• Governu Justifika Pedidu Urgência Proposta LFP Ba PN

Home » Announcements » Governu Justifika Pedidu Urgência Proposta LFP Ba PN Print Page

Governu Justifika Pedidu Urgência Proposta LFP Ba PN

20200615_Governu Justifika Pedidu Urujensia Proposta LFP Ba PN - editado por DGuterres

Governu liuhusi Ministériu Finansas (MF) no Ministériu Asuntus Parlamentares no Komunikasaun Sosiál aprezenta justifikasaun pedidu prioridade urjénsia relativa ho proposta lei Levantamentu Fundu Petrolíferu (LFP) autorizasaun ba realizasaun segunda transferénsia extraordinária iha tinan 2020.

Tuir Ministru Finansas (MF) Fernando Hanjam hateten, ho honra bo’ot ida hakat mai uma fukun Parlamentu Nasionál (PN) hodi aprezenta justifikasaun kona-ba pedidu prioridade no urjénsia ba proposta lei daruak autorizasaun realizasaun transferénsia Fundu Petrolíferu no alterasaun dahuluk ba lei nº 2/2020 iha loron 6 fulan Abril iha tinan 2020. Reseitas fiskais la to’o atu finansia atividade sira regular administrasaun públika nian to’o fulan Agostu iha tinan 2020. Além de finansia atividade regular publiku nian ho konsekuénsia pandemia Covid-19, nomós ba realizasaun despezas urjentes ne’ebé imprevisível ba prevensaun no kombate moras Covid-19.

“Mesmu lei ne’e atribui Fundu Covid-19 verba ho montante US$ 150 milhões konsidera la sufisiente atu kobre despezas sira ba prevensaun no kombate Covid-19. Ho baze ida ne’e ba insufisiente despezas regular administrasau publiku no despezas Covid nian. Iha nesesidade atu halo transferénsia husi Fundu Petrolíferu atu estadu bele garantia ezersisiu funsaun soberanu nian”, informa Ministru Finansas Fernando Hanjam, uainhira tuir debate iha Parlamentu Nasionál iha loron 16 fulan Juño 2020.

Ministru mós esplika, iha proposta ne’ebé Governu aprezenta mai Parlamentu Nasionál husu atu realizasaun transferénsia husi Fundu Petrolíferu US$ 286.8 milhões ba konta jerál estadu nian no Governu sei utiliza parte balun husi transferénsia iha ne’e hodi reforsa fundu Covid-19 nian.

“Husi transferénsia iha leten, fahe ba rua, primeru US$ 216.8 milhões ba despezas regular administrasaun publika nian durante vijénsia rezime duodesimál to’o lei OJE 2020 tama em vigor nomós atu asegura saldo tesouro labele menus husi US$200 milhões. No segundu maka iha US$ 70 milhões aloka ba medida ámbitu Covid-19 nian”.

Iha sorin seluk Vice-Ministra Finansas Sara Lobo Brites mós reforsa, razaun primeiru to’o fim fulan Agostu ita nia saldo hela de’it US$ 30 milhões. Quer dizer fulan Setembru nia laran Governu iha difikuldade atu sustenta máquina Estadu. Razaun seluk maka, Konselho de Ministrus mós aprova hela pakote rekuperasaun ekonómika lubuk ida ne’ebé maka ho montante US$ 150 milhões la to’o atu kobre hotu desizaun sira ne’ebé Konselho de Ministrus aprova ona.

“Ne’e duni presiza reforsa US$ 70 milhões para atu bele halo kabimentu ba desizaun sira ne’ebé maka Konselho de Ministrus desidi”.

Vice-Ministra Finansas mós reforsa, iha mós situasaun balun Parlamentu ál bele tolera liu-liutam ba saida maka Governu husu tratamentu pedidu ne’e ho urjénsia. Tanba haree mós tempu ne’ebé Governu iha situasaum agora prepara hela Orsamentu 2020 nian. Ne’e atu hatudu katak, iha períodu ida Juilho, Agostu no Setembru iha faze diskusaun ita sei la iha orsamentu ida maka iha tama em vigor atu ezekuta.

“Governu presiza duni atu hetan reforsu iha fulan Agostu em diante, tanba iha faze orsamentu seidauk iha Governu iha kibit nafatin atu bele finansia despezas estadu nian”, informa Vice-Ministra Finansas.

Tanba ami mós halo kálkulu ka previzaun de tempu katak, media de Setembru maka orsamentu sumete mai PN, obviamente Parlamentu lori tempu lubuk ida halo audiénsia i debate no to’o promulga. E se calhar ita iha osan nia ezekusaun real ne’e la para fulan 3 nian de’it hanesan iha 2018 nian iha Outobru, Novembru no Dezembru.

“Entaun despezas sira ne’ebé maka iha husu para atu hetan reforsu finansiamentu duni ba estadu atu bele aguenta. Ho nune’e servisu esensiais sira ne’ebé Governu presta atu asegura nafatin to’o aprovasaun OJE 2020 nian”.

Ho esplikasaun sira ne’ebé maka iha Parlamentu Nasionál (PN) aprova ona pedidu urgência proposta lei husi Governu kona-ba realizasaun segunda transferénsia extraordinária husi Fundu Petrolíferu 2020 nian ho votus a-favor 43, abstensaun 1 no kontra 16.

Iha fatin hanesan Parlamentu Nasionál baixa kedas pedidu refere ba Komisaun C Parlamentu nian atu bele konvida fali membru Governu sira hodi bele halo audiénsia públika.