• Indusaun Jerál & Orientasaun kona-ba Edifisiu Foun – Torre Ministériu Finansas

Home » Announcements » Indusaun Jerál & Orientasaun kona-ba Edifisiu Foun – Torre Ministériu Finansas Print Page

Indusaun Jerál & Orientasaun kona-ba Edifisiu Foun – Torre Ministériu Finansas

media

Dili 12/06/2017, funsiunáriu no staff tomak Ministériu Finansas nian partisipa iha sesaun indusaun gerál & orientasaun kona-ba edifísiu foun Torre Ministériu Finansas iha Aitarak-Laran. Objetivu prinsipal husi eventu refere mak atu haklean konhesimentu funsionariu no staff tomak kona-ba fasilidade oi-oin no aspeitu imporatnte sira ne’ebe bele tulun iha prestasaun servisu profisionalizmu atu bele atende nesesidade kliénte ho diak liutan.

“Ho infrastrutura Ministériu Finansas nian ne’ebé maka iha ona, espera katak bele fasilita funsiunáriu sira nia servisu ho diak liutan; hodi nune’e bele fó prestasaun servisu ba públiku ho efisiensia no efikasia. Nune’e, públiku bele senti katak ho prezensa Ministériu Finansas nian la’os hare de’it ba infrestrutura ne’ebé Ministériu Finansas okupa, maibé oinsá Ministériu Finansas bele responde kliénte nia nesesidade tuir tempu ka on time”, haktuir Ministra Finansas, Sra. Santina J.R.F. Viegas Cardoso

Ministra Finansas mos husu ba funsiunáriu sira hotu-hotu ne’ebé maka asesu ka utiliza fasilidade públiku iha edifísiu Ministériu Finansas iha responsabilidade atu kuida fasilidade sira ne’e ho didiak. Basa, ekipamentu sira ne’e hanesan ekipamentu estadu nian no tenki utiliza ho responsabilidade. Importante liu mak atu kuda iha ita hotu nia hanoin katak investimentu bo’ot ida ne’ebé governu halo ba Ministériu Finansas ho espasu ida ne’ebé bo’ot no kualidade atu responde ba neseidade públiku ho kualidade mós. Iha parte seluk ho edifísiu foun ne’e oinsá bele eduka ita nia funsiunáriu sira atu utiliza fasilidade Ministériu nian ho resposabilidade ida ne’ebé diak liutan.

Iha sorin seluk, Vice Ministru Finansas, Sr. Helder Lopes hatutan katak, normalmente aumenta fasilidade tenki kontribui ba aumenta mós produtividade husi diresaun hotu ne’ebé mak hala’o sira nia servisu iha fatin ida ne’e. Hare’e ba fasilidade ne’ebé iha diak liu kompara ho fasilidade sira ne’ebé antes ne’e Ministériu iha. Ho hanoin katak liu husi fasilidade agora daudaun ne’ebe Ministériu iha, espera ida ne’e la’os previlejiu ida ba ita bo’ot sira hodi aprovéita maibé, ida ne’e produtividade mak tenki aumenta, tanba produtividade tenki relasiona ho fasilidade sira ne’ebé iha.

Vice-Ministru mós informa liu tan katak, edifísiu ne’e tanba konstrui husi osan públiku nian, hanesn responsabilidade ida atu ita-hotu tenki utiliza didiak atu servi ita nia públiku ho diak liutan. Tanba ne’e, indusaun inportante tebes oinsá funsiunáriu sira bele rona informasaun konaba utiliza fasilidade iha edifísiu Ministériu nian ho didiak hodi nune’e bele fasilita ita nia servisu no mós aumenta produtividade ba atendimentu kliénte ho diak liutan.

Iha indusaun ida ne’e hetan partisipasaun másimu husi funsiunáriu sira hotu iha unidade de trabalhu ne’ebé maka utiliza edifísiu foun Ministériu Finansas nian inklui Ministra, Vice Ministru, Diretor Geral, Diretor Nasional, Xefe Unidade/ Gabinete, funsiunariu sira no pessoal apoiu tékniku sira.