• Governu Aprova Tetu Agregadu no Dezagregadu Orsamentu Jerál Estadu tinan 2021

Home » Announcements » Governu Aprova Tetu Agregadu no Dezagregadu Orsamentu Jerál Estadu tinan 2021 Print Page

Governu Aprova Tetu Agregadu no Dezagregadu Orsamentu Jerál Estadu tinan 2021

Palasiu Governu, Loron 13 fulan-Outubru tinan 2020- Governu liuhusi reuniaun Konsellu Ministru aprova ona tetu agregadu no dezagregadu Orsamentu Jerál Estadu (OJE) tinan 2021 ho montante totál, dolar amerikanu bilaun 1,895 ne’ebé aprezenta husi Vise-Ministra Finansas, Sara Lobo Brites, ne’ebé inklui empréstimu sira, hodi kobre ba nesesidade husi programa no prioridade nasionál sira ne’ebé define ona husi Governu Konstitusionál VIII. Liuliu iha nivel dezenvolvimentu kapitál sosiál, dezenvolvimentu ekonómiku, ne’ebé aliñada ho medida sira ne’ebé tau ona iha Planu Rekuperasaun Ekonomika, dezenvolvimentu infrestrutura bázika fundamentál, dezenvolvimentu ambientál, dezenvolvimentu institusionál no prosesu kona-ba reforma institusionál sira ne’ebé la’o hela.

“Husi montante totál OJE 2021, millaun 239,26 korresponde ba saláriu no vensimentu, millaun 421,49 refere ba bein no servisu, millaun 669,91 ba transferénsia públika sira, millaun 61,14 korresponde ba kapitál menór no millaun 503,20 ba kapitál dezenvolvimentu”. Sorumutuk Estraordináriu Konsellu Ministrus nian iha loron 12 fulan-outubru tinan 2020.

Tuir Komunikadu Imprensa iha reuniaun Konsellu Ministru,Vise-Ministra Finansas Sara Lobo Brites mós halo aprezentasaun ida ba Konsellu Ministru rezultadu husi relatóriu Sensu Agríkola tinan 2019 nian. Rekoilla dadus husi setór agrikultura nian ne’e ho objetivu atu fó dalan ba definisaun polítika no estratéjika ida ba setór sira. Atu apoia programa nasionál agrikultura husi Planu Estratéjiku Dezenvolvimentu tinan 2011-2030, atu dezenvolve indikadór husi Objetivu Dezenvolvimentu Sustentavel 2 (ODS 2) – Zero hamlaha no Agrikultura Sustentavel. Atu fornese dadus estatístiku kona-ba setór ne’e iha nivel administrativu suku nian no fornese enkuadramentu ida ba setór agríkola nasionál.

Rezultadu sira ne’e hatudu katak iha 141.738 propriedade agríkola, ne’ebé 141.141 maka propriedade familiár no 597 partense ba instituisaun privada sira. Relatóriu ne’e hatudu katak 66% husi agregadu familiár nasionál iha atividade agríkola. Propriedade agríkola sira akupa estensaun ida ho ektare 219.250.

Munisípiu sira ho área propriedade agríkola familia ne’ebé boot liu maka Bobonaro, ho propriedade ektare rihun 41 liu, Ermera ho ektare rihun 40 liu no Baukau ho propriedade rihun 25 liu. Enkuantu munisípiu sira ne’ebé área agríkola menus liu maka Lautein no Manatutu, ho 8555 no ektare 3371.

REMATA