• Intervistadores sei kuntinua rekolla dadus Sensus Agrikula 2019

Home » Anúnsiu » Intervistadores sei kuntinua rekolla dadus Sensus Agrikula 2019 Imprime pájina

Intervistadores sei kuntinua rekolla dadus Sensus Agrikula 2019

Intervistadores sei kuntinua rekolla dadus Sensus Agrikula 2019 1

Ekipa intervistadores Sensus Agrikula 2019 oras ne’e sei kuntinua rekolla informasaun iha terenu ba área hirak ne’ebé seidauk remata Sensus Agrikula hanesan Ainaro, Baucau, Lautem no Liquiça. Desizaun hodi aumenta tempu ba Sensus Agrikula 2019, nu’udar desizaun entre Ministériu Finansas liuhosi Diresaun Jerál Estatístika no Ministériu Agrikultura no Peskas hodi bele hetan dadus válidu antes aprezenta relatóriu pre-elimináriu nu’udar relatóriu dahuluk hosi rezultadu Sensus Agrikula 2019.

“Hau hakarak informa, pursentu 98 Sensus Agrikula kobre ona ba Timor laran tomak. Ami sei estende tempu ba intervistadóres inklui sira ne’ebé ka’er GPS nomós ekipa hosi nasionál hodi reforsa servisu hirak ne’e to’o loron 31Outobru 2019”, haktuir Diretór Jerál Estatístika Ministériu Finansa,Elias Dos Santos Ferreira.

Sensus Agrikula ofisialmente lansa hosi VIII Governu Konstitusionál iha loron 12 Agostu 2019 ne’ebé hala’o iha resintu edifísiu Minísteriu Agrikultura no Peskas, Comoro ho total pesoál ne’ebé rekrutadu hodi hala’o servisu Sensus Agrikula hamutuk pursentu 64 mane no pursentu 36 feto hosi total ema hamutuk 2.584 pesoas.

Data prolongamentu ne’ebé sei remata iha loron 31 Outubru 2019, sei fo biban ba intervistadór hodi kuntinua rekolla informasaun hosi uma kain hirak ne’ebé seidauk fornese dadus ba ekipa Sensus Agrikula sira. Dirijenti Sensus Agrikula 2019 kuntinua apela ba públiku hodi bele koopera ho ekipa Sensus Agrikula 2019 liu-liu ba uma kain sira ne’ebé seidauk fo sira nia dadus antes data prolongamentu ne’e remata.

“Ita bo’ot sira nian resposta maka sei sai benifísiu hodi nune’e ami nia ekipa bele análiza. Dadus ne’e sai dadus ne’ebé importante ba Ministériu Agrikultura no Peskas hodi bele halo planu ba dezenvolvimentu ba ita nian Pais. Hau mós hakarak hato’o parabéns ba autoridade lokal hotu ne’ebé fó ona suporta ba realizasaun Sensus Agrikula 2019”, hateten Diretór Jerál Estatístika iha okaziaun aprezentasaun Indise Presu Konsumedóres (IPK) Fulan Setembru 2019 iha nia servisu fatin, Cai-Coli.