kona-ba komersiu nian no hatama dokumentu via eletrónika. Janela Únika Nasionál Timor-Leste sei apoia Timor-Leste ninia tentativa hodi tama ba ASEAN.

HAREE BA FUTURU: IMPLEMENTASAUN JANELA ÚNIKA CPLP
Lokalizadu iha rejiaun ASEAN no nudar membru komunidade CPLP, Timor-Leste mak únikamente pozisionadu hodi liga ba merkadu globál ida ho ema billiaun 2.4.

Oinsá mak nia atu halo ida-ne’e?
Timor-Leste agora daudaun promove hela no servisu hamutuk ho nasaun membru CPLP atu estabelese Janela Únika CPLP ne’ebé sei integra prosedimentu komérsiu entre nasaun sira CPLP nian atu nune’e bele halo ligasaun CPLP ba rejiaun ASEAN. Timor-Leste ninia vizaun atu realiza potentisia no prosperidade longu prazu nu’udar ligasaun ida entre merkadu sira ASEAN no CPLP nian.

Reforma alfándega, tributáriu no komersiál sira ne’ebé agora akontese daudaun mós sei permite Timor-Leste atu ekonómikamente integra ho estadu membru ASEAN no nasaun sira seluk ne’ebé iha akordu komersiál ho ASEAN; Xina, Japaun, Korreia do Súl, Austrália, Índia, no Nova Zelándia.