• Funsiunáriu MF hasoru-malu ho PM indijitadu VI Governu Konstitusional RDTL

Home » Announcements » Funsiunáriu MF hasoru-malu ho PM indijitadu VI Governu Konstitusional RDTL Print Page

Funsiunáriu MF hasoru-malu ho PM indijitadu VI Governu Konstitusional RDTL

Ministériu Finansa hetan previléjiu bo’ot ida hodi hasoru malu ho Primeiru Ministru indijitadu, Dr. Rui Maria Araújo iha loron Sesta, 13 Fevereiru 2015, iha salaun Knowledge Centre, Ministériu Finansa. Enkontru kuaze oras tolu ne’e, partisipa husi DJ, DN, Kordenador no funsiunariu tomak Ministériu Finansa nian no lidera direitamente husi Ministra indijitada, Sra. Santina Cardoso no Vice Ministru indijitadu, Sr. Helder Lopes.

Ministra no Vice Ministra, iha sira ninia intervensaun badak, agradese ba PM indijitadu, ne’ebé fo fiar ba sira nain rua hodi asume kargu bo’ot iha Ministériu Finansa nian. Sira nain-rua mos agradese ba funsiunariu hotu ne’ebé durante ne’e servisu diak tebes no kontinua husu no konta nafatin ba funsiunariu sira atu servisu diak liu tan ba tinan rua ho balun oin mai.

Dr. Rui hahú ninia intervensaun hateten katak konjuntura polítika ne’ebé akontese daudaun iha ita nia rain ne’e buat ida foun tebes iha mundu. Nia dehan historia Timor nian hatudu ona katak mudansa bo’ot estratéjia funu hodi involve ema hotu iha prosesu unidade nasional ikus mai lori duni Timor-Leste ba ukun-rasik-an. Agora istoria repete dala ida tan, tamba ba kauza nasional ida – liberta povu – ema hotu tenki hamutuk dala ida tan iha unidade nasional hodi servisu hamutuk atu lori moris diak ba povu Timor-Leste.

Iha parte seluk, Dr. Rui konsidera Ministériu Finansa hanesan viveiru ida ne’ebé hamosu futurus lideres ba nasaun ida ne’e. Tan ne’e tuir nia, futurus lideres, nu mínimu, presiza iha koñesimetu ida diak konaba jestaun finansas públikas. Nia konsidera Ministériu Finansa hanesan fatin diak ida hodi aprende konaba ida ne’e. Tan ne’e, nia agradese tebes ba oportunidade ne’ebé Ministériu Finansa fo ba nia durante tinan ne’en nian laran wainhira servisu hanesan asesor ba iha área polítika rekursu humanu.

Dr. Rui, ne’ebé antes ne’e asume mos kargu hanesan koordenador hodi tau matan ba Sentru Treinamentu Ministériu Finansa, iha ninia intervensaun informa katak reforma bo’ot ne’ebé nia sei halao iha tinan rua ho balun oin mai maka asegura selesaun bazeia ba méritu no efisiénsia iha finansas públikas. Atu atinji objetivu reforma da-ruak ne’e, nia propoin atu hamenus despezas públikas deznesesárias. Tuir nia, tempu to’o ona atu ita aliña ita nia despezas ho ita nia rendimentu.

Nia mos akresenta importânsia husi utilizasaun Informasaun Teknolojia (IT) iha servisu fatin, liu-liu iha seitor públiku. Tan ne’e, parte ida husi reforma iha ninia governasaun maka oinsa atu asegura entidades públikas hotu iha asesu ba IT, mínimu outlook, hodi tulun sira halao sira nia servisu ho diak no liu-liu atu sira hetan asesu ba informasaun. Dr. Rui mos rekoiñese katak implementasaun ba reformas laos fasil. Maibe ita tenki hahú agora. Tuir nia, esforsu no reforma hotu ne’ebé sei implementa mai ho objetivu ida maka atu fornese servisu ne’ebé diak ba ita nia povu.

DJ, DN no Koordenador sira iha sira ninia intervensaun felisita nomesaun Dr. Rui Araújo, Sra. Santina Cardoso no Sr. Helder Lopes ba kargu PM, Ministra no Vice Ministru Finansa. Sira dezeja susesu no prontu atu kontinua fo suporta ba sira hodi halao kna’ar bo’ot ne’ebé sira hetan. Enkontru amigável ida ne’e remata ho funsiunariu sira hasai foto hamutuk ho PM, Ministra no Vice Ministru Finansa