- Jornada Orsamental 2019 – Defini Prioridades Nasionais Hodi Guia Elaborasaun Orsamentu Tinan 2019
Home » Anúnsiu » Jornada Orsamental 2019 – Defini Prioridades Nasionais Hodi Guia Elaborasaun Orsamentu Tinan 2019 Imprime pájina
Jornada Orsamental 2019 – Defini Prioridades Nasionais Hodi Guia Elaborasaun Orsamentu Tinan 2019
Dili, 17 Setembru 2018,
Ohin 17 to’o 18 Setembru 2018, Membru hosi VIII Governu Konstitusional partisipa iha “Jornada Orsamental 2019” ne’ebé organiza hosi Ministériu Finansas no lidera diretamente husi S.E. Primeiru Ministru, Sr. Taur Matan Ruak iha Auditorium – Ministériu Finansas Aitarak Laran.
Diskusaun ne’e hetan mos partisipasaun hosi Prezidente Komisaun Funsaun Públika (CFP) no Komisarius, reprezentante hosi Banku Sentral, Diretóres Jeráis, Diretóres Nasionáis, Ajénsia Públika Autónomas sira, reprezentante hosi Autoridade 12 Munisipius inklui autoridade hosi RAEOA/ZEESM, Sociedade Civil, Asessores, nomos funsionárius públikus balun.
Sesaun Jornada Orsamental ne’e, uluk koñesidu ho naran “Yellow Road Workshop” nu’udar sorumutu anual hodi marka inísiu ba prosesu orsamental 2019 no define prioridades nasionais ho objektivu:
i) Fahe informasaun sobre sistema planeamentu no sistema Jestaun Finansas Públikas;
ii) Defini prioridades nasionais 2019;
iii) Defini Tetu fiskál 2019;
Atu bele kaer nafatin prinsípius sira sustentabilidade fiskál, rasionaliza gastos no utilizasaun rekursu finansas públiku ho kualidade liu hosi observasaun “ Timor-Leste iha ne’ebé ona? Timor Leste atu ba ne’ebé? no Saida maka Timor Leste sei halo tan iha 2019” iha ámbitu Orsamentu 2019 nian. Diskusaun ba pontu sira ne’e sei hola reflesaun ba Planu Estratéjiku Dezenvolvimentu Nacional (PEDN) no Planu 5 anos VIII Governu Konstitusional nian.
Atu bele determina Prioridade Nacionais no Tetu Orsamentu ne’ebé rasional no efisiente, diskusaun iha sesaun ida ne’e sei dedika ba materia Planeamentu no orsamentu, avaliasaun ba dezempenhu sosio ekonómiku ho ninia materia komplementar sira hanesan dezempenhu despezas atual, reforma ekonomia no reforma fiskál, dezempenhu investimentu fundu petrolífeiru no sira seluk tan atu utiliza nu’udar instrumentu referênsia ba definisisaun polítika orsamentu 2019 ne’ebé ho medidas rasional, sustentavel, efisiente no ho kualidade.
Diferente ho Sesaun Jornada Orsamental iha tinan anterior nian, tinan ida ne’e Ministériu Finansas organiza no involve mos Entidades no Instituisaun sira seluk hodi halo aprezentasaun ba membru Governu, no audentes sira hotu kona-ba materia ezekusaun Orsamentu Jerál Estadu nian nune’e partisipante sira bele akompanha materia tékniku nee hodi halo diskusaun klean hodi bele fundamenta iha parte programa no atividade prinsipal ba OJE 2019 nian.
Espektativa hosi sesaun ne’e atu hetan kontribuisaun ativa husi partisipante sira durante Jornada Orsamentál hodi nune’e bele aprezenta planu ida ne’ebé efikáz no ho kualidade atu bele fó benefísiu no bens estar ba povu Timor-Leste. REMATA
Hare’e mos iha Portal do Governu: Governu hahú preparasaun kona-ba OJE tinan 2019 nian
Atu hetan informasaun klaru liu, bele kontaktu
Agostinho Castro
Chefe Gabinete Komunikasaun no Informasaun
Ministeriu Finansas
+670 7723 0124
acastro@mof.gov.tl