• Governu Submete Ona Proposta Lei OJE 2020 Ba Parlamentu Nasionál

Home » Anúnsiu » Governu Submete Ona Proposta Lei OJE 2020 Ba Parlamentu Nasionál Imprime pájina

Governu Submete Ona Proposta Lei OJE 2020 Ba Parlamentu Nasionál

20191016_Governu Submete Ona Proposta Lei OJE 2020 Ba Parlamentu Nasionál

VIII Governu Konstitusionál ofisialmente liuhosi Ministra Finansas Interina, Sara Lobo Brites akompaña hosi Ministru Reforma Lejizlativa no Asuntus Parlamentares, Fidelis Manuel Leite Magalhães, iha loron 15 Outubru 2019, submete ona proposta Lei Orsamentu Jerál Estadu (OJE) Tinan 2020 ho montante Biliaun $1.950 ba Parlamentu Nasionál.

Proposta Lei OJE 2020 ne’ebé mak submete ba Parlamentu Nasionál kompostu hosi Livru 1 Panorama Orsamentu, Livru 3A,B,C, Livru 4, Livru 5 no Livru 6, eseptu Livru 2.
Livru 2 ne’ebé deskreve kona-ba planu asaun anual, Ministériu Finansas servisu hamutuk ho Unidade Planeamentu Monitorizasaun no Avaliasaun (UPMA) sei aprezenta iha loron 21 Outubru.

“Ohin ami aprezenta ona proposta lei ho livru sira ho mós karta formal hosi Primeiru Ministru mai iha Prezidente Parlamentu”, hateten atual Vise Ministra Finansas, Sara Lobo Brites iha uma fukun Parlamentu Nasionál hafoin intrega dokumentus Proposta lei OJE 2020 ba Prezidente Parlamentu Nasionál, Arão Noe Amaral.

Proposta ba OJE 2020 sei kobre nesesidade no prioridades hosi programa VIII Governu Konstitusionál ne’ebé defini ona tuir áreas ida-idak ho kompozisaun OJE 2020 mak hanesan; saláriu vensimentu millaun $241.271; Bens Servisus millaun $738,428; Transferénsia Públikas millaun $457,773; Kapital Minor milllaun $53,267 no Kapital Dezenvolvimentu millaun $459,260.

Orsamentu Jeral estadu 2020 sei foka ba iha área prioridades balun mak hanesan kapital sosiál no protesaun sidadania liu liu ba foin sae sira hodi iha sentimentu de pretensa. Nune’e mos kuntinua dezenvolve setor ekonómiku inklui mós finansas publikas. Konektividade liu liu estradas nasionál no estradas rurais oinsa maka ema bele iha asesu ba merkadu no eskola. No ikus liu mak kuntinua konsolida seguransa no defeza nomós relasoins internasionais, konsolida demokrasia hametin justisa no direitus humanus.

“Kuandu ita tama iha liña sektorais hosi OJE 2020, área edukasaun, sáude, agrikultura ita mós fó atensaun. Purtantu governu nafatin fó atensaun ba área sira ne’e”, afirma Vise Ministra Finansas.

Diskusaun no votasaun espesialidade inklui votasaun final global ba Orsamentu Jeral Estadu 2020 sei realiza iha Parlamentu Nasionál hahu’u hosi 26 Novembru – 10 Desembru 2019.