• Sesaun indusaun ijame Diagnóstiku Jestaun Finansas Públika

Home » Anúnsiu » Sesaun indusaun ijame Diagnóstiku Jestaun Finansas Públika Imprime pájina

Sesaun indusaun ijame Diagnóstiku Jestaun Finansas Públika

Ministériu Finansas, ne’ebé lidera husi Sentru Dezenvolvimentu Kapasitasaun Jestaun Finansas Públika (SDKJFP), organiza sesaun Indusaun loron-rua konaba ijame Diagnóstiku Jestaun Finansas Públika. Sesaun hirak ne’e halao iha loron 12 to’o 13 Marsu 2015, iha Salaun Delta Nova, Dili, Timor-Leste. Ofisial finansas públika sira hamutuk nain 695 husi instituisaun sira Estadu nia hotu iha área JFP maka atende sesaun hirak ne’e.

Ijame Diagnóstiku JFP da-huluk tentativamente sei halao iha Abril 2015. Ijame ida ne’e sei foka liu ba avaliasaun abilidade, koiñesimentu no kompeténsia funsiunáriu públiku hotu ne’ebé responsabiliza konaba despeza, jestaun, autorizasaun no monitorizasaun fundu públiku iha Governu.

Iha sesaun Indusaun ne’e, Koordenador SDKJFP, Sr. Alberto Soares Piedade aprezenta detallu konaba Padraun Kompeténsia JFP no koalia mos área sira JFP nian ne’ebé sei inklui iha ijame diagnóstiku da-huluk. Área sira ne’e inklui Planeamentu, Orsamentu, Aprovizionamentu no Jestaun Kontratu, Jestaun Patrimóniu no Viatura no Pagamentu.

Ba kompeténsia espesializada JFP sira iha área sira hanesan Reseita Impostu, Alfândega, Auditoria no Estatístika, SDKJFP sei halao diagnóstiku JFP espesializada ida, ne’ebé tentativamente sei realiza iha meadu 2015.