• Infra-estrutura Pilar Importante Dezenvolvimentu.

Home » Anúncios » Infra-estrutura Pilar Importante Dezenvolvimentu. Imprimir a página

Infra-estrutura Pilar Importante Dezenvolvimentu.

Dili,31 Janeiru 2018

Infra-estrutura nu’udar fundamentu importante ida hodi estimula kresimentu ekonômiku país ida nian. Apartir husi alokasaun finansiamentu públiku no privado, infra-estrutura konsidera nu’udar motor dezenvolvimentu nasional no rejional. Tamba, husi aspeito makro-ekonômiku, dezenvolvimentu infra-estrutura bele afeta produtividade kapital privado, enkuanto iha kontextu mikro-ekonômiku, infra-estrutura ho kualidade di’ak bele ajuda redus kustus produsaun. Kresimentu ekonômiku nu’udar sasukat makro-ekonomiku ida importante iha prosesu dezenvolvimentu ekonomiku nasaun ida nian.

“Hodi assegura prosesu dezenvolvimentu ne’e lao ho lalais, VII Governu Konstitusional liuhusi Ministeriu Planu no Finansas propoin politika infrastructure investment plan ne’ebé sei bazeia ba analize kustus no benefisiu. Planu ne’e ho orizonte mediu prazu atu bele responde mehi ne’ebé hatur tiha ona iha Planu Estratéjiku Dezenvolvimentu (2011-2030). Ho analiza kustu no benefisiu ida ne’e, sei hare liu ba kualidade infra-estrutura no tempu husi retornu investimento ne’e rasik” Lia hirak ne’e hato’o husi Rui A.Gomes, Ministru Planu no Finansas iha seminário “Bele ka La’e Timor-Leste iha Moeda rasik?” ne’ebe organiza husi Institute of Business (IOB), loron 29 fulan janeiru tinan 2018.

“Wainhira ita aplika modelu dezenvolvimentu infra-estrutura bazeia ba análise kustu no benefísiu (Cost-Benefit Analysis), maka prosesu foti desizoes bele bazeia ona ba rasionalidade despeza públikas no atu nune’e bele evita soe osan arbiru deit. Retornu ekonomiku no sosial husi infra-estrutura ne’ebé ita harii ne’e, mak sei justifika ejistensia benifisiu ba Estadu no mós ba Povu. Ho infra-estrutura ho kualidade, bele mós fasilita atividade komersial no mobilidade ema no sasan iha rai laran” Hateten Ministru Planu no Finansas.

Maski importansia infra-estrutura fisiku klaru tiha ona, la signifika katak nia sei automatikamente bele hadi’ak ema nia moris. Presija mós buka ekilibriu ida entre investimentu iha kapital fisiku no investimentu iha kapital umanu. Ekilibriu ida ne’e mak sai nu’udar modelu foun dezenvolvimentu iha Programa do VII Governo ida ne’e.