• Governu Hala’o Semináriu Jestaun Finanseira Públika ba Kresimentu no Dezenvolvimentu Sustentável

Home » Anúnsiu » Governu Hala’o Semináriu Jestaun Finanseira Públika ba Kresimentu no Dezenvolvimentu Sustentável Imprime pájina

Governu Hala’o Semináriu Jestaun Finanseira Públika ba Kresimentu no Dezenvolvimentu Sustentável

Dili, 28 Fevereiru, 2019 – Timor-Leste, ho apoiu husi Primeiru Ministru, hala’o ona Semináriu kona-ba Jestaun Finanseira Públika durante loron rua 14-15 Fevereiru 2019. Semináriu ne’e atu define xave prioridade jestaun finanseira públika ba Timor-Leste hodi konsidera iha Governu nia Relatóriu kona-ba Jestaun Finanseira Públika. S.E. Primeiru Ministru, Taur Matan Ruak hatete “Semináriu ne’e importante ba Governu atu fortifika kuadru despeza públika ne’ebé importante ba kresimentu no dezenvolvimentu sustentável, liu-liu atu kria servisu no redús probreza”.

Semináriu ne’e halibur partisipantes 170 husi setór ne’ebé luan, profisionál sira governu nian no reprezentante Munisipíus nune’e mós instituisaun supervizór sira hanesan, Membru Parlamentu husi Komisaun C no D, Tribunal de Contas, Provedoria Direitus Umanus no Justisa, Komisaun Anti-Korrupsaun, Polísia Sientífika Investigasaun Kriminál, Inspetór Jerál Estadu no Auditoria Interna Ministériu Finansas nian.


Ministru Reforma Lejizlativa no Asuntus Parlamentares, Fidelis Magalhães iha diskursu ba abertura hatete, “reformas jestaun finanseira halo ba governu tomak ho natureza ne’ebé espesializada, labele implementa iha sentrál liu husi ajénsia úniku ida, presiza iha koordenasaun di’ak no iha sekuénsia apropriadu hodi servisu hamutuk iha maneira koerente no konsistente”.

Membru Parlamentu no Xefe Komisaun Finansa Públiku, Fernanda Lay hatete “ha’u kontente ho prosesu ne’ebé komesa ona no espresa ha’u nia apou másimu ba programa reforma”.

Semináriu ne’e hetan aprezentasaun husi ADB, IMF, Banku Mundial, no OECD kona-ba konseitu Jestaun Finanseira Públika bazeia ba asisténsia téknika ne’ebé fornese ona iha tempu pasadu nune’e mós fahe esperiénsia husi rejionál no globál, liu-liu hetan esperiénsia husi Kamboja.

Partisipantes rona husi Sekretáriu Jerál Ministériu Ekonomia no Finansa husi Reinu Kamboja katak “Programa Reforma Jestaun Finanseira Públika hanesan misaun ida ne’ebé kompleksu no naruk no presiza komitmentu maka’as husi parte interesadu sira, liu-liu lideransa governu nian atu atinje objetivu komún hodi promove prestasaun servisu públiku no hadi’a padraun vida sidadaun nian”.

Koñesimentu fahe husi espesialista sira hotu kona-ba propózitu, konseitus no prosesu fornese elementus xave hodi foka iha programa reforma Jestaun Finanseira Públika. Ezemplu, Profesor Ehtisman Ahmad, (London School of Economics, Bonn and Zhejiang Universities and Chinese Academy of Fiscal Science) informa katak “Sistema Jestaun Finanseira Públika ne’ebé modernu tenke hadi’ak governansa no instituisaun sira ho informasaun di’ak liu, hodi nune’e Governu bele alkansa nia objetivu ba desentralizasaun ida ho responsabilidade, kresimentu sustentável no kria kampu servisu”.

Enkuantu Sanjay Vani, Espesialista Jestaun Finanseira ba Banku Mundiál iha Washington hatete “Xave prinsipál rua husi reforma Jestaun Finanseira Públika iha mundu tomak iha dékada rua ikus ne’e indika katak presiza iha sentidu prosperiedade nasionál no kompromisu ba reforma ho 100%, nune’e mós koordenasaun efetivu entre doadór sira no parte interesadu sira hodi apoia Timor-Leste nia faze tuir mai iha reforma Jestaun Finanseira Públika”.

Faze tuir mai mak ekipa konjunta ba Avaliasaun PEFA Ministériu Finansas no Banku Mundiál atu valida rezultadu PEFA ho parte interesadu hotu no divulga nia konkluzaun iha tempu badak.

Governu hakarak rekoñese no agradese instituisaun multilaterál no bilaterál sira hotu ba sira nia apoiu iha realizasaun Semináriu Jestaun Finanseira Públika ne’e no ba partisipante sira hotu ne’ebé envolve ativu iha Semináriu ne’e.

Atu hetan tan informasaun, kontakta: Cecilia Tilman Gonçalves, Komisaun Reforma Fiskal,
iha +670 7727 6436, ctgoncalves@mof.gov.tl