• Governu Aprova Tetu Agregadu OJE 2022 ho montante billaun $1,675 – Setór Produtivu (Agrikultura no Turizmu), Ambiente no Konektividade hetan alokasaun aas liu ho 27%

Home » Announcements » Media Releases » Governu Aprova Tetu Agregadu OJE 2022 ho montante billaun $1,675 – Setór Produtivu (Agrikultura no Turizmu), Ambiente no Konektividade hetan alokasaun aas liu ho 27% Print Page

Governu Aprova Tetu Agregadu OJE 2022 ho montante billaun $1,675 – Setór Produtivu (Agrikultura no Turizmu), Ambiente no Konektividade hetan alokasaun aas liu ho 27%

Díli, 27 setembru 2021 – Governu Timor-Leste liuhusi Sorumutuk Estraordináriu Konsellu Ministrus iha loron 24 fulan-setembru 2021, aprova ona tetu agregadu no desagregadu ba Orsamentu Jerál Estadu (OJE) tinan 2022 ho montante totál billaun $1,675 ne’ebé aprezenta husi Ministru Finansas, Rui Augusto Gomes.

Tetu agregadu aprovadu ho montante billaun $1,675 sei uza hodi finansia Programas 43 iha perímetru OJE tinan 2022 liuhusi prioridade nasionál neen (6) mak hanesan: i) Dezenvolvimentu Kapitál Umanu (Edukasaun, Formasaun Profisionál no Saúde); ii) Abitasaun no Inkluzaun Sosiál; iii) Setór Produtivu (Agrikultura no Turizmu), Ambiente no Konektividade; iv) Dezenvolvimentu Setór Privadu no Kooperativa; v) Dezenvolvimentu Rurál; no vi) Boa Governasaun – ho objetivu atu atinji dezenvolvimentu ida ne’ebé kualidade ho kresimentu ekonómiku ne’ebé inkluzivu no sustentável.

Alokasaun orsamentu 2022 tuir prioridades nasionál 6 aas liu mak iha Setór Produtivu sira (Agrikultura no Turizmu), Ambiente no Konektividade ho alokasaun 27%. Tuir kedan ho Abitasaun no Inkluzaun Sosiál 22%, Boa Governasaun 12%, Dezenvolvimentu Kapitál Umanu 10%, Dezenvolvimentu Rurál 3% no Dezenvolvimentu Setór Privadu 0,5%. Aleinde ne’e, ba funsionamentu mákina Estadu hetan alokasaun 18% no atividade seluk 8%.

Tuir-mai alokasaun orsamentu aprovadu ba OJE 2022 tuir klasifikasaun ekonómiku aas liu mak iha Transférensia Públika ho montante millaun $565,9. Tuir kedan ho Bens no Servisus millaun $449,8. Kapitál Dezenvolvimentu ne’ebé bele kria kampu traballu no jere empregu rai-laran hetan alokasaun millaun $401,7. Saláriu no Vensimentu millaun $233 no Kapitál Menór millaun $24,4.

Governu sei aprezenta PPL OJE 2022 ba Parlamentu Nasional iha Outubru 2021

Ho aprovasaun Konsellu Ministrus ne’e, ba oin Ministériu Finansas sei hahú prepara Livru I to’o Livru VI Proposta Lei Orsamentu Jerál Estadu tinan 2022 inklui dokumentu adisionál sira no Governu sei entrega ba Parlamentu Nasionál iha loron 15 fulan-outubro 2021.

Foin lailais ne’e, Ministériu Finansas mós públika ona Pre-Budget Statement 2022 versaun Inglés iha website Ministériu Finansas. Atu download dokumentu ne’e, klik iha link ida-ne’e: https://bit.ly/2XHQARs ***