• Governu Deskuti Preparativus Pagamentu Subsidiu 100 Dolar Ba Kada Uma Kain

Home » Announcements » Governu Deskuti Preparativus Pagamentu Subsidiu 100 Dolar Ba Kada Uma Kain Print Page

Governu Deskuti Preparativus Pagamentu Subsidiu 100 Dolar Ba Kada Uma Kain

20200428_Governu Deskuti Preparativus Pagamentu Subsidiu 100 Dolar Ba Kada Uma Kain-Edited by DGuterres

Ministra Finansas interina i Atuál Vise-Ministra Sara Lobo Brites hateten ohin Menistériu Finansas, Ministériu Administrasaun Estatál (MAE) no Ministériu Solidaridade Sosiál i Inkluzaun (MSSI) hala’o enkontru hodi diskuti preparativus ba pagamentu subsidíu 100 dolar ba uma kain sira.

“Hanesan ita hotu akompaña dekretu-lei ne’e Konsellu Ministru aprova tiha ona i agora iha ona posse Prezidenti Repúblika nian para halo pormulgasaun. Maibé enkuantu hein Prezidente Promulga MAE no MSSI sei prepara mekanismu pagamentu ho mós levantamentu dadus para fundu aprova no hahú hala’o nia ezekusaun”, informa Ministra Finansas interina i Atuál Vise-Ministra Sara Lobo Brites iha Salaun Auditórium Ministériu Finansas, Loron 28 Fulan-Abril 2020.

Ministra mós reforsa tan katak, tuir diskusaun ohin Ministériu Administrasaun Estatál hateten sira rekolla ona dadus uma kain 70 pursentu, sei integra ba Ministériu Solidaridade Sosiál i Inkluzaun hodi halo kruzamentu dadus no verifika fali nia verasidade husi dadus refere hafoin sira hatama proposta. Ohin sira planeia de’it katak semana oin proposta sei hatama iha fundu covid-19 para bele halo aprovasaun finál.

“Ezekusaun ne’e lalais kuandu dadus ne’e kompletu ona, tanba ita planu tuir MSSI no MAE pagamentu ne’e halo simultania ba teritóriu tomak dala ida nível aldeia”, esplika Ministra.
Ministra Finansas interina i Atuál Vise-Ministra Sara Lobo Brites reforsa tan katak, entaun ida ne’e presiza mobiliza rekursu, seguransa, hetan apoiu mós husi Ministériu sira selu-seluk para bele ajuda. Liu-liu MSSI, MAE nia empregadór rasik, Policia, Defeza Seguransa, ita presiza mobiliza sira hotu hafoin halo orariu pagamentu. Husi parte fundu covid-19, ami aprova kuandu sira aprezenta sira nia proposta. Ida ne’e maka iha diskusaun ami husu para determina nia data. Tanba ita hakarak aselera nia prosesu, bainhira lei ne’e promulga ita bele implementa kedas ona.

“Sira bele konklui tiha dadus ne’e lalais aprezenta mai iha Konsellu Fundu no desidi fó ba tékniku sira implementa tuir orariu ne’ebé maka sira propoin”. hateten Ministra Finansas interina i Atuál Vise-Ministra Sara Lobo Brites.

Relasiona ho pagamentu suplementu remuneratóriu, Governante ne’e esplika, dekretu-lei ne’e envia ona ba iha Prezidente Repúblika, nia mekanismu ba pagamentu ne’e ita halo mensál kuandu nia parte legal ne’e prontu ona. Ministériu sira ida-idak nia funisonáriu ka ajente ou profesionál saúde sira ne’ebé eligivel sai benifisiáriu. Uainhira nia parte legislasaun prontu ona ministériu ida-idak maka haruka sira nia naran no detaillu ba fundu atu aprova no Ministériu Finansas prosesu pagamentu.