• Interligasaun Entre Sistema GRP no SIGAP

Home » Announcements » Interligasaun Entre Sistema GRP no SIGAP Print Page

Interligasaun Entre Sistema GRP no SIGAP

Dili, 24 Setembru 2018,

Iha loron 21 Setembru 2018, Governu liu hosi Ministériu Finansas no Komisaun Funsaun Públika realiza assinatura dokumentus “User Requirement Document-URD”, hodi inísia prosesu servisu tékniku no preparativus sira antes halo lansamentu no “go live”, iha Janeiro 2019, kona-ba interligasaun entre sistema Government Resource Planning – GRP ho Sistema Integradu Gestaun Administrasaun Públika – SIGAP.

Sesaun ida ohin nudar pasu importante no determinante tebes iha prátika jestaun finansas públika ninia, tanba:
1) Halo automatizasaun, sai nudar odamatan únika, ba iha servisu no prosesu pagamentu saláriu vensimentu funsionarius públiku permanente no ajente administrasaun iha administrasaun Públika.

2) Iha Re-definisaun ba kompetensia, servisu no responsabilidade, entre Ministériu Finansas (Payroll) no Komisaun Funsaun Públika, bazeia-ba Diploma Ministerial Num. 65/2016, kona-ba Prosedimentu Pagamentu Pesoal iha Funsaun Públika;

3) Ho re-definisaun refere, Komisaun Funsaun Públika sei responsabiliza ba insersaun informasaun “Data Entry”, rejistrasaun/atualizasaun ba situasaun sira kona-ba funsionariu sira – permanente no ajente administrasaun públika sira -, husi liña ministerial no ajensia autónomu sira; enkuantu, Departamentu Payroll, Diresaun Nasional Pagamentu-Diresaun Jeral Tesouro-Ministeriu Finansas sei responsabiliza ba kalkulasaun no realiza pagamentu ba funsionarius permanente no ajente administrasaun sira, hafoin simu informasaun no instrusaun através sistema SIGAP husi Komisaun Funsaun Públika.

Aktividade importantes ne’ebé sei halao hosi ekipa MF no KFP, antes realizasaun interligasaun refere iha fulan Janeiru 2019, mak hanesan:
i Rekonsiliasaun de dadus entre Sistema GRP no SIGAP
ii Assinatura ba User Requirement Document-URD
iii Draft MoU
iv Prepara Sistem Requirement
v Desenvolvimentu Sistema
vi Testing no UAT
vii Trainning
viii Go Live

Aktividade hirak ne’e hotu exije partisipasaun no apoiu máximu husi Jestores Rekursu Humanos kada Instituisaun Estado. Dever funsional ida diretu mak, liu-liu, iha prosesu rekonsiliasaun dadus entre sistema rua; no mós dever funsional sira seluk (indireta), ba iha ámbitu finalizasaun servisus sira refere, atu hodi kumpri kompromisu bot Governo nian ba iha automatizasaun prosesu sira ne’e, parte husi modernizasaun administrasaun publika.

Vantazen sira mak sei hetan husi aplikasaun sistema interligasaun no automatizasaun refere maka hanesan :

  • Sei laiha ona duplikasaun dadus ba funsionário públiku ninian;
  • Sei laiha tan ona funsionáriu mate-klamar “Ghost employee”, tanba konsege hamos hotu ona husi sistema rua – GRP no SIGAP -, nebe koalia-ba-malu tiha ona;
  • Informasaun payroll no pagamentu sei prosesa tuir ninia tempu ne’ebe loloos no rigor;
  • Repositóriu dadus hotu ba funsionário públiku permanente no ajente administrasaun públika sira sei sentraliza iha KFP, no dadus sira sei sincroniza entre KFP no MoF;
  • Rekolla no aktualiza informasaun ba funsaun publika sei haktuir ba KFP, hodi garante katak laiha duplikasaun dadus entre sistema SIGAP no GRP;
  • Informasaun funsaun públika sei iha “tempu reál” no atualizadu nafatin;
  • informasaun funsaun públika sei transparénsia no rigor;
  • odamatan unika, simplifika prosesu no fasilita prosesu kontrolu ba numerus funsionarius publiku permanente no ajente administrasaun públika sira.

La’os deit vantazen sira refere iha leten. Ida seluk mós mak kona-ba simplifikasaun ba iha sistema. Husi tipu variasaun hamutuk rua-nulu (20), ekipa tekniku sira harmoniza no simplifika ba deit sanulu-resin-hat (14), hodi konfigura no ajusta iha sistema rua GRP no SIGAP. Detailu tipu variasaun hirak ne’e mak hanesan:

1 Funsionario Foun*
2 Transferensia Funsionario*
3 Mudansa Grau/Escalao*
4 Licença Sem Vencimento*
Lisensa Maternidade
Lisensa Paternidade
5 Canselamento Salario*
6 Overtime*
7 Reativasaun
8 Licença Com Vencimento
9 Reajustamento Salario
Seidauk Selu (Excel Form)
Retroativo
10 Falta Injustificado
11 Salario Kargu
Canselamento Salario Kargu
Pagamentu ba Subsidiu
12 Transferensia Conta
13 Dedusaun Selu Liu(Excell Form)
14 Prolonga Kontratu

Maske sistema interligadu no automatiza ona, iha funsaun sira seluk mak sei retein no kontinua halao nafatin prosesu husi Departamentu Payroll, hanesan :
1. Pagamentu Salariu ba Membrus dú Parlamentu Nasional
2. Pagamentu Salariu ba Membrus dú Governu
3. Pagamentu Salariu ba Membrus PNTL
4. Pagamentu Salariu ba Membrus F-FDTL
5. Pagamentu Salariu ba Ex-Titularies
6. Pagamentu Salariu ba Offisiais husiTribunal
7. Pagamentu Salariu ba Funsionariu Kontratadu “Casual employees
8. Pagamentu Salariu ba Apontamentu Politika
9. Pagamentu Salariu ba Officiais Procuradoria Jeral da Repúblika, no
10. Pagamentu Salariu ba Offisiais Defensoria Publika

Lalaok pagamentu ba tipo variasaun iha leten, Institusaun relevantes kontinua haruka sira nia pedidu diretamente mai Departamentu Payroll, hodi insera informasaun no kalkula pagamentu iha sistema GRP.
Maka ne’e deit informasaun no komunikadu ba imprensa ne’e, hasai husi MF no CFP, hodi fasilita jornalista sira no parte interesante sira nia kobertura no entendimentu kona-ba objektivu realizasaun eventu ida ohin. “REMATA”

Atu hetan informasaun klaru liu, bele kontaktu ba:

Agostinho Castro
Chefe Gabinete Komunikasaun no Informasaun
Ministeriu Finansas
+670 7723 0124
acastro@mof.gov.tl

Maria Sarmento
Sekretaria Exekutiva
Komisaun Funsaun Publika +670 7732 6656