• Governu hahu Debate Orsamentu Jerál Estadu tinan 2022

Home » Announcements » Governu hahu Debate Orsamentu Jerál Estadu tinan 2022 Print Page

Governu hahu Debate Orsamentu Jerál Estadu tinan 2022

Parlamentu Nasionál loron 1 Fulan-Dezembru tinan 2022 – Vise-Ministra Finansas, Sara Lobo Brites no Ministru Finansas, Rui Augusto Gomes ohin akompaña Primeru Ministru, Taur Matan Ruak iha ambitu debate Jeneralidade Orsamentu Jeral Estadu (OJE) tinan 2022 ho Valór totál ne’ebé tau ona iha orsamentu millaun 1.675. Proposta Orsamentu Jerál Estadu iha aumentu ida maka’as tebes ba investimentu públiku, ho destake ba área atuasaun boot neen (6) mak hanesan;

  • Ba Kapitál Sosiál, Governu propoin dolar milhaun 226,5 ne’ebé reprezenta 13,5% husi Orsamentu Jerál Estadu (OJE), atu aposta ba Edukasaun, Formasaun Profisionál no Saúde, hodi kualifika trabalhadór sira iha setór-xave ekonomia nian, no ba serbisu esensiál sira, hodi responde ba nesesidade Administrasaun Públika no Setór privadu nian, no haforsa resposta ba pandemia COVID-19 no fó kontinuidade ba programa vasinasaun.
  • Ba Abitasaun no Inkluzaun Sosiál, ami propoin dolar milhaun 387,3 ka 23,1% husi Orsamentu Jerál Estadu (OJE) hodi kontinua aposta ba melhoramentu asesu bee-mós, saneamentu báziku no eletrisidade iha territóriu laran tomak, no mós dezenvolvimentu programa abitasaun asesivel.
  • Ba Setór Produtivu sira, Ambiente no Konektividade, ami propoin dolar milhaun 345,9, ne’ebé reprezenta 20,7% husi Orsamentu Jerál Estadu (OJE), atu aumenta produtividade agríkola no seguransa ba ai-han, hodi konstrui infraestrutura foun, kanál distribuisaun no estrutura armazenamentu agríkola nian sira, hodi dezenvolve indústria oteleira nia liuhusi formasaun profisionál husi setór ne’e no estimula komportamentu ne’ebé sustentável liu ba populasaun, ho redusaun ba utilizasaun materiál la’ós bioagradável no aumentu prátika ba resiklajen nian no reutilizasaun materiál sira hodi aumenta reziliénsia país nian ba alterasaun klimátika sira.
  • Ba dezenvolvimentu Setór Privadu, ami propoin dolar milhaun 78,6 ne’ebé reprezenta 4,7% husi Orsamentu Jerál Estadu (OJE), tanba Governu ida-ne’e hakarak aposta ba rekuperasaun ekonomia, liuliu sai frajil ho konsekuénsia krize ne’ebé provoka husi impaktu COVID-19, no husi konfinamentu ne’ebé impoin iha tinan 2020 no 2021, ne’ebé fasilita investimentu no apoiu ba empreza ki’ik no empreza média sira no kriasaun serbisu, hodi aumenta produtividade nasionál no hamenus taxa dezempregu nian, ne’ebé kontribui atu hadi’a ekonomia.
  • Ba Dezenvolvimentu Rurál, ami propoin dolar milhaun 72,2 ka 4,3% husi Orsamentu Jerál Estadu (OJE), hodi fó kontinuidade ba ajenda desentralizasaun, hodi estabelese instituisaun sira ne’ebé forte no haforsa kapasidade atuasaun ba estrutura lokál sira, hodi garante prestasaun serbisu públiku ho kualidade iha territóriu nasionál tomak, no hodi promove identidade nasionál no koezaun territoriál.
  • Ba Governasaun Di’ak, ami propoin dolar milhaun 116,3 ne’ebé reprezenta 6,9% husi Orsamentu Jerál Estadu (OJE), ne’ebé sei finansia reforma temátika no transversal lubun boot ida, liuliu introdusaun planeamentu médiu prazu nian iha instituisaun públika tomak no dezenvolvimentu indikadór dezempenhu nian sira, hanesan parte ba Reforma Jestaun Finansas Públikas no Reforma Fiskál.

Iha orsamentu Jeral Estado tinan 2022 Governu mós tau prioridade ba saúde pública tambá Organizasaun internasionál sira hatudu Timor-Leste hanesan país ida ne’ebé ho prevalénsia fumadór sira boot liu, liuliu entre juventude. Durante tinan sanulu ikus ne’e, país barak iha ona susesu uza agravamentu fiskál hodi hamenus konsumu tabaku.

Ho nuné atu previne konsumu tabaku, produtu ne’ebé ho ninia prejuizu boot ba saúde, prevee katak aumentu taxa impostu seletivu ba konsumu aplikavel ba tabaku, daudaun ne’e dolar amerikanu 19 kada kilograma sa’e ba dolar amerikanu 25 kada kilograma, aumentu ne’ebé Parlamentu Nasionál sujere ona ba Governu iha tinan kotuk.

Iha diskusaun nee, Primeru Ministru VIII Governu Konstitusionál Taur Matar Matan Ruak hato’o mós ninia diskursu relativa ho Proposta OJE 2022 nian iha Parlamentu Nasionál.

Tuir kalendáriu diskusaun no votasaun OJE 2022 ne’ebé mak ajendadu ona:

  • Iha loron 1, 2 no 3 fulan-Dezembro 2022. Diskusaun no Votasaun iha jeneralidade.
  • Iha loron 6-17 fulan-Dezembro 2022. Diskusaun no Votasaun iha espesialidade nomós votasaun Finál Global no sei iha deklarasaun votos husi Deputados sira no redasaun ikus sei haruka ba Prezidenti Repúblika, Francisco Guterres Lú-Olo hodi hetan promulgasaun. REMATA